1 Mu ntangu yiba Apolose ku mbanza yi Kolinto, Pawuli wuhyokila yi kizunga ki milandu ki Aziya na wutuula ku mbanza yi Efeso. Wubwana koko mwa ndambu yi milongoki, 2 na wubateela ti :«Nga lutambula Mpeve Yilongo mu ntangu yi lukwikila e?» Bamuvutudila ti: «Yeto tuyuwa kani fyoti ko ti bana zonzila Mpeve Yilongo.» 3 Wufuula ti: «Nkye mbotokolo bwabu lutambula e?» Bamuvutudila ti: «Mbotokolo yi Yoane.» 4 Pawuli wubateela ti: «Yoane wubotika yobobo batambula mu vilula madyela, mpe wulomba ku mukangu wu Isaeli wukwikila mu yondowo wedi kwiza ku manima mandi, ni Yesu.» 5 Bu bamana yuwa mpova bezozo, batambula mbotokolo mu nkumbu yi Mfumu Yesu. 6 Pawuli bu kabatentika moko, Mpeve Yilongo ni yikulumuka mu yawu na batona mu zonza ndinga zinzenza na mu bikula. 7 Kampe bantu kumi na bole baba.

8 Ku manima, Pawuli wukota mu nzo yi lusambulu yi Bayudayo, mu kedi zonzila na kivuvu kimvimba. Wuzonzila kimfumu ki Nzambi mu ngonda zitatu, mpe wedi sosa ti yobobo bedi muyuwa bakwikila. 9 Kansi mwa ndambu yikanga mutima na yibisa mu kwikila, yedi vweza nzila yi Mfumu ha ntadisi yi bundu dimvimba. Pawuli wusala basisa na wuyenda ha luhengo ha kimosi na milongoki. Mpe kadi kilumbu, wedi bazonzilanga mu nzo yi ndongosolo yi muntu wumosi nkumbu andi Tilanusi. 10 Kisalu kizingila mvula zole, ku manima, bantu ba kizunga ki Aziya, Bayudayo na balembolo ba Bayudayo, bayuwa Mambu ma Mfumu.

11 Nzambi wedi sanga bimangu bingitukulu mu Pawuli. 12 Bedi bonganga milele hoti bitende bikusama nitu yi Pawuli. Mpe bakusa byo ku zimbevo. Mbevo zinyaka na mpeve zimbi ziduuka mu yawu.

13 Mwa ndambu yi Bayudayo, mimpyoka nzila mikwe kumingi mpeve zimbi, basinsa yawu mpe mu sadila nkumbu yi Mfumu Yesu mu yobobo baba balwatu ku mpeve zimbi. Bata ti: «Tululombidi luduuka mu nkumbu yi Yesu bewowo wuna samuna Pawuli.» 14 Yobobo bedi sanga bobo, ni baala nsambwadi ba Seva, Muyudayo wumosi, mfumu nganga-Nzambi kaba. 15 Mpeve yimbi ni yibavutudila ti: «Yesu yandi nzebi, mpe nzebi Pawuli nani kadi. Bwabu yeno banani ludi e?» 16 Muntu wuba na mpeve yimbi wubwa mu nitu zawu, wubavudila ngolo na wubayenisa mpasi zizingi. Mpe, mpene baduuka mu nzo beyoyo na nitu zawu zifuluka mu mputa. 17 Musamu bewowo wuzabakana ku Bayudayo bamvimba na Bangeleke bedi zinganga ku mbanza Efeso, bayiza ba na bunkuta bubwingi na bakembila bunene bu nkumbu yi Mfumu Yesu.

18 Babingi mu yobobo bakwikila bedi kwizanga mu fungula ha meso ma bantu misamu mimbi mi basa. 19 Mwa babingi mu yobobo bedi sadilanga mikisi batwala mabuuku mawu na bayoka mo ha ntadisi yi bantu bamvimba. Bateza ntalu yi mabuuku bemomo, kampe yiba mafunda kumi ma mbongo zi bisengo. 20 Bwabobo Mambu ma Mfumu medi kwe mwangininingi, na medi kwe yenikisingi lulendo.

21 Misamu bemyomyo bu mihyoka, Pawuli wukubika nzyetolo mu kwenda ku mbanza yi Yelusalemi, wuhyokila mu kizunga ki Masedwani na ki Akayi na wuta ti: «Bu naatuula koko, mfweti kwenda mpe ku mbanza yi Loma.» 22 Wutambika ku kizunga ki Masedwani bilandi byandi byole, Timote na Elasiti. Yandi bende wusala dyaka mwa bilumbu ku kizunga ki Aziya.

