माणसेन भुंडला कामे
1 धरती पर माणसेन जाती बेसकी हय गुय। ने तींद्री पुरे बी बेसकी हवी। 2 तत्यार भगवानेन पुर्या हतला, ने चे माणसे पुरे काजे देखीन वीच्यार्या की जे ते बेसकु वारु देखाये, करीन चे जे वारु लागे तीनु पुरे सी ईयाव करीन राख लेदा। 3 तत्यार भगवान कह्यु, "मारो मन माणसे सी जलम दुख मां नी रहे, काहाकी माणुस ते डीलुत छे; तेरी उमर एक सोव वीस सालेन रवसे।" 4 तीनु दाहड़ा मां धरती पर आखा सी मटा ताकुत वाळा माणसे रवतेला; ने तेरे पछेन भगवानेन पुर्यु माणसेन पुर्या धड़े आयु तत्यार तेर सी जे पुर्या हया चे आखा सी ताकुत वाळा हतला, ने तींद्रो नाव पेहला जमाना सी हवतो आय रयो।
5 यहोवा भगवान जो देख्यु की, धरती पर माणसेन पाप बड़ गुयु, ने तींद्रा मन मां जु बी वीच्यार आवे, चु वीच्यार कुहर्युत आवे।6:5 भजन सहीता 53:2 6 हेरेसी यहोवा भगवान धरती पर माणुस जात काजे बणायन बेसकु दुखी हयु। 7 तत्यार यहोवा भगवान वीच्यार कर्यु, "मे ईनुक नी बणावतु ती वारु रवतो, हय मे तीनु माणसे काजे बणावलु छे, तीनु माणसे काजे धरती पर सी सार दीस, ने आखा जानवर्या ने घीसड़ायन चालन्या जानवर्या, ने एकेक जीव काजे ने सरगेन चिरला काजे सार दीस।" 8 बाकुन तेबी भगवान काजे खुस करन्यु एक माणुस हतलु; चु नुह बाबु हतलु। हेरेसी यहोवा भगवान नुह पर गीण-दया बणीन रय।
नुह
9 नुहन घराणान काहणी जी छे। नुह धरमी माणुस हतलु, ने तीनी टेमे जत्रा बी माणसे हतला, तीनु माणसे मां चु ईमानदार हतलु, ने चु भगवानेन हजरी मां रय्न जीवतेलु।
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)