1 Tora ma s-apruchea sãrbãtorea a Adzãmilor, tsi s-acljeamã Pashti. 2 Mãrlji a preftsãlor shi scriblji cãfta cum s-lu vãtãma Isusul, ma avea fricã di populu. 3 Atumtsea, Satanlu intrã la Iuda, acljimat Iscariotul, cai eara un di doisprãdzatslji. 4 Elu s-dusi si zbura cu arhipreftsãlji sh-mãrlji a vigljitorilor tu templu cã, cu tsi ilei va lu pridãdea Isusul. 5 Elji s-hãrsirã shi lj-dzãsirã cã va l-plãteascã. 6 Ashãtsi Iuda deadi zborlu sh-ashtipta oara s-lu pridãdea tu mãnjili a lor sh-ascumtu di multsãmea.

7 Vini dzua a Adzãmilor, sh-prindea s-fãtsea curban njelu di Pashti. 8 Isusul pitricu Petrul sh-Ioanul sh-lã dzãsi: "Dutsets-vã sh-ndridzets Pashtili, tra s-mãcãm." 9 Elji lu ntribarã: "Iu ts-arãseashti s-ndridzem?" 10 Atumtsea Isusul lã dzãsi a lor: "Ia, cãndu s-intrats tu cãsãbã, va s-vã easã nãinti un om tsi tsãni un stamnã cu apã. Njidzets dupã nãsu tu casa iu va intrã elu. 11 Dzãtsets a nicuchirlui a casãljei: ‘Nvitsãtorlu vã-ntreabã: Iu easti udãlu tu cai pot s-mãc Pashtili deadun cu ucenitsilji a melji?’ 12 Atumtsea elu va s-vã aspunã un salã mari ashtirnutã di nsus. Aclo s-ndritsets!" 13 Elji neasirã sh-aflarã itsido ashã cum lã dzãsi Isusul sh-u ndreapsirã trã Pashti.

14 Cãndu vini oara, Isusul shidzu la measã deadun cu doisprãdzatsi apostulji. 15 Atumtsea elu lã dzãsi a lor: "Am avut multu vreari s-mãcam aestu Pashti deadun cu voi, nãinti tsi s-mi munduescu. 16 Ma vã dzãc cã nu va s-mãcã ma altu Pashti, pãnã cãndu si mplineascã atsea tu amirãriljea a Dumnidzãlui." 17 Deapoea lo cupa, hãristisi sh-dzãsi: "Loats aestu sh-mpãrtsãts-lu namisa di voi. 18 Mini ma vã dzãc cã nu va s-beau ma di frutlu a-ayinjãljei pãnã cãndu s-yinã amirãriljea a Dumnidzãlui." 19 Deapoea lo pãnea, hãristisi, u frãmsi sh-lã-u deadi a-lor dzãcãnda: "Aestã easti truplu a meu, tsi s-da trã voi. Fãtsets-u aestã tra s-mi adutsets aminti mini!" 20 Ashãtsi featsi sh-dupã tsinã, lo cupa sh-dzãsi: "Aestã cupã easti pisti-ligãtura atsea noaua tu sãndzili a meu, tsi s-vearsi trã voi. 21 Ma ia, mãna atsilui tsi mi vindi, easti cu mini la measã. 22 Hiljilu a Omlui s-dutsi ashã cum easti arãdãpsitã trã nãsu, ma cavai di omlu tsi lu vindi!" 23 Atumtsea elji apãrnjirã si s-ntreabã cu un-alantu cã cai di elji poati s-hibã atsel tsi va s-facã aestã.

24 Namisa di elji apãrnji unã ncãceari cã cai di elji prindi s-hibã ma marli. 25 Atumtsea Isusul lã dzãsi a lor: "Amiradzlji a natsiunilor domnescu pri nãshi sh-atselji tsi au autoritati pristi nãshi s-acljeam ghini-fãcãtori. 26 Cu voi nu prindi hibã ashãtsi. Ma marli di voi s-hibã ca atsel ma njiclu, sh-caplu ca atsel tsi huzmitipseashti. 27 Cai easti ma mari, atsel tsi sta la measã, ama atsel tsi chirniseashti? Vahi nu easti atsel tsi sta la measã? Ma mini escu tu mesea a voastrã trãsh ca atsel tsi chirniseashti. 28 Voi hits atselji tsi stãturã cu mini tu provãli a meali. 29 Ashãtsi mini vã dau unã amirãrilji ashã cum nji-u deadi a njia Tatãl a meu, 30 tsi voi s-mãcats shi s-bets la measa a mea tu amirãriljea a mea. Voi va s-shidets pri thronuri giudicãnda di doisprãdzatsi fãrili al Israel."

31 Atumtsea Domnul dzãsi: "Simon, Simon, ia Satanlu ari cãftat s-vã ntsearnã ca grãnul. 32 Mini mi am rugat trã tini, Simon, tsi pistipsirea a ta s-nu s-ascapã, sh-tini cãndu s-ti tornji, nvãrtusheadzã fratslji a tãlji." 33 Petrul lj-dzãsi: "Doamne, mini escu etimu s-mi duc deadun cu tini tu hapsi sh-tu moarti." 34 Isusul lj-dzãsi: "Petro, mini ts-dzãc cã azã cucotlu nu va cãntã, nãinti tsi tini s-mi aleapidz di trei ori cã mi cunoshti mini." 35 Deapoea lã dzãsi a lor: "Cãndu vã pitricui fãrã pungã, fãrã trastu sh-fãrã sandali, vã lipsi tsiva?" Sh-elji apãndisirã: "Tsiva." 36 Deapoea elu dzãsi: "Ma tora cai ari unã pungã si-u ljea cu nãsu, tutashã sh-trastu. Cai nu ari, s-vindã stranjilu a lui shi s-acumpãrã unã spatã. 37 Mini ma vã dzãc cã tsi easti scriatã prindi si mplineascã tu mini: ‘Sh-elu easti numirat ca arãu-fãcãtor.’ Cã atseali tsi suntu scriati trã mini va s-aibã bitisita a lor."✝ 38 Atumtsea elji dzãsirã: "Doamne, ia, aoa suntu doauã spãtsi." Ma elu lã dzãsi a lor: "Nimal!"

