1 Bɔn-nyɛɛg, nenak mɛ ɛpekwyɛl ɛtaala bin Mbɛɛ Bhaadal mɛ nagoola bin ɛ, Mbɛɛ Bhaadal bi nagwak ɛ, yii bi zewa lyem e tak ɛ. 2 Yɛ ɛ́ dum nɛ Mbɛɛ Bhaadal tak ɛ bi nabela tsik. Ye goka ɛ́ bi baal yɛ dáa mɛ nagoola bin yɛ ɛ. Yɛ di ààdi deenek ɔɔ, yɛ waalyaal náá, ɛdum ɛ koŋ ɛ len nɛ Zɛɛb ɛ yii toto.

3 Mɛ nakan ɛgoola bin sok ɛ́ mɛlyo mɛ mam mɛ ɛmet nagwak ɛ. Mɛlyo mɛ tak ɛ́ náá, Klisto nagwyɛ ɛ́ étɛp mesyem mena, dáa Ekwyala e Zɛɛb di elɛɛ ɛ. 4 Nyɛ naadelaa tɔ ɛvit, da gom bhii mɛlu mɛlɛl, dáa Ekwyala e Zɛɛb di elɛɛ ɛ. 5 Nyɛ naazɛtel Pyɛɛd nyel, dɔɔ nɛ bɛdhiiiti bɛdjekel kam nɛ bɛbá. 6 Bhii tak, nyɛ naazɛtel nyel é ɛwala wat nɛ bɛdjekel bɛ bɛdhet-ɛtɛn (500). Bɛdhiiti bot pak’ɔɔ naazegwyɛ, bɛtɛ nɛ bɛdhiiti dinaa nɛ tsik. 7 Bhii tak, nyɛ naazɛtel nyel nɛ Zak, zɛnɔɔ bot ɛ lwoma bɛ djas. 8 Bhii nyɛ natel bɔɔ djas nyel ɛ, nyɛ naazɛtel mɛ nyel, mam mot di ààkoval sonok ɔ.

9 Mɛ tok vaŋ mot tɔ sama bot ɛ lwoma. Nɛ tsɛɛtsɛ, yɛ ààgoka náá, mɛ djóoaa mot-lwoma, etɛɛ náá, mɛ naatiig bot ɛ zɛɛga mendjaala Zɛɛb. 10 Tin, kɔ ɛsu ɛ enɛm nɛ embɛɛ e Zɛɛb ɛ, mɛ moo mos mot mɛ di’aak. Enɛm nɛ embɛɛ ee Zɛɛb nadjɛ mɛ ɛ, ye nabɛ ɛ́ ààbɛ yii toto. Mɛ naasa mɛsa dhaa bot ɛ lwoma djas. Nɛ tsɛɛtsɛ, ye nabɛ ɛ́ ààbɛ nɛ ghwyil’am, yɛ ɛ́ enɛm nɛ embɛɛ e Zɛɛb ɛ nadi esa mɛsa tɔ lam. 11 Ye nakoozodi náá, yɛ ɛ́ mam ɛ di elyo nɛghu bɛdhiiti bot ɛ lwoma ɛ di elyo, yɛ ɛ́ Mbɛɛ Bhaadal bis di egoola ɛ. Yɛ ɛ́ kɔ ɛsu ɛ tak ɛ bi di edum koŋ nɛ Zɛɛb.

