Mateus 20

Andeande smat ta rkarajan mali bet anggurca

1 Yesuse nu hawe, "Jou Lahatalla bo Nkawasa ndadi Kolano mali smat ta rdela I na, laisa andeande tae: En smat isa ta na bet anggur. Lase bo sema, i ncapange ga niyawa smate bo rkarajan mali na bet anggurca. 2 Oras ciana i nduk smat sifis lalina, i nfatatur re si mfalaisa rkarajan wol pusa mulona. Tina ta i bo npalco smat isa, wol pusa tiwi guraci pusa. Fola tina, i ncula si rkarajan mali i na bet anggurca. 3 Rasa ttok faisiwe dororam sube, i ncapang hawe nfan lali pasar i. Pulina, i nem smat sifis rkarajan pa. 4 Gabe i nua si, ‘Mewe fkarajan mali ya nak bet anggurca. Lomanta ya ipalco mew tderera ta mew fkaranjanna.’ 5 Fare rasa orasna ttok yafasa re pilu wolca nfapaluan re malingin ttok faicol, i ncapang hawe nfan lali pasarca, laisa ta i npei nana i na. 6 Fola tina, rasa ttok failim malingin, i ncapang hawe ga i nem en sube smate nesa hawe mali pasarca ta rkarajan pa. Gabe nfautno si, ‘Pesaga wol pusa tae mewe fosal be mantane taga fkarajan pa?’

7 Si dua i, ‘Amame laitane to, ga ise npo am karajan pa’.

Gabe i nua si, ‘Gabe laina, mewe ffan lali ya nak bet anggurca, taga fkarajaan pulina to.’

8 Orasna bo doram, smat ta na betca nua ni mandorca, ‘Mololaw farumi mali smat karajan tina taga mpalase rari sagige mulona. Aw mpalco si na mulain mali ta ncung mesamul molangna denabe ta ncunge ntubaca.’

9 Mana, smat karajan ta rkarajan mesamulna jale rari sagige mulona ntuba, isa-isa nyal perak pusa. 10 Gabe oras smat ta rkarajanna mali dororam isube rlafo jale rari sagige mulona, si dunama si isa-isa bo rdukna foloi mali smat ta rkarajan mesamul na. Ga si le ma jalna isa-isa perak pusa. 11 Oras ta si jal tiwi tina, si rfauwa smat ta na bet cia. 12 Si du, ‘Tuan bisa laitane pa! Smat ta rlafo mesamulna, rkarajan jam bahnga be. Taga rari sagige mulona sama re amam! Ga amam tane karajanna wol pusa molang, denabe sagigena ncapang’.

13 Ga tuan ta na bet cia nua isa mali silina, ‘Tenok ta aw, mati mtolena e! Tane ya ikakal aw pa. Ga ta ntubana ya re aw tfatatore to paga, ya bo ipalco aw re perak pusa tina karajan wol pusa. 14 Gabe ta mafiana mnyale to sagige mulo tina re wlomna sangnang fare muwe. Ya ilokolo ipo sagige mulo sama re aw, sama re ya ipo smat ta rcung mesamulna. 15 Ya nik hak ipake ya nik tiwi ya nik mau tutuling, paga? Pare aw msangnang pa ningalena ya imasie smat tina?’ "

16 Yesuse nu hawe, "Gabe mali andeande tina ite tdadi tto, smat ta rdadi smat ta foloi mali dunia tae, osta rdadi smat ta riri ngale pa, ga smat ta riri ngale pa mali dunia taena, osta rdadi smat mamagal si."