1 Mu ntangu beyoyo, ntinu Elode wutona mu kwamisa binama bihiika bi dibundu. 2 Wuhonda mu mbele yi mvita Zaki, mpangi yi Yoane. 3 Bu kayena ti musamu bewowo wuyangidika Bayudayo, ni kakangusu Petelo mu ntangu yi mukembo wu mampa ma kiputi kilembolo vimba. 4 Bu kamukangusu na bu kamutuba mu boloko, wulomba ku makabu maya mana zimbulu-mbulu ziya mu kadi kabu mu mukenganga. Wuba na mayindu me mu fundisa ha meso ma mukangu ku manima ma mukembo wu Pake. 5 Petelo bu kaba mu boloko, dibundu ditatamana mu sambila Nzambi mu dyambu dyandi.

6 Mpimpa yi tekila kilumbu Elode ki kaketi mufundisa, Petelo wubwa tolo ha kati di zimbulu-mbulu zole, wuba wubinduku mu misinga myole mi bisengo, mpe minkengi miba ha mwelo wu boloko. 7 Mbazi yimosi yi Mfumu yitumbu yenika, mpe kukya kulezima mu kihinga. Mbazi yisungika Petelo, yimusimba mu lubanzi. Yimuteela ti: «Telama munswalu!» Misinga mi bisengo mi ba nandi mu moko minyanguka. 8 Mboki mbazi yi yimuteela ti: «Lwata melika na nsampatu zaku.» Ni kasa bobo. Mbazi yi muteela dyaka ti: «Lwata kiyunga kyaku mpe ndanda.» 9 Petelo wutotoka ni kedi kwe mulandi. Kansi kazaba ko ti misamu myedi hidika Mbazi mi ba mi kedika: wubanzila ti mbweno kabeki. 10 Bahyoka minkengi mintete, mboki minzole, ni batuula ha mwelo wu kisengo wutadisa ku mbanza. Mwelo bu wuzibuka wabende ha ntadisi awu, ni baduuka. Bedi kwe yendi mu bala-bala yimosi, mboki Mbazi yitumbu sisa Petelo.

11 Kimuntu bu kimuvutuka, Petelo wuta ti: «Bwabu mbakudi ti Mfumu ntambikidi Mbazi andi mu nkuula mu moko ma Elode na mimvimba mimbi myedi saka mpidikila mukangu wu Bayudayo.»

12 Bu kabakula, wuyenda ku nzo yi Maliya ngudi yi Yoane, wuba kwe tumisina dyaka ti Malako. Bantu babingi bakutakana kooko na bedi sambila. 13 Petelo bu kakonkota ha mwelo wu nkotolo yi lupangu, kisadi kimosi ki mukento nkumbu andi Lode, wuyiza ha mwelo mu yuwa. 14 Wubakula ndinga yi Petelo. Mu kyese bekyokyo, kazibula mwelo ko, wuyenda kota mu ntiinu mu nzo, mu kwe ta ti Petelo wuu wutelama ha mwelo. 15 Bamutuka ti: «Ngeye wulahuka wudi!» Kansi yandi wutatamana mu ta ti wukedika wudi. Ni bata bwabu ti: «Buna Mbazi andi yidi.» 16 Petelo wutatamana mu konkota. Bu bazibula, bayituku mu muyena. 17 Wubalabikisa mwanki babika mu sa lusuku na wubayadila bwedi Mfumu kamuduukisila mu boloko. wubwesa ta ti: «Yendeeno luta wo ku Zaki na ku zimpangi zani zihiika.» Mboki, wuduuka na wuyenda ha kibuka kihiika. 18 Bwisi bu bukya, mvwanzi yiyinene yikota ha kati yi zimbulu-mbulu. Zikifuula yawu na yawu mu zaba Petelo nki kabweni. 19 Elode wulomba bamusosa, kansi bamuyena ko. Wuvwika minkengi byuhu na wutuma babanata. Mboki, Petelo wusisa kizunga ki Yuda na wukulumuka ku mbanza yi Sezale mu zakala mwa bilumbu koko.

20 Elode wuba na mankesi mangolo mu bantu ba mbanza yi Tile na Sidoni. Yawu ni bayuwasana mu kwe muyenikina. Bu bamana yeba Balasituse, mfumu yi nzo yi ntinu, ni balomba kiyenge mu dyambu ti mu kizunga ki ntinu bedi bakilanga bindya mu bizunga byawu. 21 Mu kilumbu ki basoola, Elode wulwata kinkutu kyandi ki kintinu. Wuzakala ha kyandu kyandi ki kintinu na wusa kinzonzi kikinene ha meso ma bantu. 22 Mukangu wulooka mu ngolo ti: «Yo ndinga yi nzambi yidi, kansi ka yi muntu wumpamba ko!» 23 Hansi na nsi Mbazi yimosi yi Mfumu yi tumbu mukata, mu dyambu ti kakembisa Nzambi ko. Mpe, misyete mimana mudya, ni kafwa.

24 Mambu ma Nzambi matatamana mu mwangana bubwingi. 25 Banabase na Sawuli bu bamanisa kisalu kyawu ku mbanza yi Yelusalemi, Bavutuka na banata ha kimosi nawu Yoane, yondowo wuba kwe tumisinanga dyaka ti Malako.