1 Pawuli wutuula ku mbanza yi Delebi, mboki wuyenda ku mbanza yi Lisiteli. Kuba na mulongoki wumosi, nkumbu andi Timote, ngudi andi mu Muyudayo wuyiza ba munkwikidi, kansi tata andi wuba Mungeleke. 2 Mpangi zi ku mbanza yi Lisiteli na yi Ikonyomi, zedi muteelanga kimbangi kimbote. 3 Pawuli wutya mu munata. Bu kamubonga, ni kamuzengoso bubakala mu dyambu di Bayudayo baba mu bizunga bebyobyo, mu dyambu ti bamvimba bazaba ti tata andi Mungeleke wuba. 4 Mu zimbanza mu bedi kwe hyokidi, bedi kwe zabikisi ku zimpangi nzengolo zi bonga zintumwa na bakuluntu ba ku mbanza yi Yelusalemi, mpe bedi kwe balombi mu vumina zo. 5 Mabundu medi syama mu kiminu, mboki lutangu lu minsambidi myedi bwesamanga kadi ki kilumbu.

6 Pawuli na Silase bahyokila yi kizunga ki Filizi na ki Ngalatiya, mu dyambu ti Mpeve Yilongo yibakakidila mu samuna Mambu ma Nzambi mu kizunga ki Aziya. 7 Bu baba bela-bela na kizunga ki Misi, bakubama mu kota mu kizunga ki Bitini, kansi Mpeve yi Yesu yibakakidila. 8 Buna bahyokila yi kizunga ki Misi na bakulumuka ku Towasi.

9 Mu mpimpa, Pawuli wutambula mbweno yimosi: mwisi-Masedwani wumuyenikina wutelama, na wedi mubombidila ti: «Hyokila ku nsi yi Masedwani, yiza wutusadisa!» 10 Ku manima ma mbweno beyoyo, ni tutumbu sosa mu kwenda ku nsi yi Masedwani, mu dyambu ti tukwikila ti Nzambi wedi tutumisa koko mu kwe samuna Musamu Wumbote.

11 Bu tukota mu masuwa ha mbanza yi Towasi, ni tutumbu kwenda ku Samotasi. Mpe kilumbu kilanda, ni tuyenda ku mbanza yi Neyapolisi. 12 Bu tukatuka hoho, ni tuyenda ku Filipi, yiba mbanza yintete yi kizunga ki Masedwani, yedi yaalanga bisi-Loma. Tuhyokisa mwa bilumbu bifwana mu mbanza beyoyo. 13 Mu kilumbu ki saba, tuduuka mu mbanza, mu kwenda ha kumu di muhwila, ku twedi banzila ti twaabaka ki bu katoma kye sambidila. Tuzakala, ni twedi zonza na bakento baba bakutakana hoho. 14 Wumosi mu bakento bebobo, nkumbu andi yiba Lidi, mwisi-mbanza yi Tiyatili. Wuba munkiti wu milele mimbwaki mintalu na wedi yenanga Nzambi bunkuta. Wedi tuyuwa, mpe Mfumu wumuzibula mutima mwanki ka toma yuwa misamu myedi ta Pawuli. 15 Wubotoko ha kimosi na kanda dyandi, mboki wutubombidila, ni kata ti: «Tala ti meno wukwikama nidi mu Mfumu bonso bu luna yenina, Yizeeno lulambalala mu nzo ani.» Na wutukwikisa mu tambula.

16 Kilumbu kimosi, bu twedi kwenda ha kibuka ki lusambulu, kisadi kimosi ki ndumba kiyiza tubwana, kiba na mpeve yi mboma yedi musadilanga mu ta misamu myaakwiza kuntwala. Mpe mbikudulu zandi zedi vwamisanga zimfumu zandi. 17 Wutona mu kwe tulandi yeto na Pawuli buna wuna kwe bulani ti: «Bantu bebaba, bisadi bi Nzambi Yihyokidi Kuzangama badi, mpe yawu bana tulonka nzila yi mpulusu.» 18 Bilumbu bibingi kedi sanga bobo. Mfiti bu zihyokila kitezo, Pawuli wubaluka na wuta ku mpeve ti: «Na kulombidi mu nkumbu Yesu-Klisto duuka mu yandi.» Hansi na nsi, wuduuka.

