1 Bu tumana hambana, ni tukota masuwa mu nzila yi mubu, mu kwenda ku kizanga ki Kose, mboki kilumbu kilanda, tuyenda ku kizanga ki Lodesi. Bu tukatuka hoho, ni tuyenda ku mbanza yi Patala. 2 Tubwana koko masuwa medi kwenda ku kizunga ki Fenisi. Tukota momo, na tuyenda. 3 Bu tuyenda ba bela-bela na kizanga ki Sipeli, ni tuyendisa ku lumoso lu kizanga bekyokyo, mu kwenda ku nsi yi Siliya. Tutuula ha mbanza yi Tile na masuwa makangama mu kulumuna bifunda. 4 Bu tubakula milongoki mi ba hoho, ni tuzakala kisabala kimvimba hoho. Mpeve Yilongo yibalwengisa, ni balomba ku Pawuli kabika mu kwenda ku mbanza yi Yelusalemi. 5 Kisabala bu kimanisa, ni tuyenda. Milongoki mimvimba miyenda tufila ha kimosi na bakento, na baala natee ku mbazi yi mbanza. Tufukama ha kumu di mubu na tusambila. 6 Ku manima me haanasana zimbote zimanunu, tukota mu masuwa. Yawu ni bavutuka ku zinzo zawu. 7 Tumanisa nzyetolo eto yi mu mamba, tuka mbanza yi Tile natee ku mbanza yi Pitolemayisi. Tuhaana zimbote ku zimpangi hoho, mpe tuhyokisa kilumbu kimvimba nawu. 8 Kilumbu kilanda, ni tuvutuka ku mbanza yi Sezale. Tukota mu nzo yi Filipi, mulongisi wu Musamu Wumbote, ni tuzakala momo. Yandi wuba wumosi mu bantu nsambwadi babasoola ku mbanza yi Yelusalemi. 9 Ndumba ziya zilembolo zaba babakala ziba nandi, zedi bikulanga. 10 Bu tuzakala bilumbu bibingi hoho, mumbikudi wumosi wufuma ku kizunga ki Yuda, wuyiza tuula, nkumbu andi Angabusi. 11 Bu kayiza tuyenikina, wubonga melika yi Pawuli, wukanga moko na malu mandi, na wuta ti: «Mpeve Yilongo ebu kateedi: muntu vwidi melika beyiyi, bwabobo mpe Bayudayo bamubindikila misinga ku mbanza yi Yelusalemi, mpe baamuyekodila mu moko ma banzenza.» 12 Bu tuyuwa bobo, yeto na minkwikidi mi mbanza yi Sezale, tubombidila Pawuli kabika mu tomboka ku mbanza yi Yelusalemi. 13 Kansi wubavutudila ti: «Nki luna didila na nki luna ntatikisila mutima e? Meno nkubamani kaka mu binduku misinga ko, kansi na mu fwa ku mbanza yi Yelusalemi mu dyambu di Mfumu Yesu.» 14 Bu kabisa mu tuyuwila, yeto mpe ni tubiika kweto. Ni tumuteela ti: «Bika luzolo lu Mfumu luvangama.»

15 Mwa bilumbu bihyoka, bu tukubama, ni tutomboka ku mbanza yi Yelusalemi. 16 Mwa ndambu yi milongoki mi mbanza yi Sezale miyenda ha kimosi neto. Mitunata ku nzo yi muntu wumosi ku tulambidila. Nkumbu andi Masoni, mwisi-Sipeli. Wuba mulongoki tuka ntama.

17 Bu tutuula ku mbanza yi Yelusalemi, zimpangi zitubwana mu kyese. 18 Kilumbu kilanda, Pawuli wuyenda ha kimosi neto ku nzo yi Zaki ku mana kutakana bakuluntu ba dibundu. 19 Bu kamana bahaana mbote, wubayadila mimvimba mihidika Nzambi mu kisalu kyandi ha kati di balembolo ba Bayudayo. 20 Bu bamana muyuwa, batona mu kembila Nzambi. Mboki bamuteela ti: «Yeni, mpangi eto, nkye mpila lutangu lu mafunda ma Bayudayo meka minkwikidi, mpe bamvimba bana lonka vema mu zitisa Misiku. 21 Kansi, yawu bayudi ti ngeye wuna sindisila Bayudayo bakwe zinganga ha kati di yobobo balembolo ba Bayudayo, balosa Misiku mi Mose, babika mu zengoso baala bawu bubakala mpe babika mu landa kinkulu ki Bayudayo. 22 Nki bifwanakani mu sa e? Mu dyambu ti yawu baazaba ti ngeye tuudidi. 23 Sadila bwabu mi twaakuteela. Babakala baya baa neto haha badidi ndefi. 24 Yenda nawu, ba kintwadi nawu bu baasa mukembo wu mvedosolo, mpe bafutila mbongo mwanki babahempa makungulu ku mutu. Bwabobo bantu bazabila ti misamu mibayudi mu nitu aku, mi luvunu kwandi midi. Kansi, ngeye mpe kwe tumamanga mu Misiku mi Mose. 25 Ku yobobo balembolo ba Bayudayo beka minkwikidi, tubasonikini mubahaana ntumunu eyi: ka mu dyanga bibulu bi baheeni munkayulu ku biteki ko, ka menga ko, ka bibulu bifwidi bilembolo zengo ngongodinga ko, mpe ka musanga kindumba ko.»

