1 Mu bilumbu bebyobyo, lutangu lu milongoki lubwesama. Bayudayo bakwe zonzanga ndinga yi kingeleke banyungutila Bayudayo bakwe zonzanga ndinga yi kihebeleo mu dyambu ti bedi zimbakananga mafoola mawu mu nkabululu yi bindya bi kadi kilumbu. 2 Ni hahoho, zintumwa kumi na zole zikutikisa milongoki mimvimba na zihaana ndombolo eyi: «Kambote ko ti yeto tubiika mu samuna Mambu ma Nzambi mu dyambu di nkabululu yi bindya ha meza. 3 Ni hahoho zimpangi zeto, bufwanakani lusoola ha kati dyeno babakala nsambwadi bazabakana mu nsalulu awu yimbote mpe bafuluka mu ndwenga na mu Mpeve Yilongo, mwanki tubahaana kisalu bekyokyo. 4 Yeto, mbo tutatamana mu lusambulu na mu longa Mambu ma Nzambi.» 5 Dibundu dimvimba ditambula ndombolo beyoyo. Ni basoola Tyeni, muntu wu wufuluka mu kiminu na mu Mpeve Yilongo, Filipi, Polokoli, Nikanoli, Timoni, Palamenasi na Nikola mwisi-Antiose wukota mu dibundu di Bayudayo. 6 Ku manima, babanata ha ntadisi yi zintumwa. Zintumwa zibasambidila na zibatentika moko. 7 Mambu ma Nzambi matatamana mu mwangana bubwingi. Mpe lutangu lu milongoki lwedi bwesamanga bubwingi ku Yelusalemi, na Nganga-Nzambi zizingi zi kwikila mu Yesu.

8 Tyeni wuba wufuluka mu kiminu na mu lulendo. Wedi hidikanga bidimbu bingitukulu na bimangu ha kati di mukangu. 9 Mwa ndambu yi bantu yi nzo yi lusambulu yi Bayudayo yi bakwe tumisinanga ti: «Nzo yi lusambulu yi Mindongo mibeki kimpwanza», mpe bisi-Sileni na bisi-Alezandi, ha kimosi na Bayudayo ba ku Silisi na ku Aziya bedi yumana na Tyeni. 10 Kansi balembakana mu mubedisa, mu dyambu ti wuzonza mu ndwenga zi muhaana Mpeve Yilongo. 11 Ni hahoho, bahaanina nsye kooko ku bantu mwanki ba ta ti: «Tumuyudingi buna wuna safula Mose na Nzambi.» 12 Ni basa ti mukangu, bakuluntu na milongisi mi Misiku banangumuka. Ku manima, babwila Tyeni na bamunata ha ntadisi yi kimvuka ki bakuluntu ba Bayudayo. 13 Banata zimbangi zi luvunu zi ta ti: «Muntu bewuwu wuna tatamana mu safula kibuka ki longo na Misiku. 14 Tu muyudingi wuna ta ti Yesu mwisi-Nazaleti waamwangisa kibuka bekyokyo na waakitula Misiku mi tuhaana Mose.» 15 Bamvimba baba mu nzo yi kimvuka ki bakuluntu ba Bayudayo basungimina Tyeni na bayena kini kyandi kikituka bonso ki mbazi yi Nzambi.