19 Zimfumu zandi bu ziyena ti zilendi bwesa mubakila mbongo ko, ni zibwila Pawuli na Silase. Babanata ha kyanzala ha ntadisi yi mimfundisi. 20 Babalonka ku mimfundisi mi Loma na bata ti: «Bantu bebaba, Bayudayo badi, mvwanzi bana kotisa mu mbanza eto, 21 mpe bana longa ku yeto tudi kweto bisi-Loma, kinkulu ki tulembolo ba na luve mu tambula na mu sadila.»

22 Mpumbu yi bantu mpe ni yi banangumukina. Mimfundisi milomba babakatula binkutu byawu na babazuba bikoti. 23 Bu bamana bazuba bikoti, babakotisa mu boloko. Mpe balomba ku munkengi wu boloko katoma bakenga bumbote. 24 Munkengi bu katambula lutumu belolo, wubakotisa mu kihinga kii ku kati di boloko na wubatuula malu mu kikulu.

25 Mu kati-kati di mpimpa, Pawuli na Silase basambila na bayimbila mikunga mu kembila Nzambi. Zinkole zihiika zedi bayuwa. 26 Hansi na nsi, butoto buzakama mu nkatika ngolo na lufulu lu nzo luningana. Myelo mimvimba mi tumbu zibuka na bisengo bi bakanga zinkole zimvimba bibwa. 27 Munkengi wu boloko bu katemona na bu kayena myelo mi boloko mizibuka, wutotola mbele andi yi mvita mu lukutu na wusaka kihonda, mu dyambu ti mu mayindu mandi, zinkole zimana woka. 28 Kansi Pawuli wulooka mu ngolo ti: «Ku kihondandi ko! Yeto bamvimba tuu kweto haha!» 29 Munkengi wulomba mwinda, wukota mu muswalu mu boloko, mpe na kintekoto, wubwa ha malu ma Pawuli na Silase. 30 Ku manima, wubaduukisa ha mbazi na wubafuula ti: «Matata mani, nki fweti sa mu baka mpulusu e?» 31 Bamuvutudila ti: «Kwikila mu Mfumu Yesu na mbo wubaka mpulusu, ngeye na kanda dyaku.» 32 Ni basamuna mambu ma Nzambi ku yandi na ku yobobo baba mu nzo andi. 33 Mu ntangu beyoyo kwandi yi mpimpa, munkengi wubanata na wusukula mputa zawu. Mboki, wutambula mbotokolo, yandi na bantu bandi. 34 Bu kabanata ku nzo andi, wubahaana bindya. Wuyangalala ha kimosi na kanda dyandi bu bakwikila mu Nzambi.

35 Bwisi bu bukya, mimfundisi mi Loma mitambika bisadi byawu mwanki benda bateela ku munkengi wu boloko ti: «Haana bantu bebobo kimpwanza.» 36 Munkengi wu boloko wutudisa mpolo ku Pawuli ti: «Mimfundisi milombidi baluyambula. Duukeeno bwabu na yendeeno mu kiyenge.» 37 Kansi Pawuli wuta ti: «Batuzubidi bikoti ha meso ma bantu, mpe wulembolo fundusu, batukotisi mu boloko mpeleko bisi-Loma tudi, na batiidi bwabu mu tuhaana kimpwanza mu mansweki e? Bulendi ba ko. Biza yawu bende batuhaana kimpwanza!» 38 Bisadi biyenda yala mpolo ku mimfundisi. Mimfundisi ni miyena bunkuta bu bayuwa ti Pawuli na Silase bisi-Loma badi. 39 Bayiza balomba mulemvo, mpe bu babayambula, babalomba bakatuka ha mbanza. 40 Bu baduuka mu boloko, Pawuli na Silase bayenda ku nzo yi Lidi. Bayenikina zimpangi mu bakindisa, mboki ni bayenda.