Atos 22

1 «Bɔn-nyɛɛg bam nɛ bɛsɛɛg bam, gwakeka sa mɛ di elɛɛ bin nenak dum nɛ yam taŋal ɛ.» 2 Dáa bɛ nadi egwak, dáa nyɛ nadi elii tɔ lii eBhele ɛ, bɛ eebaazɛdi gwyem ɛnyɔɛpe, tin, Pɔl eezɛke náá: 3 «Mɛ ɛ́ mot mbyak eYuda, mɛ nabyel ɛ́ pɛ Taalas pɛ kyee dik Silisi, deenek mɛ nawyilaa ɛ́ wak kɔ Yeluzalɛm. Deenek, lyoel yam nabɛ ɛ́, Ghamalyɛl, nyɛy ɛ́ nalyaal mɛ ɛtiibal etsi e bɛbhaab benaka ɛnyɔɛpe. Mɛ nabɛ ɛ́, mɛ naakwyɛl mɛsa mɛ Zɛɛb dhaa nyel, dáa biyɔ djas di ekwyɛl mos’aak. 4 Mɛ naawa bot ɛ nadi edu mɛze ɛ Ghɛŋ ɔ tɔ tsik mezuk, batakɛgó bɛ góak. Mɛ eemɛt boa nɛ botom, wa bɛ é membok. 5 Boo ghaa-zɛɛb nɛ bot ɛ kwan, nɛ bɛpaŋ ɛ́ nɛ ghwyil ɛ́ di bɛtyaasɛs náá, etɛp ee mɛ di elɛɛ ɛ, yɛ ɛ́ tsɛɛtsɛ. Ye nabɛ ɛ́, bɛ naadjɛ mɛ mɛkana mɛ ɛtɔ́ pɛ daa bɔn-nyɛɛg bam yii ghaada Dhamas, deenek, mɛ naatɔ́ pɛ ghaada tak. Mɛ nadi ekwyɛl ɛ́ kɛmɛt bot ɛ nadi penek ɔ, étɛp mɛ neetɔ́ nɛ nɔɔ kɔla, pɛ Yeluzalɛm, bɛ neekɛwaaa é feŋ.»

Pɔl ɛpebaŋa dáa nyɛ naliig lyem ɛ

6 «Mɛ nadi ɛ́ gba-gba mɛ moo ekunaa nɛ ghaada Dhamas, ye nabɛ ɛ́ ye moo ekunaa nɛ kuku mwos. Wɔ gwaa, boo ngel zɛdus tɔ gwoo, mɛkas tak zokazɛkaal mɛ. 7 Tin, mɛ eezɛduma si, é di tak mɛ kagwak ɛ́ dhiiti gwood é ke nɛ nam náá: "Sɔl, Sɔl, étɛp yé wɔ di etiig mɛ?" 8 Tin, mɛ eezɛdji náá: "Wɔy ɛzɛ, Ghɛŋ?" Gwood’enek eezɛbɔɔza náá: "Yɛ ɛ́ mam Yezu mot Nazalɛt, wɔ di etiig ɔ." 9 Bot ɛ nadi egyee nɛ nam ɔ naabee ngel, saabɛgɔs kabɛ ɛ́ náá, bɛ nabɛ ɛ́, ààgwak gwood mot nadi elii nɛ nam ɔ. 10 Tin, mɛ eezɛdji náá: "Mɛ goka nɛ ɛsa dáa, Ghɛŋ?" É di’enek, Ghɛŋ eezɛke nɛ nam náá: "Wyɛla, tɔ́a pɛ ghaada Dhamas. Yɛ ɛ́ penek ɛ bɛ aalɛɛ wɔ esa ee Zɛɛb ke náá, wɔ sa ɛ." 11 Dáa ye nabela náá, mɛkas mɛ ngel tak naadipal mɛ mis ɛ, bot ɛ nadi egyee nɛ nam ɔ, ɛ́ boozɛmɛt mɛ é mbɔ, bɛ ɛ́ boozɛtɔ́ nɛ nam pɛ Dhamas.

12 Kɔ ghaada tak, ye nabɛ ɛ́ nɛ dhiiti mot ngɔt, din ɛ lɛ nabɛ ɛ́ Ananias, mot epiki nɛ esosoob tɔ etsi bena. Bot ɛ mbyak eYuda e Dhamas djas nadi eduwal nyɛ ɛbuɛpe. 13 Nyɛ eezɛboma nɛ nam, nyɛ eezɛtyaa é ngwoob’am, nyɛ eezɛke nɛ nam náá: "Sɔl, mɔn-nyaagam, mis mɔ bɛŋel!" É di tak wat, mis mam eezɛbula ɛnyɔɛpe, bhii tak, mɛ eezɛbee nyɛ. 14 Deenek, nyɛ eezɛbaakɛl náá: "Zɛɛb bɛbhaab binaka naazesɛ́ɛ wɔ, étɛp wɔ neegu ɛkwosak ɛ lɛ, wɔ neebee sim Mot Epiki, da wɔ ɛ́ gwak gwood’ɛ met, 15 etɛɛ náá, wɔ needi tyaasɛs’ɛ, étɛp wɔ neegoola nɛ bot djas sa wɔ bee ɛ, nɛ yii wɔ gwak ɛ. 16 Tin, nenak wɔ kabaabwood yé? Wyɛla, kɛduwa Zɛɛb nɛ ɛgwyii ɛ mesyem mɔ, é ɛdjóo ɛ́ din ɛ lɛ."»

