Marcos 6

Yesu avalisile kyakula vanu elufu chianu

30 Vala vanjagila vakawuya vatang’ine na Yesu, vakamlongiye fyonda fyevagitile na kuwulanicha. 31 Yesu akavalongiye, "Tuhelele weka hela kyamfiyo, mkatulule ludodo." Alongile ndeni kwakuva kukali na vanu volofu hilo vangi vakwacha bahala pala na kuhega, mbaka Yesu na vachulila vake ata se vapatile nafwasi lya kuliya kyakuliya. 32 Suwe, vakahegile vavene kwa wato, vahelela pakifiyo. 33 Hata ifyo vanu vakavawene pevahega, vakachela. Suwe, vakahelela kwa magulu kuhuma kila mwani na vakalongue kufika. 34 Yesu peikile muwato, akaliwene lipinga likomi lya vanu. Avawonie lusungu kwakuva vakali ngita kondolo vahela mdimaji. Ndena akavanga kuvawulanicha makani gyongofu. 35 Palumie peifikile, vachulila va Yesu vakamuhelelie na kumlongela, "Poono ipa pakudasi na nalichuwa lidibala. 36 Uvaleke vanu vahelele kumigunda na pafijiji fya pepi vakajigulile kyakula." 37 Ila Yesu avalongie, "Muvagavile nyenye kyakula." Navo vakamuhuchile, Be! "Seulola kuva twitakilwa kuvecha na sendi cholofu cha kuvagulila vanu ava kyakula?" 38 Yesu akavahucha, "Mwinagyo mibumunda milinga? Muhelele tandi mkailole." Pevalolile, vakamwigile, "Gigehe mibumunda chianu na somba vavili hela." 39 Suwe, Yesu akavalagiche vachulila vake vavalongele vanu vonda vakale mulipinga lipinga, vakale panyi pa misoli. 40 Suwe, vanu vakakala mufipinga fipinga gya vanu miya yimwi na gya vanu hamusini. 41 Pambele Yesu kainyamula mibumunda gila mihanu na somba vavili. Kalola kuluhano, akahongecha na kugifunya na kuiketula gila mibumunda. Pambele kavagavila vachulila vake neke vavagavile vanu vonda. Na vala somba vavili wavagavile vanu vonda. 42 Vanu vonda vakalie na kwiguta. 43 Vachulila va Yesu vakaholasa fibumunda na fisomba gyesigile vaka memecha findilo kumi na chivili. 44 Vanu vonda vewaliye vagosi vakali elufu chianu, se vavalilwe vadala na vana.