1 Bhis yenek, Pɔl eezɛtɔ́ pɛ ghaada Atɛn bhii tak, nyɛ eezɛtɔ́ pɛ ghaada Koolɛt. 2 Wɔ gwaa, nyɛ zɛboma nɛ dhiiti mot mbyak eYuda, din ɛ mot tak nabɛ ɛ́ Akilas, nyɛ nabyel ɛ́ pɛ kyee dik Pɔŋ. Nyɛ nabɛ ɛ́ nyɛ dinaa ààbɔya nɛ dus ɛ pɛ kyee dik Itali bɛ nɛ myɛl Pilisil, etɛɛ náá, Kolood, mɛkoozi mɛ Lɔm, naalɛɛ nɛ bot ɛ mbyak eYuda djas náá, bɛ dus kɔ ghaada Lɔm. Tin, Pɔl zokatɔ́ kɛboma nɛ nɔɔ. 3 Nyɛ nadi esa mɛsa mɛ wat bɛ nɛ bɛnɔɔ, mɛsa mɛ tak nadi ɛ́ ɛsum ɛ bɔɔ epɛt nɛ eket e bɛtit. Nyɛ naazɛsulal pɛ daa lɔɔ, étɛp nyɛ neesa mɛsa. 4 É mɛlu mɛ esaba djas, Pɔl nadi elii tɔ ndjaa mendjaala mɛ eYuda, nyɛ nadi elyo bot, nyɛ nadi esaŋ ɛ náá, bot ɛ mbyak eYuda nɛ yii eGhɛlɛk dum koŋ nɛ Zɛɛb.

5 Dáa Silas bɛ nɛ Timote nadus pɛ dik Masedwan ɛ, tin, Pɔl eezɛdjɛ lyem’ɛ djas tɔ ɛlyo bot Mɛkpa ɛ Zɛɛb. Nyɛ naalyaal eYuda náá, Yezu ɛ́ Mɛsia. 6 Wɔ gwaa, eYuda zɛbe mɛso nɛ ɛlee ɛ́ nyɛ. É di’enek, nyɛ eezɛkut bɛ piib ekaad bɛ, bhii tak, nyɛ eezɛke nɛ nɔɔ náá: «Bi ɛ wo ze ɔɔ, mɛbɛ mɛ tak aadi ɛ́ kɔ elo e bin, biyɔ bɛmet. Yenek ààkagwyák mam. É ɛwala ɛlak, mɛ aakatɔ́ ɛ́ pɛ daa bot ɛ membyak mɛ sis.» 7 Nyɛ eezɛdus tin, tɔ́ pɛ daa dhiiti mot, din ɛ lɛ nabɛ ɛ́ Titus Yustus, mot tak nadi eduwal Zɛɛb, ndjaŋ’ɛ nadi ɛ́ é ngwoob ndjaa mendjaala mɛ eYuda. 8 Kilipus kukuma ndjaa mendjaala mɛ eYuda zokamyaal Ghɛŋ, bɛ nɛ bot ɛ mɛbyel mɛ djas. Wɔ gwaa bɛtɛ nɛ bot ɛ ghaada Koolɛt nadi egwak Pɔl ɔ, zokazɛdum koŋ nɛ Zɛɛb, bhii tak, bɛ naakɛduwa Zɛɛb.

9 É dhiiti pum, Pɔl zokazɛdjem dhyam, tɔ dhyam tak, Ghɛŋ nalɛɛ nyɛ ɛ́ náá: «Nàbem ba, gheelii, sa wɔ ààdiyal nuub, 10 etɛɛ náá, mɛ ɛ́ nɛ nɔ sama, mot tok nɛ ghwyil ɛzuk wɔ, etɛɛ náá, bot ɛbuɛpe tɔ ghaada yak ɛ́ bot bam.» 11 Pɔl zokazɛdi kɔ ghaada Koolɛt tyee mbu wat nɛ pes, nyɛ nadi elyo bot djas Mɛkpa ɛ Zɛɛb.

12 É membu mɛ Ghaliɔn nadi kukuma dik Akayi ɛ, eYuda zokazɛgwakel étɛp ɛmet ɛ́ Pɔl. Wɔ gwaa, bɛ zɛtɔ́ nɛ nɛ di di epɛ́ɛaa etɛp ɔ, 13 bɔɔ náá: «Mot’ak ɛpeful bot lo náá, bɛ duwal Zɛɛb dhiiti mbi duwala sis, ààbɛ dáa etsi di elyo ɛ!» 14 Dáa Pɔl nawaadi ekwyɛl ɛlii ɛ, Ghaliɔn eezɛbɔɔza nɛ eYuda náá: «Yɛ bɛ náá, nyɛ eesa boo tɛp ɔɔ, nɛghu nyɛ eesa eboo embee etɛp ɔɔ, yɛ ɛ́ mɛ kanɔɔ nyel disi étɛp mɛ neegwak bin, biyɔ eYuda. 15 Dáa ye di náá, yɛ ɛ́ ɛsuu ɛ mɛso dum nɛ mɛkpa, nɛ min, zɛnɔɔ etsi bin met ɔ, yenek gwyák ɛ́ biyɔ bɛmet. Mɛ eepɛɛ ɛdi ɛ́ tetɛp embi etɛp deenek!» 16 Tin, nyɛ ɛ́ boozɛswaal bɛ sok bhwoob zɛɛga bɛtetɛp. 17 Tin, wɔ gwaa bɔɔ djas zɛmɛt Sɔstɛn, mot nadi kukuma ndjaa mendjaala mɛ eYuda ɔ, zɛduma nyɛ é nyel é mis mɛ bot ɛ zɛɛga bɛtetɛp. É di’enek, Ghaliɔn nabɛ ɛ́ ààkobis yɛ.

