1 Mu ntangu Petelo na Yoane yi bedi zonzanga ku mukangu, zinganga-Nzambi, mfumu yi minkengi mi nzo-Nzambi na basaduki bayiza. 2 Batoma fwema bu bayena Petelo na Yoane bana longisa mukangu na bana samuna mfulukulu mu bafwa mu nkumbu yi Yesu. 3 Bababwila na babatuula mu boloko natee kilumbu kilanda, mu dyambu ti bwisi bu kiyidila. 4 Kansi babingi mu yobobo bayuwa ndongosolo awu bakwikila, kampe baba lutangu mafunda matanu ma bantu.

5 Kilumbu kilanda, zimfumu zi Bayudayo, zimbuta zi bantu na milongisi mi Misiku bakutakana ku Yelusalemi, 6 na Ana mfumu yi zinganga-Nzambi, Kayifa, Yoane, Alezandeli na bantu bamvimba ba mu kanda di mfumu nganga-Nzambi. 7 Balomba babatwadila Petelo na Yoane ha ntadisi awu. Bu batula, batona mu bafuula ti: «Mu lutumu lu nani hoti mu nkumbu yi nani luhidikidi musamu bewuwu e?» 8 Petelo, wufuluka mu Mpeve Yilongo, wubateela ti: «Mfumu zi mukangu na yeno zimbuta zi bantu, 9 bubedidi bana tuvwika byuhu mu dyambu di musamu wumbote wu tuhidikidi ku muntu wu kyeta. Bana tulomba mpe mu zaba bwedi muntu bewowo kanyakini. 10 Bika yeno bamvimba na kanda dimvimba di Isaeli luzaba wo ti: ni mu nkumbu yi Yesu-Klisto, mwisi-Nazaleti, yondowo wulukoma ha kulunsi mpe Nzambi wukafulukisa mu bafwa, ni mu yandi muntu bewuwu katelamani ha ntadisi eno na mavimpi mambote. 11 Yesu ni

"Tadi dinyafuna, yeno, bituungi bi nzo

dyeka tadi divudidi mfunu."

12 Kunani mpulusu ku muntu wukaka ko, mu dyambu ti kunaani nkumbu yi kaka ha nza yi bahaana ku bantu, yilenda tuhaana mpulusu.»

13 Mbuta zi bantu zi Bayudayo ziyituku bu bayena kivuvu ki Petelo na Yoane, mu dyambu ti bazaba ti yawu bantu balembolo longoka mikanda na ba bazaba ti ha kimosi bedi kwe bengi na Yesu. 14 Kansi, bu bayena mpe muntu bewowo wunyaka ha ntendo awu, babaka dyaka dyambu dye vutula ko. 15 Ba balomba baduuka mu nzo yi kimvuka ki bakuluntu ba Bayudayo, mboki yawu na yawu basala mu yuwasana 16 mpe bateelasana ti: «Nki twaasa ku bantu bebaba e? Mu dyambu ti kimangu kingitukulu basidi, mpe bisi-Yelusalemi bamvimba watomini zaba bumbote na tulendi bisa wo ko. 17 Mwanki musamu bewuwu wulembolo mwangana ha kati di mukangu, tubakanikina mu ngolo zimvimba mulembolo bwesa zonzila mu nkumbu yi Yesu ku kani muntu.»

18 Mboki babatumisa dyaka mu nzo, ni babakanikina mu ngolo zimvimba mu zonzila hoti mu longila mu nkumbu yi Yesu. 19 Kansi Petelo na Yoane babavutudila ti: «Nkye dyambu dii didedama ha meso ma Nzambi, kulutumimina hoti kutumimina Nzambi e? Haaneeno mvutu yeno bende. 20 Yeto mwanki, tulendi bika mu zonzila misamu mituyeni na mituyudi ko.» 21 Mbuta zi bantu zi Bayudayo babavumisa dyaka, ni babayambula benda. Babaka kibila kye basembila ko mu dyambu di mukangu. Mpe Mukangu wumvimba wedi kembila Nzambi mu musamu bewowo wuhilama. 22 Muntu bewowo wunyaka mu kimangu bekyokyo, wuba wukula kuhyoka mvula makumaya.

23 Bu batumbu babiika, Petelo na Yoane bayenda ku bela bakundi bawu, mpe babayadila mimvimba mi bateela mfumu zinganga-Nzambi na zimbuta zi bantu. 24 Bu bayuwa misamu bemyomyo, kumanima basambila Nzambi mu mutima wumosi ti: «Mfumu, ngeye wuhidika mazulu, butoto, mubu na bima bimvimba bii mu kati. 25 Ngeye wuta mu nzila yi Mpeve Yilongo, mu munwa wu nkaka eto Davidi, kisadi kyaku ti:

"Mu dyambu di nki zinsi zinangumukina e?

Bila nki bantu basidi mfundu, kansi zilembolo ba ndandu e?

26 Ntinu zi ha butoto zitelamani mu nwana mvita

mpe zimfumu zibundani

mu nwanisa Mfumu na Mesiya andi."

27 Wu kedika wudi ti Helode na Ponso Pilatu, babundani ha kimosi mu mbanza beyiyi, na mintwadisi mi zinsi zinzenza na mukangu wu Isaeli, mu nwanisa Yesu kisadi kyaku kilongo, yondowo wu wubyeka. 28 Bahidika mimvimba bemyomyo mu lungisa makani maku ma wukubika ntama mu lulendo na mu luzolo lwaku. 29 Mfumu, tala bwedi bana tufyetikisila, bwabu haana ku bisadi byaku kibakala kye samunina mambu maku mu kivuvu kimvimba. 30 Lambula kooko kwaku mu nyakisa bimbevo, mu sa bidimbu na bimangu mu nkumbu yi Yesu, kisadi kyaku ki longo.» 31 Bu bamanisa mu sambila, kibuka kibayonzimina, kizakama. Bamvimba bafuluka mu Mpeve Yilongo ni bedi longanga Mambu ma Nzambi mu kivuvu kimvimba.

32 Bamvimba bakwikila baba mutima wumosi na mabanza mamosi. Kuba muntu wumosi ko wedi kadiminanga bima byandi ti bi yandi bende. Kansi, bimvimba ha kimosi bedi tuulanga byo. 33 Mu lulendo lungitukulu zintumwa ziteela kimbangi ki mfulukulu mu bafwa yi Mfumu Yesu, mpe Nzambi wuhaana ku yawu bamvimba lusakumu luhyokidi kitezo. 34 Ka muntu ko ha kati dyawu wukondo kima kimfunu. Kedika, yobobo baba na zimfuba hoti zinzo, bayadika zo na batwala mbongo zi bayadikila zo 35 ha ntadisi yi zintumwa. Kadi muntu wedi tambulanga kikunku ki mbongo bonso bubela nsatu zandi.

36 Yosefi, mu-Leviti wumosi wubutuka ku kizanga* ki Sipeli, yondowo zintumwa wubahaana nkumbu yi Banabase, (mpila mosi ti:Yondowo kwe syamisanga), 37 wuyadika butoto bu ba nandi na wuyenda haana mbongo ku zintumwa.