39 Deapoea Isusul ishi ca totãna shi dusi pri muntili a Masnjilor, sh-ucenitsilji a lui s-dusirã dupã nãsu. 40 Cãndu agiumsi tu atsel loc, lã dzãsi a lor: "Rugats-vã tra s-nu cãdets tu cãrteari." 41 Apoea s-dipãrtã di elji, cãt unã arucãturã di cheatrã sh-cãdzu pri dzinuclji shi s-ruga, 42 dzãcãnda: "Tate, ma s-vrei, dipãrteadz-u aestã cupã di la mini! Cu tut atsea, s-nu si s-fac vrearea a mea, ma a ta." 43 Atumtsea s-aspusi un anghil dit tser tra s-lji da fuchii a lui. 44 Ashãtsi elu hiinda tu sicleti, s-ruga sh-ma multu. Asudoarea a lui s-featsi ca chicutã di sãndzi tsi cãdea mpadi. 45 Deapoea si sculã di la rugãciuni vini la ucenitsilji a lui sh-lji aflã durnjinda acurmats di nvirinarea. 46 Atumtsea lã dzãsi: "Cãtse ma durnjits? Sculats-vã sh-rugats-vã tra s-nu cãdets tu cãrteari!"

47 Cãndu elu ma zbura ninga, vini unã multsãmi. Atsel tsi s-acljima Iuda, un di doisprãdzatsi, imnãnda nãinti, lji s-apruche al Isus tra s-lu bashi. 48 Isusul lj-dzãsi: "Iuda, cu bãshari tini ma vindzi Hiljilu a Omlui?" 49 Atumtsea atselji di anvãrliga di nãsu, vidzãnda cã tsi va s-undzea, l-u ntribarã: "Doamne, s-lji agudim cu spatã?" 50 Un di elji agudi cu spatã huzmichearlu a arhipreftlui shi lj-tãlje ureaclja atsea ndreapta. 51 Isusul lã dzãsi: "Nimal ashãtsi!" Bãgã mãna la ureaclja a lui sh-u vindicã. 52 Deapoea Isusul lã dzãsi a arhipreftsãlor, a vigljitorilor a templui sh-a aushlor tsi avea vinit trã nãsu: "Avets ishit trã mini cu spãtsi sh-cu ciumãdzi ca contra a unui fur? 53 Cathi dzuã mini earam cu voi tu templu, voi nu mi acãtsat. Ma aestã easti oara a puteariljei di scutidi."

54 Dupã tsi lu acãtsarã Isusul, lu dusirã la casã a arhipreftlui. Iarã Petrul lu urma di diparti. 55 Aclo elji apreasirã un foc tu mesea a uborlui shi s-apunarã deadun. Petrul s-apunã cu elji. 56 Unã huzmichearã vidzu Petrul apunatã ningã foc sh-mutrinda cãtrã nãsu lj-dzãsi: "Sh-aestu eara cu nãsu." 57 Ma elu alipidãnda lj-dzãsi: "Muljeari, nu l-cunoscu." 58 Dupã putsãn chiro un altu l-vidzu Petrul sh-lji dzãsi: "Sh-tini eshti di atselji." Iarã Petrul dzãsi: "Om, nu escu." 59 Dupã unã oarã di chiro, un altu ipiminisi: "Dealihea cã sh-aestu eara deadun cu nãsu, cã easti Galilean." 60 Ma Petrul lj-dzãsi: "Om, nu shtiu tsi dzãtsi!" Tu atsea oarã, cãndu elu ninga ma grea, cãntã cucotlu. 61 Atumtsea Domnul s-turnã sh-vidzu cãtrã Petrul. A Petrului lj-vinirã tu minti zboarili tsi lj-avea dzãsã Domnul: "Nãinti tsi s-cãntã cucotlu azã, tini va mi aleapidz di trei ori." 62 Atumtsea Petrul ishi afoarã sh-plãmsi cu amãreatsã.

63 Oaminjlji tsi l-vigljea Isusul lu pizuea sh-lu bãtea. 64 Elji lji ncljisirã ocljilji sh-lu ntriba dzãcãnda: "Prufitipsea, cai ti agudii?" 65 Blãstimãnda dzãtsea multi zboari greali contra a lui. 66 Cãndu s-featsi dzuã, s-adunarã deadun aushlji a popului, arhipreftsãlji sh-scriblji sh-lu dusirã Isusul tu sinedriul a lor, 67 dzãcãnda: "Macã tini eshti Hristolu, dzã-nã!" Ma elu lã dzãsi: "Sh-ma s-vã dzãc, nu va s-mi pistipsits. 68 Sh-ma s-vã ntribam, voi nu va nj-dãdeat apandisi. 69 Di tora sh-nclo Hiljilu a Omlui va sheadã tu nandreapta al Dumnidzãu puternic." 70 Atumtsea tuts dzãsirã: "Eshti tini Hiljilu a Dumnidzãlui?" Elu lã dzãsi a lor: "Voi ma dzãtsets cã mini escu." 71 Atumtsea elji dzãsirã: "Trã tsi altã mãrtirii avem ananghi? Noi idyilji u-avdzãm di gura a lui."