1 Mpangi ani Teofile, mu buuku dyani dintete, nazonzila misamu mimvimba mihidika Yesu na mi kalonga tuka ku mbadukulu 2 natee kilumbu ki katomboka ku yulu. Tekila katomboka ku yulu, Yesu mu lulendo lu Mpeve Yilongo, wuhaana ntumunu ku zintumwa zi kasoola. 3 Ku manima ma lufwa lwandi, wubayenikina, na wubalonka mu bifwani bibingi ti wumoyo kadi. Wubayenikina mu bilumbu makumaya, na wubazonzila misamu mi kimfumu ki Nzambi.

4 Mu ntangu yi kedi dya nawu, wubahaana ntumunu eyi ti: «Lubandi kitatu na Yelusalemi ko, kansi kingileeno nsilulu yi lusila Tata, yo yina lusamunina. 5 Yoane wubotika bantu mu mamba, kansi yeno, mwa bilumbu kwandi bi sidi, mbo lubotoko mu Mpeve Yilongo.»

6 Yobobo baba bayonzama ha kimosi na Yesu bamufuula ti: «Mfumu, nganunu ntangu yifweni yi waasa ti kintinu ki Isaeli kivutuka e?»

7 Yesu wubavutudila ti: «Kadi musamu eno wudi mu zaba ntangu na kilokola, ki kubika Tata mu lutumu lwandi e? 8 Kansi yeno lwaatambula lulendo lu Mpeve Yilongo yaakulumuka ku yeno. Mbo luba zimbangi zani ku Yelusalemi, mu kizunga kimvimba ki Yuda na ki Samaliya, natee ku sukina nza.» 9 Bu kamanisa mu zonza bobo, wutomboka ku yulu ha meso mawu. Mpe tuti diyiza mufuka na bedi bwesa muyena ko. 10 Bu bedi talanga ku yulu kwedi yendisa Yesu, bayena babakala bole balwata binkutu bimpembe na bayiza ba bela-bela nawu, 11 babateela ti: «Yeno bisi-Ngalili, bila nki luna mana tadilanga ku yulu e? Yesu bewowo wubatombodi ku yulu ha kati dyeno, waavutuka bonso bu luyenini nkwendolo andi ku yulu.»

12 Bantumwa bavutuka ku mbanza Yelusalemi na basisa mulandu wu nkumbu Olive, wuba bela-bela na Yelusalemi, kampe kilometele yimosi. 13 Bu bayenda tula, batomboka mu kihinga ki ku yulu mu nzo yi kibanga mu bedi vukininanga. Baba momo ni: Petelo, Yoane, Zaki na Andele, Filipi na Toma, Batelemi na Matayi, Zaki mwana wu Alefe, Simoni mu-Zeloti na Yuda mwana wu Zaki. 14 Bamvimba, bedi vukananga ntangu ka ntangu mu sambila ha kimosi na bakento, na Maliya ngudi yi Yesu na mpangi zi Yesu.

15 Mu bilumbu bebyobyo kwandi, dibundu diyonzama kampe lutangu nkama na makumole ma bantu. Petelo wutelama ha kati dyawu na wubateela ti: 16 «Mpangi zani, bufweni ti mambu maa mu Masonama, masamuna Mpeve Yilongo mu munwa wu Davidi ma lunga, bu kazonzila Yuda wuba kinati ki yobobo babwila Yesu. 17 Yandi wuba wumosi ha kati dyeto na wusala kintwadi neto. 18 Kansi wusumba mfuba mu mbongo zi bamufuta mu dyambu dimbi di kahidika. Wubwila ki mutu, mboki moyo wumupasuka ha kati-kati mpe midya myandi mimvimba mi sangamana. 19 Bisi- Yelusalemi bamvimba bazaba musamu bewowo. Ni hahoho bahaanina mfuba beyoyo nkumbu mu ndinga awu ti "Akeledama" mpila mosi ti: "mfuba yi menga".» 20 Wusonama mu buuku di mikunga ti:

«Bika banyafuna nzo andi,

Na kani muntu kalendi zakala momo ko!»

Mpe wusonama dyaka ti:

Bika muntu wuhiika kasala kisalu kyandi!

21 «Ni hahoho, tufweti soola muntu wumosi ha kati di yobobo baba neto kintwadi mu ntangu Mfumu Yesu yi kedi kwe zyetingi ha kimosi neto, 22 tuka ntangu yi mu botika Yoane natee kilumbu ki bamukatula ha kati dyeto mu mutombola ku yulu. Bufwanakani ti wumosi ha kati dyawu ka ba neto kintwadi mu samunanga kimbangi ki mfulukulu andi.»

23 Ni hahoho, batedimisina bantu bole: Yosefi wuba kwe tumisinanga ti Basabase hoti Yusutuse, na Matyase. 24 Ku manima, minkwikidi mi sambila ebu: «Mfumu, ngeye zebi mitima mi bantu bamvimba, tulonka wumosi wusoodidi mu yababole bebaba 25 mu sala kisalu ki buntumwa kisidi nyafuna Yuda bu kayenzi ku kibuka kyandi ki mufwanakani.» 26 Bu bata hwadi, nsololo yibwa mu Matyase, ni bamukotisa mu kabu di zintumwa kumi na yimosi.