1 Pawuli na Silase bahyokila yi mbanza yi Amfipolisi na yi Apoloni, batuula ku mbanza yi Tesalonika kuba na nzo yi lusambulu yi Bayudayo. 2 Bonso buba kifu kyandi, Pawuli wukota momo. Zisaba zitatu kasa mu mokananga nawu mu myo mitadidi Masonama, 3 wedi bangudilanga na wedi balonkanga ti Mesiya fweti yena mpasi na fweti fuluka mu bafwa: «Kedi bateelanga ti Yesu wunina lusamunina, ni yandi wuu Mesiya.» 4 Mwa ndambu bantu mu bedi muyuwa bakwikila na bayiza ba kintwadi na Pawuli na Silase, ha kimosi mpe na zingeleke zizingi zikwe sambilanga Nzambi na bakento babuzitu.

5 Kansi Bayudayo bafuluka mu musoki, babundana na mwa ndambu yi bimpumbulu bi babaka mu zi nzila. Banangumuka ha kati di mukangu na bakotisa mvwanzi mu mbanza. Bayenda taana nzo yi Yasoni mu kwe sosi Pawuli na Silase mwanki babanata ha ntadisi yi mukangu. 6 Bu balembolo bayena, ni banata Yasoni na mwa ndambu yi zimpangi zihiika ha ntadisi yi zimfumu zi mbanza. Babulana ti: «Bantu bebaba bakotisa mvwanzi mu nza yimvimba, beka bwabu ehaha! 7 Ni Yasoni wubatambudi ku nzo andi. Bantu bebaba bamvimba bana vumina Misiku mi ntinu Kayisali ko. Yawu ntinu yihiika bazebi, ni Yesu.» 8 Misamu bemyomyo midumuna mitima mi mpumbu yi bantu na mi mfumu zi mbanza, 9 ni hahoho, tekila bayambula Yasoni na bahiika, bafweti futa ntalu yi mbongo yi babazengila.

10 Mpimpa bu yitumbu bwa, zimpangi zitinisa Pawuli na Silase ku mbanza yi Beli. Bu batuula, bayenda kota mu nzo yi lusambulu yi Bayudayo. 11 Yawu baba na mitima mimbote kuhyoka Bayudayo ba mbanza yi Tesalonika. Batambula mambu ma Nzambi mu nkatika vema. Mpe kadi kilumbu, bedi fyongoninanga Masonama, mu zaba tala ti mi bedi bateelanga miba mi kedika. 12 Bantu babingi bakwikila. Ha kati di Bangeleke bakento babuzitu na babakala babingi bakwikila.

13 Kansi Bayudayo ba mbanza yi Tesalonika, bu bayuwa ti Pawuli wuna samuna mpe mambu ma Nzambi ku mbanza yi Beli, bayenda koko mu sa mvwanzi na mu lomba ku mpumbu yi bantu yinangumuka. 14 Ni hahoho, zimpangi zitumbu tinisa Pawuli ku ndambusu yi mubu. Kansi Silase na Timote, basaala ha mbanza yi Beli. 15 Yobobo bedi kwe twadisi Pawuli, bamunata natee ku mbanza yi Ateni. Mboki, bavutuka ku mbanza yi Beli. Pawuli wulomba ku Silase na Timote, benda mu nswalu baba kintwadi nandi.

