Matei 22

Ulanguso wa mbuli ya kuzilipuka

23 Zuwa alyo, wamwe wa Masadukayo nawawele wolonga wabagame hawozilipuka nawamlutila Yesu. 24 Lelo nawamlonjela, "Mlangusa, Musa nakalonga munhu yaholile mdala wone yabagame ne kulela mwana, imgana mng’holoze, yamhole yula mdala mlekwa, leka yamlelele wana mng’holoze. 25 Lelo aha hetu kwali na wanhu saba wa lulelo lumwe. Wa mwaluko nakabagama ne kulela mwana, ayula mdala mlekwa nakaholeka kahi na mng’holoze. 26 Iwa hihyo kwa wakeli na wakadatu, mbaka weng’ha saba. 27 Awo weng’ha lowabagame, na yula mdala nakabagama. 28 Lelo zuwa lya wabagame kuzilipuka mdala ayo kowa mdala wa yalikohi kwa wala walume saba? Mina weng’ha saba namhola yuye."

29 Yesu nakawedichila, "Hemwe muwifya kwa vila hamgazelele Maandiko Matakatifu ne mong’ho wa Nguluwi. 30 Mina wabagame howozilipuka hawohesa ne kuhesigwa hebu, wowa kota wahilisi wa kilanga. 31 Ila kwa mbuli ya kuzilipuka kwa wabagame, ndaze, hamsomile gala goyawalonjele Nguluwi? Nakawalonjela, 32 ‘Heni nda Nguluwi wa Abulahamu na wa Isaka na wa Yakubu!’ Lelo heye hawele Nguluwi wa wabagame ila ndo Nguluwi wa wawele wakomu." 33 Lula lung’hongola lwa wanhu loluhuliche ahyo, lububuwala kwa ulanguso wa heye.