12 Mena goolaka bot Mbɛɛ Bhaadal ɛ́ náá, Klisto naazegom pak myoŋ. Tin, tɔ sama yen, yɛ ɛ́ nɛ bɛdhiiti bot pak’en baadi eke náá: «Bot ɛ zegwyɛ ɔ, tok nɛ ghwyil ɛgom.» 13 Yɛ bɛ náá, bot ɛ zegwyɛ ɔ aanàbaagom ɔɔ, ye kwyɛl ɛlɛɛ ɛ́ náá, dɔɔ nɛ Klisto pe nabɛ ɛ́ ààgom pak myoŋ. 14 Deenek, yɛ bɛ náá, Klisto nabɛ ɛ́ ààgom pak myoŋ ɔɔ, é di’enek, mɛlyo mɛ mena di elyoka ɛ, yɛ ɛ́ yii toto! Deenek, mena tokeka nɛ sa mena di edum koŋ kɔ ɛsu ɛ tak ɛ. 15 Yɛ bɛ tsɛɛtsɛ náá, myoŋ aanàgom ɔɔ, ye kwyɛl ɛlɛɛ náá, Zɛɛb ààpagomal Klisto tɔ ɛsyee. É di’enek, menaka ɛ́ bot ɛ di elɛɛ eleŋ etsal dum nɛ sa Zɛɛb nasa ɛ. É di’enek, mena aadika ɛ́ bot ɛ etsal etɛɛ náá, mena naabaŋa bot náá, Zɛɛb naagomal Klisto bhis ɛsyee. 16 Yɛ bɛ náá, bot ɛ nazegwyɛ ɔ aanàkwaagom ɔɔ, é di’enek, Klisto pe nabɛ ɛ́ ààgom pak myoŋ. 17 Deenek, yɛ bɛ náá, Klisto nabɛ ɛ́ ààgom pak myoŋ ɔɔ, ɛdum ɛ koŋ ɛ len nɛ Zɛɛb ɛ́ yii toto. Tin, bi dinaa tɔp tɔ mesyem. 18 Yɛ bɛ náá, yɛ ɛ́ deenek ɔɔ, guka náá, bot ɛ zegwyɛ tɔ ɛgwakel nɛ Klisto ɔ, bɛ eezewo ze. 19 Yɛ bɛ náá, ɛbwaalel ɛ lena nɛ Klisto zosik ɛ́ é tsik bot di nɛ yɛ kɔ ɛko ɛ bɔs ɔɔ, menaka ɛ́ tɔ ghoŋ dhaa bot djas.

20 Tin, nɛ tsɛɛtsɛ Klisto naagom pak myoŋ, ye lyaal ɛ́ náá, bot djas nazegwyɛ ɔ, bɛ waagom deenek. 21 Dáa ye di náá, ɛsyee nazyɛ kɔ ɛko ɛ bɔs ɛ́ nɛ mot ngɔt ɛ, yɛ ɛ́ tyee wat, ɛgom pak myoŋ zyɛ ɛ́ nɛ mot ngɔt. 22 Dáa ye di náá, bot djas ɛpegwyɛ kɔ ɛsu ɛ Adam ɛ, yɛ ɛ́ tyee wat, bot djas ɛ́ waagom tɔ ɛsyee kɔ ɛsu ɛ Klisto. 23 Tin, mot nɛ mot ɛ́ nɛ yɛ ɛlu. Klisto ɛ́ mot mɛkɛn nagom tɔ ɛsyee dáa tom pyeeb ɔ. É ghɛŋ nyɛ aabula ɛ, bot djas nadi tɔ ɛgwakel nɛ nɛ ɔ, bɛ waagom tɔ ɛsyee. 24 Bhii tak, yɛ aadi ɛ́ mɛsik mɛ bhwak. Deenek, Klisto ɛ́ waawaaz ekukuma djas, bɛmɛbwala djas, nɛ embee esisim djas, da bulal Ɛyoŋ nɛ Zɛɛb Sɛɛg. 25 Etɛɛ náá, ye goka ɛ́, Klisto di kɔ bóó mɛkoozi, kɛkum ɛwala ɛ Zɛɛb aawa bot ɛ mɛbhuka mɛ djas si mɛko mɛ ɛ. 26 Tin, mot mɛbhuka aasaabaa é mɛsik ɔ, yɛ ɛ́ ɛsyee. 27 Tin, Ekwyala lɛɛ ɛ́ náá: «Zɛɛb naawa etɛp djas si mɛko ɛ Klisto✝.» Deenek, yɛ ɛpenyen popoopwon náá, tɔ Ekwyala bak, é ghɛŋ Zɛɛb di eke «djas» ɛ, ye tok dɔɔ nɛ nyɛy Zɛɛb tɔ tak. Nyɛy mot nadjɛ Klisto ghwyil ɛkɔk kɔ esonok djas ɔ. 28 É sok esonok djas aadi si ekukuma ɛ Klisto ɛ, tin, nyɛy mot di mɔn ɔ, nyɛ aadi ɛ́ si ekukuma Zɛɛb Sɛɛg, mot nadjɛ nyɛ ghwyil ɛkɔk kɔ esonok djas ɔ. Deenek, Zɛɛb aakɔk kɔ esonok djas.