26 Pawuli wunata babakala bebobo na wukivedisa ha kimosi nawu. Mpe kilumbu kilanda, wuyenda kota mu nzo-Nzambi mu zabikisa kilumbu ki baakanga mukembo wu mvedosolo, na ntangu kadi muntu yi kahaanina munkayulu andi.

27 Kisabala bu kiba bela-bela mu hwa, Bayudayo ba kizunga ki Aziya bu bayena Pawuli mu nzo-Nzambi, banangumuna mukangu wumvimba na bamubwila. 28 Babulana ti: «Ba-Isaeli, tubakiseeno! Taleeno muntu bewuwu wuna kwe haani ku bamvimba, mu ndambu ka ndambu, ndongosolo yi lembolo fwanakana, yina mwangisa mukangu, Misiku mi Mose na nzo-Nzambi. Bwabu, kotisi mpe mu nzo-Nzambi bantu balembolo ba Bayudayo na safudi mpe kibuka bekiki kilongo!» 29 Mu dyambu ti batekidi yena Tofimi, mwisi-Efeso, ha kimosi nandi mu kati di mbanza. Ni bayindudi ti Pawuli wumukotisi mu nzo-Nzambi.

30 Mbanza yimvimba yi nangumuka. Mukangu wufuma mu ndambu ka ndambu, wuyiza mu ntinu . Babwila Pawuli, bamuduukisa ku mbazi yi nzo-Nzambi, ni batumbu kanga myelo. 31 Bu bedi sosa mu honda Pawuli, kansi mfumu yi zimbulu-mbulu yi Loma wuyuwa ti mvwanzi yikotidi ha mbanza yimvimba yi Yelusalemi. 32 Wutumbu yonzika zimbulu-mbulu na mfumu zi zimbulu-mbulu nkama, ziyenda kubela mukangu. Bantu bu bayena mfumu beyoyo na zimbulu-mbulu, ni babika mu tuta Pawuli nkuba. 33 Mfumu yi zimbulu-mbulu wufinama ha Pawuli. Wumukangusu na wutuma bamubindika misinga myole mi bisengo. Mboki, wufuula nani kadi mpe nkye musamu kasiidi. 34 Kansi, mu kati di mpumbu, bantu balookana mu ta musamu wumosi, bahiika mu ta musamu wuhiika. Mfumu yi zimbulu-mbulu bukedi lembolo bakula kani dyambu dimosi mu dyambu di mvwanzi, ni katuma banata Pawuli mu boloko. 35 Pawuli bu katuula mu bikada, zimbulu-mbulu ni zimunanguna mu dyambu di mpumbu yi bantu yedi sa mvwanzi yingolo. 36 Bantu babingi bedi kwe balandi, bedi kwe bulani ti: «Kafwa!»

37 Mu ntangu yi bedi saka mu mukotisa mu boloko, Pawuli wuta ku mfumu yi zimbulu-mbulu ti: «Nga lendi mpaana luve lwe zonza mwa dyambu e?» Mfumu yi zimbulu-mbulu wumufuula ti: «Zebi mu zonza kingeleke e? 38 Ka ngeye ko mwisi-Ngipiti bewowo, wusidi ti bantu banangumuka mwa bilumbu bebibi mpe wuneti ku nsi yinkatu mafunda maya ma binkita bi na mata e?» 39 Pawuli wumuvutudila ti: «Meno, Muyudayo nidi. Nabutuka ku mbanza yi Talisi mu kizunga ki Silisi, muntu wu mbanza yimfunu. Ndemvokila, mpaana luve nazonza ku mukangu.» 40 Mfumu yi zimbulu-mbulu wumuhaana luve lwe zonza. Pawuli wutelama ha yulu bikada, wulabikisa mukangu. Bamvimba badingama na Pawuli wubazonzila mu ndinga yi kihebeleo: