Lucas 24

Nkon ri hi Imuwasu

13 Chachu vi-a riwa wa ran hi ri gbu riwa wa yo ri Imuwasu, a he meli tangban zhu ri Urushelima. 14 Waka ran tre ri ngamba ritu kya riwa a ti. 15 Riwa waka ran tre ri ngamba, Yeso ritu wan ka ye ran zɨren riwa; 16 Wa ran to a he wa wu ran.

17 A miyen wa, <<Bi tre ritu ngye riwa bi zɨren ri hi? Wa>> ka ku kri, ri si mba mme. 18 Iri rimi mba, nde wan a he kiliyobas, ka miyen, <<Wu he riwa wu ye Urushelima wu ran to kya a ri ti ri vi wa nyi ran?>> 19 Ka miyen ri<<Ikya ngye?>>

<<Ritu Yeso nji Nazare,>> Wa ka tre. <<A he nji ri ndu Izhi, gbengbren rimi tre ri kya dindi ri si Izhi nga nji wawu. 20 Ama chu w Firist nga wa rikon mbu wa ka wu nowa wuu, nga wa kpa wu ri konkron. 21 Ama ki yo sron ri a he nji riwa a ri kpa Israila chuwo. Ngha ngye han ngamba, a he vi tra riwa ikya wa nyi wa ti. 22 Mba bu wari wa no ta mamaki. Waka hi bubu gyuru mbamibrenyi. 23 Ama wa ka ran to kpa wan ran. Wa ye wa ri la ta wa to waayi miriko Izhi, riwa wa tre a he si. 24 Imba wa kpan mbu wari wa ka hi ri bubu gyuru wa ri to ka a he bibi riwa mba-a wa la ta, ama wa ran to Yeso ran.>>

25 Yeso ka tre wa, <<Bi he nji wawa bi ran to kya ran, nga reresron ri nyɨme kya wandu Izhi wa tre! 26 Bi ran to ri Yeso ri so ya ri ko ran fe gbre wanyi ran?>> 27 A gbuchi ri Musa nga miriwa ndu Izhi, a la wa kya wa tre ri ngha mbe tre ritu wan.

28 Riwa wa ye huehyureri vi gbu, Yeso ka ti ka a ri hi kpata. 29 Wa ka fu wulu riwu,<<Son ri ta, ya wulu a ti, ivi a ye.>> Ka son ri wa. 30 Riwa a son riwa bubu son, ran ban jujuyɨmo, ran ngɨri, ran chiwa ka no wa. 31 Imba isi mba ka bu waka to wu, nga ka kado ri si mba 32 Wa ka miyen ngamba, <<Isron mbu a ran ti kinklan ngawen ran riwa a tre ri ngamba ri nkon nga ran bu mbe tre Izhi rita ran?>>

33 Wa ka wulunde wa ri ye Urushelima. Mba wa ka fe nji wuru don ri nga riwa wa he riwa, wa ka kabru ri ngamba 34 nga wa tre, <<A he njanji! Bachi a wulunde nga ran ye ri Sima.>> 35 Imba imiriko wan hari wa ka la kya a ti ri nkon, nga bibi kya wa to Yeso ti riwa a chiwa jujuyɨmo.