29 Baataalaka bot ɛ nazeduwa Zɛɛb é di bot ɛ zegwyɛ ɔ, bɛ bwaal yé? Yɛ bɛ náá, yɛ ɛ́ tsɛɛtsɛ náá, bot ɛ nazegwyɛ ɔ aanàkwaagom ɔɔ, haaa étɛp yé bɛ di eduwa Zɛɛb é di yɔɔ? 30 Étɛp yé bisɔ bɛmet bot ɛ lwoma di eka mɛnyel mes mɛlu djas é ɛsyee? 31 Bɔn-nyɛɛg, mɛlu djas, ɛsyee ɛ́ é bhaaz’am. Mɛ lɛɛ tsɛɛtsɛ ɛ́ náá, mɛ ɛpemyaala nɛ nen kɔ ɛsu ɛ ɛgwakel ɛ len nɛ Ghɛŋ’enaka Yezu Klisto. 32 É ghɛŋ mɛ nadi pɛ tɔ ghaada Efɛɛz ɛ, mɛ naaduu tuub nɛ bot ɛ nadi dáa bɛtit ɛ mɛnyan ɛ. Mɛ ɛpedi eduu nɛ nɔɔ ɛ́ tɔ ɛkwosak ɛ epuud ɔɔ, pe mɛ kabela yé bhii tak? Yɛ bɛ náá, bot nazegwyɛ ɔ ààgom ɔɔ, djhoosaka dáa bot ɛ bɔs djas di eke ɛ. Bɛ dyeebake ɛ́ náá: «Djhoodɛka edee nɛ mɛnyok, djɛmɛn mena ɛ́ waagwyɛka!»

33 Nàkɔɔka mɛnyel men, etɛɛ náá, yɛ ɛ́ tsɛɛtsɛ sa bot di elɛɛ: «Ɛgyee lɔɔg nɛ bɛmbee ɛ bot nɛ pul mɛfulu mɛ bɛtɛtɛ ɛ bot.» 34 Bulaka é ze, tin, katka ɛsa mesyem, etɛɛ náá, bɛdhiiti bot pak’en ààgu Zɛɛb, yɛ ààsa bin sen é?

35 Dhiiti mot ɛ́ waadji náá: «Bot aagom pak myoŋ dáa? Tin, mɛnyel mɔɔ ɛ́ aakadi dáa?» 36 Mot di edji deenek ɔ ààtselal. É ghɛŋ mot di ebɛ bum ɛ, ye tok nɛ ghwyil ɛkwyil, yɛ bɛ náá, bum tak dinaa ààpabɔ tɔ bɔs ɔɔ. 37 Tin, sa mot di ebɛ ɛ, yɛ ɛ́ bum, yɛ ɛ́ nɛ ghwyil ɛdi bum ble nɛghu dhiiti bhek, ye tok le di náá yɛ eezekwyil ɛ. 38 Tin, Zɛɛb ɛpesa náá, bum’enek kwyil dáa nyɛ di ekwyɛl ɛ, bum nɛ bum nɛ yɛ kɔkɔ.

39 Esa djas di nɛ tsik ɛ, ye tok nɛ mbi nyel wat. Epuud e mot tok tyee wat nɛ epuud e tit. Epuud e mot tok tyee wat nɛ yii enen nɛghu yii bɛsu.

40 Yɛ ɛ́ nɛ esonok di pɛ tɔ gwoo nɛ esonok di pɛ kɔ bɔs ɛ, esonok di pɛ tɔ gwoo ɔ tok djala nɛ esonok di pɛ kɔ bɔs ɛ. 41 Gwyes ɛ́ nɛ yɛ mɛkas, ngɔn ɛ́ nɛ yɛ, ekwyikwyen ɛ́ nɛ yɔbɔ mɛkas. Tin, pak ekwyikwyen, mot nɛ mot ɛ́ nɛ yɛ mɛkas.

