उबजाणनी किताप 21

इसाकेन पयदावारी

1 यहोवा जसु कहलु तसुत सारान सला लीन आपसा बुलेन अनसारे कर्‌यु। 2 सारा अब्‌राहम सी भार पाये हयन डाहवारा मां एक पुर्‌यु हयु, जसो की भगवान तीना टेम काजे टाकलु।✝21:2 ईब्‌रानीयो 11:11 3 अब्‌राहम आपसा पुर्‌यान नाव जु सारा सी हवलु तेरो नाव इसाक पाड़्‌यु। 4 ने जत्‌यार तेरु पुर्‌यु इसाकेन आठ दाहड़ा हया, तत्‌यार हयु भगवानेन हुकुमेन अनसारे तेरी फतरी काट्‌यु।✝21:4 उबजाणनी किताप 17:12; नेवताळान काम 7:8 5 जत्‌यार अब्‌राहमेन पुर्‌यु इसाक हयु तत्‌यार हयु एक सोव सालेन हतलु। 6 ने सारा कय, "भगवान मेसेक बेसकी खुसी आपलु छे, तेरेमां आखा सामळने वाळा बी मारे भेळे खुस रवसे।" 7 अळतेन ची असी बी कय, "काय काहनुक अब्‌राहम सी कय सकतेला की सारा पुर्‌या काजे दुत पावणी बणसे? बाकुन देखु, मारे सी तेरा डाहवारा मां एक पुर्‌यु पयदा हवलु छे।"

8 ने चु पुर्‌यु अध्‌यु ने तेरो दुत पीणु छुड़ाया; ने इसाकेन दुत छुड़ाया तीने दाहड़े अब्‌राहम मटो खाणो खाणे करीन खादु।✝21:8 गलातीयो 4:22; ईब्‌रानीयो 11:11

हाजीरा ने इस्‌माएल काजे नीकाळनु

9 तत्‌यार साराक मीसर मां रहण्‌यु हाजीरान पुर्‌यु, जु अब्‌राहम सी हवलु, इस्‌माएल, चु हासी उडाड़तु देखाव पड़्‌यु। 10 तेरेमां सारा अब्‌राहम सी कय, "ईनी पावरनी काजे तेरा पुर्‌या भेळती नीकाळ दे, काहाकी ईनी पावरनीन पुर्‌यु मारा पुर्‌याक इसाक भेळे तारा माल-धनेन हकदार्‌यु नी बण सके।"✝21:10 गलातीयो 4:29,30 11 जी वात अब्‌राहम काजे वारु नी लाग्‌यो काहाकी इस्‌माएल बी तेरु बेटुस हतलु। 12 तत्‌यार भगवान अब्‌राहम सी कह्‌यु, "तीना पुर्‌यान ने तारी पावरनीन वजे सी तुसे भुंडो नी लागणु चाहजे, जी वात सारा तुसे कहे, तीनीक मान, काहाकी जी तारी अवल्‌यात वदणे वाळी छे ची इसाक सी वदसे।✝21:12 रोमीयो 9:7; ईब्‌रानीयो 11:18 13 ईनी पावरनीन पुर्‌या सी बी मे एक जाती काजे वदाड़ीस, काहाकी ची बी तारी अवल्‌यात छे।"

14 तेरेमां अब्‌राहम संदारे एगुत उठीन रुटा ने पाणी भरली चामड़ान थयलि बी हाजीरा आप्‌यु, ने तेरे खांदे पर मेल देदु, ने तेरा पुर्‌याक बी तीनीक आपीन मकली देदु ने ची चाल पड़ी ने बेरसेबान उजाड़्‌या बयड़ा मां भटकायणे लागी। 15 जत्‌यार थयलि मायन पाणी सर ज्‌यो, तत्‌यार ची पुर्‌याक एक झाड़का तळे छुड़ीन जाती रय। 16 ने पुर्‌यो नी देखाये ततरे लांबे जाय्‌न ची असी वीच्‌यार करीन बठ गुय, मारा डुळा अगळ पुर्‌यो मरसे ती मेसेक नी वेठाये ने ची ढळो-ढळो रड़ने बाजी गुय।