Pɔl ɛpebaŋa dáa nyɛ nalwomaa pɛ daa bot ɛ membyak mɛ sis ɛ

17 «Mɛ eezɛsik pɛ Yeluzalɛm. Dáa mɛ nadi edjaala Zɛɛb pɛ tɔ kok Ndjaa-ebuwa ɛ, wɔ gwaa, mɛ zɛbee tyee tɔ dhyam. 18 Tin, mɛ eezɛbee Ghɛŋ, nyɛy nɛ nam náá: "Lela ɛdus kɔ Yeluzalɛm, etɛɛ náá, bot ɛ dɛl ɛ tak aanàkwaamyaal etɛp ee waalɛɛ bɛ, kɔ ɛsu ɛ lam ɛ." 19 Mɛ eezɛbɔɔza náá: "Ghɛŋ, bɛ nɛ gu náá, mɛ nadi etetɔ́ tɔ mendjaa mɛ mendjaala mɛ eYuda, étɛp ɛkɛmɛt bot, wa bɛ é membok nɛ ɛbi ɛ́ bot ɛ nadi edum koŋ nɛ nɔ ɔ. 20 Tin, é ghɛŋ bɛ nagó Etiɛn, tyaasɛs’ɔ ɛ, mam pe mɛ nadi ɛ, é di tak. Mɛ naamyaala nɛ bot ɛ nagó nyɛ ɔ, mɛ naabaal ekaad bɔɔ." 21 Tin, Ghɛŋ eezɛke nɛ nam náá: "Tɔ́a, etɛɛ náá, mɛ waakyeed wɔ ɛtsetaɛpe, pɛ daa bot ɛ membyak mɛ sis!"»

Pɔl bɛ nɛ komanda nadi mot kyee dik Lɔm

22 Ɛdhuu ɛ bot binɔk zokagwak Pɔl kɛkum é di’enek. Bhii tak, bɔɔ djas eezɛni é tsim: «Nyɛ góaa, mbi mot dáak ààgoka nɛ ɛdi nɛ tsik kɔ bɔs’ak!» 23 Bɛ nadi etsim, nɛ ɛwus ɛ́ ekaad bɔɔ pɛ ɛko, nɛ ɛghɛɛ piib, wus pɛ ɛko. 24 Tin, komanda nadi mot kyee dik Lɔm eezɛlwom náá, bɛ niigal Pɔl tɔ ɛbɛsɛɛ ndjaa esodja, da bɛ ɛ́ nyuu nyɛ nɛ eghwyɛs, étɛp nyɛ neetaŋal nɛ bhel. Nyɛ nasa deenek ɛ́, étɛp bɛ neegu lo mɛsɔ mɛ mɛdhuu mɛ bot nadi etsim deenek kɔ ɛsu ɛ lɛ ɔ. 25 Tin, dáa bɛ nakɔl nyɛ étɛp bɛ neenyuu nyɛ ɛ, Pɔl eezɛke nɛ dhiiti kukuma tɔ lɔɔg esodja nadi tin ɔ náá: «Bi ɛ́ nɛ gham ɛbi ɛ́ mot ghaada kyee dik Lɔm di náá, nyɛ dinaa ààpapɛ́ɛaa ɔ?» 26 Dáa kukuma esodja tak nagwak mɛkpa menek ɛ, nyɛ ɛ́ bootɔ́ kɛdul komanda mɛlɔ: «Nyɛ ɛ́ eezɛke nɛ nɛ náá, wɔ kwyɛl ɛsa yé? Mot’ak ɛ́ mot dik Lɔm!» 27 Tin, komanda eezɛzyɛ pɛ pak Pɔl nadi ɛ́, nyɛ eezɛdji nyɛ náá: «Lɛɛa mɛ, yɛ ɛ́ tsɛɛtsɛ náá, wɔ ɛ́ mot ghaada kyee dik Lɔm é?» Pɔl eezɛmyaal náá: «Iyooo». 28 Tin, komanda esodja eezɛke náá: «Mam naadjɛ boo mɛtaŋ mɛ epata étɛp mɛ needi mɔn dɛl ɛ Lɔm.» Pɔl eezɛbɔɔza nɛ nɛ náá: «Yam ɛ́ yii mbyela mɔ.» 29 É di tak wat bot ɛ nadi ekwyɛl ɛbi nyɛ étɛp bɛ neebesal nyɛ, nyɛ lii nɛ bhel ɔ, bɛ eezɛbula pɛ bhis, ɛtsetaɛpe nɛ nɛ. Tin, komanda esodja naazɛgwak bwoo, dáa nyɛ nagu náá, Pɔl nabɛ ɛ́ mot kyee dik Lɔm ɛ, bela náá, nyɛ naazelwom náá, nyɛ kɔlaa nɛ eghwooz.

Pɔl sok bhwoob zɛɛga ekukuma e boo kwan eYuda

30 Komanda esodja nadi ekwyɛl ɛgu ɛnyɔɛpe lo mɛsɔ mɛ eYuda nadi epit Pɔl ɛ. Étɛp tak ɛ di náá, djɛmɛn yii ɛlu ɛ tak, nyɛ eezɛlwom náá, bɛ tii nyɛ ekel e eghwooz ee nyɛ nakɔlaa nɛ yɛ ɛ. Nyɛ eezɛdjóo eboo bɛghaa-Zɛɛb, zɛnɔɔ zɛɛga ekukuma e boo kwan eYuda. Bhii tak, nyɛ eezɛzyɛ nɛ Pɔl, tin, nyɛ eezɛpɛ́ɛaa é mis mɔɔ.