23 Mu ntangu beyoyo, mvwanzi yingolo yibwa mu dyambu ditadidi nzila yi Mfumu. 24 Kisadi kimosi ki palata, nkumbu andi Demetiyuse, wedi hidikanga mu palata mwa zinzo zi nzambi zi Alitemise, nzambi yi mukento, mpe wedi haananga ku bisadi mbongo zizingi. 25 Wukutikisa bisadi byandi ha kimosi na yobobo bedi salanga kisalu kimosi na yawu. Wubateela ti: «Bakundi bani, luzebi ti mubakulu weto mu kisalu bekiki wudi.» 26 Bwabu luna yena na luna yuwa, ka ku mbanza yi Efeso kaka ko, kansi fisidi kwa natee mu kizunga kimvimba ki Aziya, Pawuli bewowo wulendidi mu sa ti mpumbu yi bantu yikwikila na yilanda nzila yihiika. Wubateedidi ti binzambi-nzambi bihiduku mu moko ma bantu, bii zinzambi ko. 27 Ka kisalu kyeto kaka ko kilendi vwezo, kansi bwasa mpe ti mfunu yi nzo-nzambi yi Alitemise, nzambi yi mukento, yi manisa. Bumosi mpe balendi kulula dyaka bunene bu kimfumu ki mukento bewowo wu bakwe sambilanga ku bantu ba kizunga ki Aziya na baa mu nza yimvimba.

28 Bu bayuwa bobo, babaka mankesi mangitukulu na batona mu looka ti: «Masiika ku Alitemise yi bantu ba Efeso!» 29 Mvwanzi yikota mu mbanza yimvimba. Ha kimosi bamvimba balundumuka ku nzo yi bimpa, bu bedi hyoka basala twadikisa Ngayusi na Alisitalaki, bantu ba kizunga ki Masedwani, bakundi ba nzyetolo ba Pawuli. 30 Pawuli wutya mu kilonka ha ntadisi yi mukangu, kansi milongoki mimudika, 31 mpe mwa ndambu yi bisadi bi luyalu bi kizunga ki Aziya, baba bakundi bandi, ba mutambikila muntu wumosi mu mulomba kabika mu kwenda ku nzo yi bimpa. 32 Mu ntangu beyoyo, mvwanzi yikota ha kati di lukutakanu, bantu balooka mu dyambu dimosi, bahiika mu dyambu dikaka. Buna babingi bedi lembolo zaba nki bayonzimina. 33 Bantu ha kati di mpumbu yibangula musamu ku Alezandeli, yondowo Bayudayo wu bateekisa ku mutwala. Bu kalabikisa, wutya mu zonza ku mukangu. 34 Kansi, bu babakula ti Muyudayo kaba, bamvimba balooka bilokola byole mu ndinga yimosi ti: «Masiika ku Alitemise yi bantu ba mbanza yi Efeso!»

35 Kisoniki ki mbanza, kilenda mu dingimisa mpumbu yi bantu na wuta ti: «Bantu ba mbanza yi Efeso, nkye muntu zimbakani ti mbanza yi Efeso, yawu yii nkebi yi nzo-nzambi yi Alitemise, nzambi yiyinene yi mukento na kiteki kyandi kibwa tuka ku yulu e?» 36 Dyambu bedyodyo balendi dye bindila mpaka ko. Buna dingameno mpe luhidikilandi dyo mu nswalu ko. 37 Lutwedi bantu bebaba ehaha balembolo yiba kima ki nzo-nzambi mpe basafudi nzambi eto yi mukento ko. 38 Tala ti Demetiyuse na bakundi bandi ba kisalu dyambu dii nawu na muntu, tuna zinzo zi lufundusu na mimfundisi. Kokoko bafweti fundila musamu. 39 Mpe tala ti luu na misamu mihiika, myaahiduku mu kati di lukutukunu luzabakani ku luyaalu. 40 Tulembolo sa keba, balendi tufuunda bonso bantu banangumukini mu mi mihyokidi bubedidi. Twaalenda ko mu haana mbangululu yifwanakani mu kuyonzama bekuku. Bu kamana zonza bobo, wutulula lukutukunu.