17 भगवान तीना पुर्‌यान सामळ्‌यु, ने सरगेम सी सरगेन काहवाळ्‌यु हाजीरा काजे कह्‌यु, ओय हाजीरा, तारे काय हयो? मां बीहे; काहाकी जां तारु पुर्‌यु छे चां सी तेरी अवाज भगवान काजे सामळाय देदी। 18 उठ, तारा पुर्‌या काजे हाकल ने तार हात सी समाळ; काहाकी मे तेरे सी एक मट्‌ली जाती बणावीस। 19 तत्‌यार भगवान तेरा डुळा काजे उघाड़ देदु, ने तीनीक एक कुवु देखाव पड़्‌यु; तत्‌यार ची जाय्‌न थयलि मां पाणी भरीन पुर्‌या काजे पावी। 20 ने भगवान तीना पुर्‌या साते रह्‌यु; ने जत्‌यार चु मटु हयु, तत्‌यार बयड़ा मां रवते-रवते सीकारी बण ज्‌यु। 21 चु पारान नावेन बयड़ा मां रया करतेलु। ने तेरी माय तेरे वाटे मीसर देस सी लाडी लावी।

अब्‌राहम अबीमेलेक साते वायदु करे

22 तीनु दाहड़ा मां असो हयो की अबीमेलेक राजु पीकोल काजे जु सीपायड़ान डाहलु हतलु, तीनाक लीन अब्‌राहम भीणी आवीन कह्‌या, जो काय तु करे तेरेम भगवान तारे साते रहे; ✝21:22 उबजाणनी किताप 26:26 23 तेरेमां हंय मारे सी जां ईनी वातेम भगवानेन सगुन खा की तु नीते मारे सी धुकु करसी, ने नी कदी मारी अवल्‌यात सी करसी, बाकुन जसु दया मे तारे पर कर्‌यु, तसुत तु मारे पर ने ईना देस पर बी करजी, जीनाम तु रहे।

24 अब्‌राहम कह्‌यु, "मे सगुन खाम।"

25 ने अब्‌राहम अबीमेलेक काजे एक कुवान बारामां तीनाक अबीमेलेकेन पावर्‌या हापकी लेदला तेरे बारामां बी बताड़्‌यु। 26 तत्‌यार अबीमेलेक कह्‌यु, "मे नी जाणों की कुण असो काम कर्‌यो; ने तु बी मेसेक नी बताड़्‌यु, ने नी मे आज सी पेहले ईनी वातेम बारामां काहींन सामळ्‌यु।" 27 तत्‌यार अब्‌राहम गाडरा-बुकड़ा, ने गावड़ी-बेल अबीमेलेक काजे आप्‌यु; ने चे दुयुन ईचमां बुली बांद्‌या। 28 अब्‌राहम गाडरान सात पीला आंग्‌ये कर्‌यु। 29 तत्‌यार अबीमेलेक अब्‌राहम सी पुछ्‌यु, "ईनु सात पीला काजे, जीनुक तु आंग्‌ये कर्‌यु एरो मतलब काय छे?"

30 ती चु कह्‌यु, "तु ईनु सात पीला काजे ईनी वातेन गवा जाणीन मारे हाते सी ली ले की ईना कुवा काजे मेत खुद्‌यु।" 31 जां चे दुयु जीना जागा पर सगुन खादा, तेरे वजे सी तेरो नाव बेरसेबा*21:31 कीर्‌यान कुवु पड़्‌यो।✝21:31 उबजाणनी किताप 26:33

32 जत्‌यार चे दुयु बेरसेबा सहर मां आंबा-सांबा सगुन खादा, तत्‌यार अबीमेलेक ने तेरु सीपायड़ान डाहलु पीकोल, चां सी उठीन पलीस्‌ती देस मां पछा जाती र्‌या। 33 अळतेन अब्‌राहम बेरसेबा मां एसेल नावेन झाड़कों लागाड़्‌यु, ने चां यहोवा सी जु जलमेन भगवान छे, तेरी भक्‌ती कर्‌यु। 34 अब्‌राहम पलीस्‌तीन देस मां बेसका दाहड़ा लग पारकु बणीन रह्‌यु।