42 Yɛ aadi ɛ́ deenek é ghɛŋ bot ɛ zegwyɛ ɔ aagom ɛ. É ghɛŋ muu di edelaa ɛ, yɛ ɛ́ dáa bum le bɛ di ebɛ ɛ, ye nɛ gwyɛ. É ghɛŋ ye di egom ɛ, yɛ aanàkabaagwyɛ. 43 É ghɛŋ nyel di edelaa ɛ, ye tokapɛ dhiiti vaŋ sonok. É ghɛŋ ye di egom ɛ, yɛ aakadi ɛ́ nɛ ghwyil nɛ duma. 44 É ghɛŋ ye di edelaa ɛ, yɛ ɛ́ nyel epuud ɛ́ di edelaa. Nyel epuud delaa ɛ́ tyee wat dáa bɛ di ebɛ bhek ɛ. É ghɛŋ nyel epuud di egom ɛ, yɛ aadi ɛ́ nyel sisim. Tin, yɛ ɛ́ nɛ nyel epuud nɛ nyel sisim. 45 Deenek, Ekwyala lɛɛ ɛ́ náá: «Adam mot nakusaa é mɛkɛn ɔ nabɛ ɛ́ mot epuud nadi nɛ tsik✝ɔ.» Tin, Adam mɛsik ɛ́ mot Sisim di edjɛ tsik ɔ. 46 Ye tok nyel sisim di ezyɛ sok, yɛ ɛ́ nyel epuud ɛ di ezyɛ sok. Bhii tak, nyel sisim ɛ́ kazyɛ. 47 Mot mɛkɛn nakusaa ɛ́ nɛ bɔs, mot bhɔɔba kadus ɛ́ pɛ tɔ gwoo. 48 Bot ɛ di kɔ ɛko ɛ bɔs ɔ, bɛ ɛ́ tyee wat nɛ mot nakusaa nɛ bɔs ɔ. Bela náá, bot ɛ di pɛ tɔ gwoo ɔ, bɛ ɛ́ tyee wat nɛ mot nadus pɛ tɔ gwoo ɔ. 49 Tin, yɛ ɛ́ tyee wat nɛ menabɛlka, bot ɛ́ di embaŋa-mbaŋa mot nakusaa nɛ bɔs ɔ. Deenek, yɛ ɛ́ tyee wat, mena aadika embaŋa-mbaŋa mot nadus pɛ tɔ gwoo ɔ.

50 Bɔn-nyɛɛg, gwakeka sa mɛ di ekwyɛl ɛlɛɛ ɛ. Sa nakusaa nɛ epuud nɛ ghiya ɛ, ye tok nɛ ghwyil ɛ́ bela di tɔ Ɛyoŋ ɛ Zɛɛb. Tin, sa di náá, yɛ waagwyɛ ɛ, ye tok nɛ ghwyil ɛ́ bela tsik na kɔm-kɔm.

51 Gwakeka, mɛ lɛɛ bin sa di tɔ sɔ ɛ. Tin, menabɛlka djas aanàkwaagwyɛka, menabɛlka djas ɛ́ waaswoolaka. 52 Yɛ aasael é mɔɔ ɛwala batsa, ààbɔya tyee dis di ebwaaba é bhwoob, é ghɛŋ tɔŋ aalɔɔ-lɔɔa mɛsik ɛ. É ghɛŋ yɛ aalɔɔ ɛ, bot ɛ́ nazegwyɛ ɔ waagom, bɛ neebela tsik na kɔm-kɔm. Tin, Zɛɛb ɛ́ waaswoola menabɛlka bot aalik nɛ tsik ɔ. 53 Tin, nyel di náá, yɛ ɛ́ nɛ ghwyil ɛpulel ɛ́, ye goka ɛ́ nɛ ɛswoolaa, étɛp ye needi ààpulel. Nyel di nɛ ghwyil ɛgwyɛ ɛ, ye goka ɛ́ nɛ ɛswoolaa, étɛp ye needi ààgwyɛ. 54 É ghɛŋ, ye di náá, sa di nɛ ghwyil ɛpulel ɛ eebɔt sa di ààpul ɛ, deenek, sa di náá, yɛ waagwyɛ ɛ eebɔt sa di ààgwyɛ ɛ. Tin ɛ, sa Ekwyala di elɛɛ náá: «Ɛsyee aanàbaadi tak, eghɛŋ eebela di kɔ lɛ» eebela ɛsuk.

55 «Wɔy ɛsyee, eghɛŋ bɔ moo wo?

Wɔy ɛsyee, ghwyil’ɔ yii ɛgó ɛ bot moo wo* v. 55: Oze 13.14.?»

56 Ɛsyee bela ghwyil ɛgó ɛ bot ɛ́ tɔ syem. Tin, syem kabela ghwyil ɛ́ tɔ etsi. 57 Deenek, bhɔɔ nɛ Zɛɛb, mot di edjɛ mena ghwyil ɛkwak ɛsyee kɔ ɛsu ɛ Ghɛŋ’enaka Yezu Klisto ɔ!

58 Bɔn-nyɛɛg bam mɛ di ekwyɛl dhaa tyɛ ɔ, dika nɛ mɛghaaz, da bi ɛ́ lyel bham! Saka mɛsa ɛ Ghɛŋ ɛnyɔɛpe. Bi goka ɛ́ nɛ gu náá, mezuk mɛ bi di ebee tɔ mɛsa ɛ Ghɛŋ ɛ, yɛ aanàgwyɛ toto.