18 Pɔl eebaazɛdhaa ba bim mɛlu ɛbuɛpe pɛ kɔ ghaada Koolɛt. Tin, nyɛ eezɛlik bɔn-nyɛɛg, nyɛ eeni tɔ mɛsuwa tɔ́ pɛ dik Siili, nɛ Pilisil, bɛ nɛ Akilas. Ye nabɛ ɛ́, nyɛ eezewaadal lo ɛboŋ é sok nyɛ nadi pɛ dɛl ɛ Sɛɛkele ɛ, etɛɛ náá, ye nabɛ ɛ́, nyɛ eesa ekɛk nɛ Zɛɛb. 19 Wɔ gwaa, bɛ zɛkum pɛ ghaada Efɛɛz. Tin, nyɛ eezɛlik Pilisil bɛ nɛ Akilas. Bhii tak, nyɛ eezɛtɔ́ pɛ ndjaa mendjaala mɛ eYuda, tin nyɛ eezɛmɔ bɛ nɛ eYuda. 20 Bɛ eezɛke nɛ nɛ náá, nyɛ di bɛ nɛ bɛnɔɔ ba mɛlu, tin, nyɛ nabɛ ɛ́ ààkwyɛl. 21 Nyɛ eezɛlik bɛ, nyɛy nɛ nɔɔ náá: «Zɛɛb ɛ kwyɛl ɔɔ, mɛ waaboobaazyɛ pɛ daa len.» Tin, nyɛ eezɛdus pɛ Efɛɛz tɔ mɛsuwa. 22 Bhii nyɛ nadus pɛ ghaada Sezaale ɛ, nyɛ eezɛtɔ́ sok pɛ Yeluzalɛm, étɛp nyɛ neekɛswos bot ɛ zɛɛga mendjaala. Bhii tak, nyɛ eezɛtɔ́ pɛ ghaada Antiɔs. 23 Nyɛ eezɛkwyɛɛg ba mɛlu penek, bhii tak nyɛ eezɛsik. Nyɛ eezɛdhaa pɛ mɛdhik mɛ Ghalasi, bhii tak, pɛ Fiilizi edje-djɛ bɛdjekel djas mɛghaaz tɔ ɛdum ɛ koŋ nɛ Zɛɛb.

24 É ghɛŋ tak, dhiiti mot mbyak eYuda, din ɛ lɛ nabɛ ɛ́ Apolɔs, nyɛ nabyel ɛ́ pɛ ghaada Alɛkzandili, nyɛ naazɛkum pɛ ghaada Efɛɛz. Nyɛ nadi ɛ́ tsoŋ mot tɔ lii, nyɛ nadi egu Ekwyala e Zɛɛb ɛnyɔɛpe. 25 Nyɛ naadyeebadjek ɛkɛ tɔ mɛkpa mɛ Ghɛŋ, nɛ ɛwa zii ɛbuɛpe. Nyɛ nadi egoola, nɛ ɛlyo ɛ bot nɛ lyem wat etɛp ee di edum nɛ Yezu ɛ. Ye kabela ɛ́ náá, nyɛ nazodi egu ɛ́, ɛduwa ɛ Zɛɛb ɛ Zaŋ. 26 Nyɛ eezɛni elii nɛ bot nɛ ɛbwaalel djas tɔ ndjaa mendjaala mɛ eYuda. Bhii bɛ nasilal ɛgwak etɛp ee nyɛ nadi elii ɛ, Pilisil bɛ nɛ Akilas eezɛnɔɔ nyɛ, tɔ́ nɛ nɛ lɔɔg wat, étɛp bɛ neekɛpɛs ɛgu ɛ lɛ dum nɛ mɛze ɛ Zɛɛb ɛnyɔɛpe. 27 Bhii tak, Apolɔs eezɛgwak gwyes ɛ́ ɛtɔ́ pɛ dik Akayi. Bɔn-nyɛɛg zokadjɛ nyɛ ghwyil nɛ mɛghaaz, tin, bɛ eezɛkwyal bɛdjekel ɛ nadi pɛ kyee dik tak ɔ mɛkana, étɛp bɛ neemyaal nɛ mbɛɛ lyem náá, nyɛ sulal pɛ daa lɔɔ. Dáa nyɛ nakakum ɛ, nyɛ naadyeebakwyee bot ɛ nadum koŋ nɛ Zɛɛb ɔ, nɛ ghwyil enɛm nɛ embɛɛ e Zɛɛb. 28 Etɛɛ náá, é mis mɛ bot djas, nyɛ nadi elyaal popoopwon náá, eYuda eezewo ze. Nyɛ nadi elyaal bɛ tɔ Ekwyala e Zɛɛb náá, Yezu ɛ́ Mɛsia.