1 Bu babonga nzengolo mwanki twenda ku nsi yi Itali mu masuwa, bayekola Pawuli na nkole zihiika mu moko ma mfumu yimosi yi zimbulu-mbulu nkama, nkumbu andi Yuliyuse, wuba mu kabu di binwani bi ntinu yi Loma. 2 Tumaka mu masuwa ma mbanza yi Adalamite medi kwendisa ku makumu ma kizunga ki Aziya, ni tuyenda. Alisitalaki, mwisi mbanza yi Tesalonika mu kizunga ki Masedwani, wuba neto kintwadi. 3 Kilumbu kilanda, tutuula ha mbanza yi Sidoni. Yuliyuse wuba muntu wumbote ku Pawuli, wumuhaana luve mu yenikina bakundi bandi, mwanki kabaka bima biba nandi nsatu. 4 Bu tukatuka hoho, tulandila nzyetolo bela-bela na kumu di kizanga ki Sipeli, mu dyambu ti bitembo bi twedi kwe bwani. 5 Bu tumana sabuka mubu wu bizunga bi Silisi na Pamfili, ni tutuula ha mbanza yi Mila mu kizunga ki Lisi. 6 Mfumu yi zimbulu-mbulu nkama, bu kayena hoho masuwa ma Alezandi medi kwenda ku nsi yi Itali, ni katukotisa momo.

7 Bilumbu bibingi tusa mu kwe yenzingi malembe-malembe mpe mu mpasi tutuudila ha nkotolo yi mbanza yi Kinide. Kitembo bu kyedi tukakidila ni tulanda nzila yihiika, ni tuhyoka nsongi yi butoto bu Salomoni mu kwe landi kumu di kizanga ki Kelete. 8 Nkatika mu mpasi tulandila kumu ni tutuula ha kibuka kimosi ki bakwe tumisinanga ti Mabungu-Mantoko bela-bela na mbanza yi Lasaya.

9 Ntangu yiyingi yihyoka, mpe masuwa mayiza ba mu mpasi mu kwe yenzi, mu dyambu ti ntangu ye mina nsoki yikihyokila. Ni hahoho, Pawuli kahaanina ndwengosolo eyi: 10 «Bakundi bani, nayeni ti nzyetolo beyiyi nkatika yinsisi yaaba: masuwa na bifunda byaafukila. Mpe yeto bende, tulendi hombisa luzingu.» 11 Kansi Mfumu yi zimbulu-mbulu nkama yi Loma wubisa mu yuwila Pawuli. Yandi wuvula yuwila kwandi kinati ki masuwa na muntu wuvwidi masuwa. 12 Dibungu bedyodyo, diba dimbote ko mu hyokisila nsungi yi kyozi kingolo. Ni hahoho, bantu babingi balomba nzila mu katuka hoho: bedi tya, tala ti bulendi ba, batuula ku mbanza yi Fenikise, dibungu di Kelete, ditadisa ku sude-wesete na ku node-wesete, mwanki bahyokisila nsungi yi kyozi kingolo.

13 Mwa mupepe wumosi wulembama wufuma ku sude wutona mu hehomoka, yawu babanzila ti balenda lungisa makani mawu. Ni hahoho, batombodila mu mamba kisengo ki na musinga ki kwe sikikanga masuwa na balandila bela-bela kumu di Kelete. 14 Kansi, mwa ntangu yifyoti kwandi yihyoka, kitembo kimosi kingolo, ki bakwe tumisinanga ti Elakilone kyedi kukula, kifuma ku milandu mi kizanga . 15 Masuwa mayenda mu kitembo na malenda ko mu kakidila kyo. Ni tubiika kwandi ki tunata. 16 Tuhyokila mu banda di mwa kizanga ki Koda. Mpe mu mpasi zizingi tulendila mu sikika mulungu wuba mu masuwa wukwe vukisanga bantu. 17 Bu batombola mulungu mu mamba, batuula wo mu masuwa. Mboki, bazinga masuwa misinga mutoma me kindisa. Bu bedi yena bunkuta mu kwe kangama ku kumu di munyenge di makumu ma nsi yi Libi, bakulumuna kisengo kikwe sikikanga masuwa. Ni babiika kitembo kyenda banati konso-konso. 18 Kitembo bu kyedi tatamana mu tuningisa mu ngolo, kilumbu kilanda, ni tulosa bifunda bihiika mu mubu. 19 Kilumbu kitatu, balosa yawu bende mu moko mawu bisalulu bi masuwa. 20 Mu bilumbu bibingi, twedi bwesa yena ntangu na mbwetete ko. Kitembo kitatamana mu kukula mu ngolo, twedi bwesa kwikila ko ti twaavuuka.