16 Pawuli bu kedi kingilanga Silase na Timote ha mbanza yi Ateni, mutima andi wuvizuka bu kayena mbanza beyoyo yifuluka mu biteki. 17 Ni kedi mokanga mu nzo yi lusambulu yi Bayudayo, na Bayudayo na balembolo ba Bayudayo bedi sambilanga Nzambi, mpe kadi kilumbu na yobobo ba kedi bwabwananga ha kyanzala. 18 Mwa ndambu yi bantu bandwenga, baba mu kabu di Epikuli na di Sitoyisi bayiza mokana nandi. Bahiika bedi tanga ti: «Muntu wu lusuku bewuwu, nki katiidi mu ta e?» Bu kedi samunanga Yesu na mfulukulu mu bafwa, bahiika dyaka, bata ti: «Keti yandi wuna samuna binzambi-nzambi bi zinsi zinzenza.» 19 Ni hahoho bamubongila na bamunatina ha ntadisi yi kimvuka ki luyaalu kyedi kutakananga ku mulandu wu Alewopaze. Ni bamufuula ti: «Nga tulendi zaba nkye ndongosolo yimoona wuna zonzila e? 20 Mu dyambu ti misamu mi wuna tuyuwikisa minzenza midi. Bwabu tutiidi mu zabila myo mbangudulu.» 21 Bisi-Ateni bamvimba na banzenza bedi zinganga mu mbanza beyoyo, bedi hyokisanga ntangu awu mu zonza na mu yuwa mpolo zimona.

22 Pawuli, wutelama ha kati di Alewopaze na wuta ti: «Yeno bantu ba mbanza yi Ateni, ni nayena ti nkatika ludi bantu bakangama mu kinzambi mu mimvimba. 23 Bu nzungani mu mbanza eno mpe nsungimini bumbote bifulu byeno bi lusambulu. Nayeni mpe kuku dimosi dye yokila minkayulu, dii na bisono ebi: "Ku nzambi yi lembolo zabu". Yondowo wululembolo zaba wu lukwe sambilanga, ni yandi nina lusamunina. 24 Nzambi wuhidika nza na bima bimvimba bimomo, ni yandi Mfumu yi yulu na butoto, mpe kazakalanga mu bibuka bilongo bitungu mu moko ma bantu ko. 25 Kaa na nsatu yi lusadusu lu bantu ko, bonso ti nsatu yi kima kinandi, ni yandi kwe haananga ku bamvimba luzingu, kihumunu na bima bimvimba. 26 Yandi wusa ti, makanda mamvimba ma bantu, ma butuka mu muntu wumosi na ma zinga ha luse lumvimba lu butoto. Wubayedikisila zinsungi na wusa ndilu zi bifulu bi bafweti zakidila. 27 Nzambi wusa bobo, mwanki bamusosa, mpe kaati mu mpasi bamubakula, mpeleko kadyandi kukula na kadi muntu mu yeto ko. 28 Mu dyambu ti,

"Ni mu yandi tuu na luzingu,

tukwe ningininanga mpe tudi bonso bu tudi,

Bwabobo mpe bu ta mwa ndambu yi mimbikudi myeno:

Yeto mpe mu kanda dyandi tudi."

29 Tala ti mu kanda dyandi tudi, tulendi banza ko ti Nzambi kafwanakana na kiteki ki wola, ki palata hoti ki tadi, kihalu mu madyela na mbanzulu zi bantu. 30 Bwabu Nzambi zimbakani ntangu zibela bantu ku nsye bunzimbu. Kansi, Nzambi wuna lomba bwabu ku bantu bamvimba, mu bifulu bimvimba bi badi bavilula madyela. 31 Mu dyambu ti wuzenga kilumbu ki kaafundisa nza mu lunungu, mu nzila yi muntu wukasoola. Wulonka kimbangi ku bamvimba bu kamufulukisa mu bafwa.»

32 Bu bayuwa Pawuli bukedi zonzila dyambu di mfulukulu yi bafwa, mwa ndambu yi bantu yimuseha, na bahiika bata ti: «Mu musamu bewowo, mbo tukuyuwa kilumbu kihiika.» 33 Ni hahoho Pawuli kasala basisa. 34 Kansi mwa ndambu yi bantu yimunama na yikwikila. Ha kati dyawu, haba na Deni, wumosi mu zimfumu zi Alewopaze, na mukento wumosi nkumbu andi Damalise, na bahiika dyaka.