Mateus 26

Planlu a Preftsãlor

1 Cãndu Isusul bitisi tuti aesti zboari, lã dzãsi a ucenitsilor a lui: 2 "Voi shtits cã dupã doauã dzãli easti Pashtili, sh-deapoea Hiljiu a Omlui va s-prida ti crutsisiri." 3 Atumtsea mãrlji a preftsãlor, sh-aushlji a popului s-adunarã tu uborlu a arhipreftlui tsi s-acljima Caiafa. 4 Sh-apofãsirã s-lu acãtsa Isusul cu tirtipi shi s-lu vatãmã, 5 ma dzãtsea: "Nu tu sãrbãtoari, tra s-nu s-facã vãrã mintiturã tu popul."

Uspetsi tu Betania

6 Cãndu Isusul eara tu Betania, tu casa al leproslu Simon, 7 s-apruche unã muljeari cu un vas di alabastru cu untulem di njir multu scumpã, shi lji-lu virsã pri caplu a lui, cãndu elu ma shidea ndupirat la measã. 8 Cãndu ucenitsilji a lui vidzurã aestã, s-nãrãirã shi ntribarã: "Cãtse tut aestu hãrgiuiri digeaba? 9 Aestu untulem, putea si s-vindea multã scumpu sh-pãradzlji si s-dea a niavutslor." 10 Ma Isusul lu achicãsi aestã sh-lã dzãsi a lor: "Cãtse u tulburatsã aestã muljeari? Ea featsi un lucru bun trã mini. 11 Cã oarfãnjlji va lji avets totãna cu voi, ma mini nu va mi avets totãna. 12 Cã, virsãnda aestu untulem njirusit pri truplu a meu, ea lu ndreapsi truplu a meu trã ngrupari. 13 Dealihea mini ma vã dzãc cã iutsido tsi va hibã predicat aestu evanghelu tu tutã lumea, va si aspunã cã tsi featsi aestã muljeari, trã amintirea a ljei."

Pridarea al Isus

14 Atumtsea un di atselji doisprãdzatsi, acljimat Iuda Iscariotul, s-dusi la mãrlji a preftsãlor, 15 sh-lã dzãsi a lor: "Tsi va nji dats tsi mini s-vã lu dau?" Sh-elji lj-misurarã treidzãtsi pãradz, di asimi. 16 Sh-di atumtsea elu cãfta oara s-lu prida.

Tsina a Pashtiljei

17 Tu prota dzuã a Adzãmilor, ucenitsilji s-apruchearã a Isusului sh-lu ntribarã: "Iu vrei s-ndridzem trã mãcari Pashtili?" 18 Sh-elu apãndisi: "Dutsets-vã tu cãsãbã la fileanu sh-dzãtsets-lji: ‘Nvitsãtorlu dzãtsi: Chirolu a meu easti aproapi. Va facã Pashtili la casa a ta deadun cu ucenitsilji a melji.’" 19 Atumtsea ucenitsilji featsirã ashã cum lã avea dimãndatã Isusul shi etimãsirã Pashtili. 20 Sh-cãndu ntunicã, elu shidzu la measã deadun cu doisprãdzatslji. 21 Cãndu ma mãca, dzãsi: "Dealihea mini ma vã dzãc, cã un di voi va mi vindã." 22 Elji si nvirinarã multu sh-cathiun di nãshi ahurhi s-dzãcã: "Nacã escu mini, Doamne?" 23 Sh-elu apãndisi: "Atsel tsi ari muljeatã deadun cu mini mãshcãtura tu cãtsãn, elu va mi vindã. 24 Ashã cum easti scriatã trã nãsu, Hiljiu a Omlui s-dutsi. Ma cavai di atsel om tsi prida Hiljiu a Omlui! Trã nãsu va eara ma ghini s-nu eara amintat pute." 25 Sh-Iuda, atsel tsi va lu pridea, lu ntribã sh-lji dzãsi: "Rabbi, nacã escu mini atsel?" Elu lji dzãsi: "Tini ma dzãtsi!" 26 Sh-iarã elji ma mãca, Isusul lo pãnea, u-ghinicuvãntã, u frãmsi, sh-u deadi a ucenitsilor a lui sh-dzãsi: "Loats shi mãcats, aestã easti truplu a meu." 27 Deapoea lo cupa, hãristisi, sh-u-deadi a lor dzãcãnda: "Bets di aestã tuts. 28 Aestu easti sãndzili a meu a pisti-ligãturiljei, tsi easti virsatã trã multsã trã ljirtarea a amãrtiilor.