João 6

Yeso a no nji ngo ton ri

1 Kugon rinyi Yeso a hi ri gran nne ri Galili riwa wa yo-u ri nne Tiberias ngaw een. 2 Ijɨbu nji waka hu ritu wa wo bibi kya ri de sisiri riwa a den wa lilo. 3 Yeso ka hi ri tu gashi ran ka son iwawa miri ndu wan. 4 Ivi ro ri dza gran ka ye hwɨre.

5 Yeso ka nzu si ya ran to jɨbu nji wana ye ri wu imba ka miyen Filibu ri,<<Ri minyi nye ki fe ri bran riwa ki no nji wa nyi wawu mba?>> 6 A tre rinyi ritu ran tsra Filibu nye, ama rimi sron wan a to kya riwa ari ti-e.

7 Filibu ka nyɨme ri,<<Ko no ko ngaa no fe tsawen, ari ban nkren gbigba hari riwa ki rejujuyɨmo bran!>>

8 Iri rimi miri ndu wan riwa inde wan a he Andarawus vayi sima Bitrus, ka tre ri, 9 <<Ivren ri tsitsa he nyi riwa a he ri jujuyɨmo mgbɨreton nga lambe hari. Ama a ran ri ke nji wanyi wawau ran.>>

10 Yeso ka la miri ndu wan ri,<<No nji wamba no wa son mme.>>Ri bubu wan giga a he imba nji-a waka kuki ri meme nji wawa wa he ri bubu wan wa he ronron ngo ton. 11 Yeso ka ban juju yɨmo-a ran ngɨri ri Izhi ran ka ga nji wawa wa he ri bubu wan, ngamba nye a ti ri lambe-a me nga wawu mba waka ri bran bibi riwa wa wa.

12 Riwa wa hwɨshi wawumba Yeso ka la miri ndu wan ri,<<Taan zhuzhuwan riwa a dongbron, no ta ran no time ran.>> 13 Imba imiri ndu Yeso waka tan zhuzhu wan rimi mgbɨreton riwa nji wa ri don, wa tan shu rimi sisen wuru don hari.

14 Ri to kya ri de sisri nyi riwa Yeso a ti nji ri bubu wan waka tre ri,<<Kpu nji tre rinyi he nji ri la tre Izhi riwa ari ye ri mgbumgblume!>>