23 Wamizi ivo wamalile kumuwamba Yesu mumsalaba, wakasola myenda yake wakaigawa malundo mane, kila mwamizi na lundo dyake. Mbali wakatogolelana wasekuidega ila nk’hanzu kwa vila ikala ishonigwa na kitambala kimwe kwandusila kuchanya hadi hasi. 24 Wakalongelana, "Chisekuidega nk’hanzu ino mbali chisagule na chilamule naiwe ya niani." Mbuli ino itendeka ili yalawila Maandiko ya Mulungu yalongile,

"Wakagawilana myenda yangu,

na mwenda wangu kwa simbi." Ayo ndo wayatendile wala wamizi.

25 Mda uo uo haguhi na msalaba wa Yesu wakala watimalala Mami yake, na mbudya wa Mami yake na Malia mke wa Kilopa na Malia wa kulawa Magidala. 26 Yesu ivo amuonile Mami yake hant’hu hala hamwenga na ila Mwanahina ambwedile katimalala haguhi, akamlongela Mamiake, "Mama lola mwanako iyo aho." 27 Kamala Yesu akamulongela ila mwanahina, "Lola mami yako iyo aho." Siku idyo idyo ila mwanahina akamsola Mami yake Yesu akaita nayo ukaya kumwake.