1 Bu tumana vuuka, tuyuwa ti nkumbu yi kizanga bekyokyo: Malite. 2 Bisi-bwala, batubwana bumbote. Mvula bu yitona mu noka mpe kyozi bu kiba kikingi, banamika tiya tutunene na batulomba tufinama hoho. 3 Pawuli wutoota kiko ki nkuni ziyuma na wutuula zo ku tiya. Kansi, mu dyambu di mbangasi, mpidi yimosi yiduuka na yimunamitina mu kooko. 4 bisi-bwala bu bayena mpidi yina lela mu kooko kwandi, batelasana yawu na yawu ti: «Bakala bedidi, mumpondi wudi. Mpeleko, vuukidi mu mubu, kansi mfundusu yi Nzambi yina mubiika ko mu ba wumoyo.» 5 Pawuli wusansumuna nyoka ku tiya na kayena kani mpasi ko. 6 Bantu bedi kingila nitu andi yivimba hoti katumbu fwa. Kansi, bu bakingila ntangu yiyingi, bayena ti kani dyambu di mpasi dimutudila ko. Ni basanza nzonzolo awu na bata ti: «nzambi yidi!»

7 Bela-bela na kibuka bekyokyo, haba na mfuba yi munanga wuntete wu kizanga, nkumbu andi Pubiluse. Wutubwana bumbote, na wutulambikisa ku nzo andi bilumbu bitatu. 8 Tata di Pubiluse diba dilambalala ha mbuka. Yuku-yuku diba nandi na matikitiki. Pawuli wuyenda muvunga, na wusambila. Bu Kamutentika moko, ni kamunyakisa. 9 Ku manima, Mbevo zihiika zi kizanga bekyokyo ziyiza mpe, na zinyaka. 10 Batuzitisa bubwingi, mpe mu ntangu yi twedi kota mu masuwa, batuhaana bimvimba biba mfunu mu nzyetolo eto.

11 Ngonda zitatu zihyoka, ni tukota dyaka mu masuwa ma mbanza yi Alezandi ma bakwe tumisinanga ti Dyosikuli*, mahyokisila nsungi yi kyozi kingolo ha kizanga bekyokyo. 12 Tutuula ha mbanza yi Silakuze ha tuhyokisila bilumbu bitatu. 13 Kutonina hoho, tulanda kumu natee ku mbanza yi Lengiyo. Kilumbu kilanda, kitembo ki sude kitona mu kukula. Ku manima ma bilumbu byole, ni tutuula ha mbanza yi Puzolesi. 14 Ha mbanza beyoyo, tubwana zimpangi zi tulomba tuhyokisa nawu lumingu lumvimba. Bwabobo tuyendila ku mbanza yi Loma. 15 Mpangi zi mbanza yi Loma ziyuwa nsangu zeto, ziyiza tubwani natee ha zandu di Apiyuse na ha zinzo zitatu zi banzenza. Pawuli bu katumbu bayena, wutonda Nzambi na wubaka ngolo. 16 Bu tutuula ha mbanza yi Loma, Pawuli wutambula luve mu baka nzo ye zakalanga yandi bende na mbulu-mbulu yedi mukebanga.

17 Bilumbu bitatu bihyoka, Pawuli wukutikisa ku nzo andi zimfumu zi Bayudayo zi mbanza yi Loma. Bu zimana yonzama, wubateela ti: «Mpangi zani, nazebi ti nahidikidi musamu wumbi ku mukangu eto ko, mpe natinguni Misiku mi zinkaka zeto ko. Kansi, ha mbanza yi Yelusalemi bankanga mpe banyekola mu moko ma bisi-Loma. 18 Bu bamana mvwika byuhu, baba na mayindu me mpana kimpwanza, mu dyambu ti bambakila kibila ko kilendi sa ti banzengila lufwa. 19 Kansi, Bayudayo bambangisa, buna nabindama mu lomba bamfundisa ha ntadisi yi Kayisali, mpe naba na mayindu me funda mukangu ani ko. 20 Ni hahoho, ndombidi naluyena mpe nazonza neeno. Mu dyambu di kivuvu ki Isaeli nidi wukangama mu misinga bemimi mi bisengo.» 21 Bamuvutudila ti: «Tutambudi kani mukanda wumosi wufumini ku Yuda mu dyambu dyaku ko, mpe kani mpangi yimosi yi yizidi mu tuteela dyambu dimbi mu nitu aku ko. 22 Kansi tutiidi mu yuwa mabanza maku mu munwa wu ngeye bende, mu dyambu ti tuzebi bwedi kabu bedyodyo dina bwanina mfyetokoso mu ndambu ka ndambu.»

23 Basoola kilumbu kye kutakana na bayiza mu mpumbu yiyinene ku nzo andi. Kutonina mu mene natee mu nkokila, Pawuli, mu kinzonzi kyandi, wedi basamunina Kimfumu ki Nzambi. Mpe mu nzila yi Misiku mi Mose na Mimbikudi, wedi sosa ti bakwikila mu Yesu. 24 Mu myo mikedi zonza, bantu bakwikila, kansi bahiika babisa mu kwikila. 25 Ntangu ye vutuka buyifwana, bantu bedi yuwasana ko yawu na yawu. Ni hahoho Pawuli kabwesila dyambu edi: «Mpeve Yilongo wukedika kata mu munwa wu matata meno na wu mumbikudi Yesaya, 26 bu kata ti:

Yenda wuta ku mukangu bewowo ti:

Luna toma yuwa, kansi luna bakula ko,

Luna toma tala kansi luna yena ko,

27 Mu dyambu ti mitima mi bantu bebaba myeka ngolo.

Bakengi makutu mawu,

na bazimini meso mawu,

mwanki balembolo yena mu meso mawu,

balembolo yuwa mu makutu mawu,

na balembolo bakula mu mitima myawu,

mwanki balembolo vutuka kuu meno, mpe na banyakisa.

28 Zabeeno wo bwabu ti Nzambi tambikidi mpulusu ku yobobo balembolo ba Bayudayo, yawu mbo bamuyuwa.»

29 [Pawuli bu kamana zonza bobo, Bayudayo bayenda na bedi kwe vutasani mungolo yawu na yawu]

30 Pawuli wuhyokisa mvula zole zimvimba mu kati di nzo yikedi futilanga. Wedi tambulanga bantu bamvimba bedi kwizanga mu muyena. 31 Wedi samunanga kimfumu ki Nzambi na wedi longisanga, mu kivuvu kimvimba na mu kimpwanza, myo mitadidi Mfumu Yesu-Klisto .