21 Bahyokisa bilumbu bibingi balembolo dya. Ni hahoho, Pawuli bu katelama ha ntadisi awu, wuta ti: «Bakundi bani, tala ti lunyuwidingi, nganunu tukatukidingi ha Kelete ko, mwanki tulembolo fukisa na kuhombisa bima.» 22 Bwabu na lulombidi lu lwata kibakala, mu dyambu ti ku muntu ko waafwa, na kima kyaahombila kaka ni masuwa. 23 Mu dyambu ti mu mpimpa beyiyi, mbazi yimosi yi Nzambi yi mvwidi na yi nakwe sadilanga yi nyenikiningi, 24 yintedidi ti: «Pawuli, kuyenandi bunkuta ko! Fweti fundusu ha ntadisi yi Kayisali, ntinu yi Loma, mpe Nzambi wukuheeni luzingu lu bantu bamvimba bana zyeta naaku mu masuwa.» 25 Bakundi bani, lwateeno kibakala, mu dyambu ti nii na kiminu mu Nzambi: «Bu kantedidi, bwabobo mpe myaahyokila. 26 Masuwa meto ma kwe mwangana ha kumu di kizanga kimosi.»

27 Yiba mpimpa yi kumi na ya tuka kitembo kyedi kwe tunati ku ndambu ka ndambu yi mubu wu Meditelane. Kampe mu kati-kati di mpimpa, bisadi bi masuwa byedi banza ti tweka bela-bela na butoto. 28 Batuba musinga mu teza sunda yi mamba na bayena ti sunda yi mamba yidi mu zimetele makumatatu na nsambwadi. Mwa kitatu dyaka kikingi, batuba dyaka musinga mu mamba na bayena ti sunda yi mamba yidi mu zimetele makumole na nana. 29 Bayena bunkuta ti masuwa malendi kwe koyama mu matadi mamanene, ni hahoho, batubila ku manima ma masuwa bisengo biya bikwe sikikanga masuwa, ni bedi kingila ti bwisi bukya mu nswalu. 30 Kansi, bisadi bi masuwa bubyedi sosa mu woka, batona mu kulumuna mulungu mu mamba. Ni bahuna ti bisengo bikwe sikikanga masuwa bana sosa mu kanga ku mutwala. 31 Pawuli ni kata ku mfumu yi zimbulu-mbulu nkama na ku zimbulu-mbulu ti: «Tala ti bantu bebaba bazakadi mu masuwa ko, lulendi vuuka ko.» 32 Bwabobo zimbulu-mbulu zitabudila misinga myedi sikikanga mulungu, na babika wo wenda mu mamba.

33 Tekila bwisi bukya, Pawuli wusyamisa bamvimba biza badya na wuta ti: «Taleno, bubedidi tweka kilumbu ki kumi na ya tuka bu lutona mu kingilanga, mpe lwadidi kani kima ko. 34 Bwabu nina lulomba ludya, mu dyambu ti mfunu bidi mu mvuukulu eno. Ku muntu wumosi ko mu yeno waazimbisa kani mulengi wumosi wu mutu andi.» 35 Mu mpova bezozo, wubonga dimpa, wuvutula matondo ku Nzambi ha ntadisi yi bamvimba, mboki wubukuna dyo na wutona mu dya. 36 Bamvimba balwata kibakala na badya mpe. 37 Bantu nkama zole na makumi nsambwadi na sambanu tuba mu masuwa. 38 Bu tumana yukuta, tulosa bifunda bi bele mu mubu, mwanki masuwa malenga.

39 Bwisi bu bukya, bisadi bi masuwa bazaba ko nkye kibuka baba, kansi bayena kumu di munyenge. Ni babonga nzengolo ye kwe sikika masuwa hoho, tala ti bulendi ba. 40 Banyanguna misinga mi bisengo bikwe sikikanga masuwa, ni bayambula byo mu mubu, banyanguna mpe misinga mi zinkafi zikwe twadisanga masuwa, mboki batombola mulele wuu ku mutwala wu masuwa mwanki kitembo kibanata. Ni bayendisa ku bela kumu di munyenge. 41 Kansi masuwa bu mayenda vwikama mu munyenge, ni makangama. Ndambu yi mutwala yi masuwa yiba yikota mu kati di munyenge, na medi bwesa lenda mu ningana ko. Ndambu yi manima ni yedi bwonzomoka mu ngolo zi bipo bi mamba. 42 Zimbulu-mbulu zisosa mu honda zinkole mwanki kani yimosi yilembolo woka mu saya. 43 Kansi, mfumu yi zimbulu-mbulu nkama bu kasosa mu vuukisa Pawuli, wubadika mu sadila mayindu bemomo. Ni katuma ku yobobo bazaba mu saya, badumuka bantete mu mamba na benda baba ha butoto. 44 Bahiika bedi balanda ha yulu mabaya hoti ha yulu bibuku bi masuwa. Bwabobo bamvimba bavuukila na batudila ha butoto balembolo bwana dyambu.