1 Mvwanzi bu yimanisa, Pawuli wukutikisa milongoki na wubasyamisa. Mboki, wubahaana mbote yi mansukina na wuyenda ku kizunga ki Masedwani. 2 Bu kedi hyokila mu kizunga bekyokyo; wedi kwe syamisa zimpangi. Mboki wuyenda ku kizunga ki Ngelese, 3 ku kazakala ngonda zitatu. Wuba na mabanza me kota masuwa mu kwenda ku kizunga ki Siliya, kansi bu kayuwa ti Bayudayo bamukotila manenga. Buna wusoola kwandi mu bwesa vutukila yi kizunga ki Masedwani. 4 Bayenda ha kimosi nandi, ni eba: Sopatele mwana wu Piluse mwisi-Beli, Alisitalaki na Sekunduse bisi-Tesalonika, Ngayusi mwisi-Delebi na Timote, mpe Tisiki na Tofimi bantu ba kizunga ki Aziya. 5 Yawu batuteekidila na bayenda tukingila ha mbanza yi Towasi. 6 Ku manima ma mukembo wu mampa ma kiputi kikwe lembolo vimbanga, yeto tukotila masuwa ha mbanza yi Filipi. Bilumbu bitanu bihyoka, tuyenda babwana ha mbanza yi Towasi, ha tuhyokisila nawu lumingu lumosi.

7 Kilumbu ki lumingu, tuba bayonzama mu dya, Pawuli bu kazaba ti mbazi waakwenda kwandi, wumokisa zimpangi, na wuzingisa kimoko natee mu kati-kati di mpimpa. 8 Minda mimingi miba mu kihinga kii ku yulu ki tuba bakutakana. 9 Toko dimosi nkumbu andi Etikuse, wuba wuzakala ha nela. Wubwa tolo tumpondi ntangu yimvimba yedi zonzanga Pawuli, ni kasonoka tuka kibandu kitatu ki nzo yi kibanga natee ha nsi. Basosa mu mutedimisa, kansi wukifwila. 10 Pawuli wukulumuka, wuyinama ha ntadisi andi na wumusimba mu moko mandi na wuta ti: «Luyenandi mutima mpasi ko, wuu kwandi wumoyo.» 11 Wubwesa maka dyaka ku yulu. wubukuna dimpa na wudya. Mboki, wutatamana kimoko kyandi natee mu minkyela mi bwisi. Ni kayenda. 12 Toko bedyodyo bavutula dyo dimoyo mpe musamu bewowo wunata syamusunu ku bamvimba.

13 Yeto tukota masuwa mu tekila ku mbanza yi Asosi, ku tufweni sala hitula Pawuli. Mu dyambu ti, mu malu kayendila koko bonso bu kazengila wo. 14 Bu katubwana ha mbanza yi Asosi, tusala muhitula mu masuwa mu kwenda ku mbanza yi Mitileni. 15 Bu tukatuka hoho, tutatamana nzyetolo mu masuwa, mu kilumbu kilanda tutuula ha simu di mbanza yi Kiyo. Kilumbu kilanda dyaka, tuyenda tuula ha mbanza yi Samosi, mpe kilumbu kibwesa landa, ni tuyenda tuula ha mbanza yi Mile. 16 Pawuli wubonga nzengolo mu lutakana ha mbanza yi Efeso mu mamba masunda, mwanki kalembolo hyokisa ntangu ku kizunga ki Aziya. Wedi kwe bingidi, tala ti bulenda ba, ka kituudila ku mbanza yi Yelusalemi mu kilumbu ki Pentekoti.

17 Tuka ku mbanza yi Mile, Pawuli wutambika ntumi benda batumisa bankuluntu ba dibundu baa ku mbanza Efeso. 18 Bu batuula ha ntadisi andi, wubateela ti: «Luzebi bwedi nakwe dyatilanga neeno, tuka kilumbu ki natuula mu kizunga ki Aziya. 19 Meno nasadidi Mfumu ku nsye luyinunu lumvimba, mpe manswela mu meso, mu kati di mfyetokoso zedi nsosilanga mfundu zi Bayudayo. 20 Luzebi ti, na lusweka dyambu ko bu nalusamunina mpe bu nalulongisa mimvimba miba neeno kisalu ha meso ma bantu na mu zinzo. 21 Nalomba ku Bayudayo na ku Bangeleke bavilula madyela mu bangumuka ku Nzambi na bakwikila mu Mfumu eto Yesu. 22 Bwabu, nina kwenda ku mbanza yi Yelusalemi bonso buna ntumina Mpeve Yilongo, mpe nzebi ko nkye dyambu dyantudila koko. 23 Nzebi kwandi ti, mu kadi mbanza, Mpeve Yilongo wuna ndwengisa mu mpasi na boloko bina nkingila. 24 Kansi, luzingu lwani, luu naani mfunu ko. Kima kii naani mfunu, ni mu lungisa nsilulu yi kisalu ki mpana Mfumu Yesu: Kisalu kye samuna Musamu Wumbote wutadidi mambote ma Nzambi.

25 Tuka kilumbu bekiki, nzebi ti, yeno bamvimba bana samunini Kimfumu ki Nzambi bu nedi kwe zyeti, lwaabwesa yena kini kyani ko. 26 Ni hahoho, nina luteela kimbangi bubedidi ti: wonso muntu waazimbala kwandi nzila yi Nzambi, mintadidi dyaka ko. 27 Mu dyambu ti nalusamunini mimvimba mikana Nzambi mu luzabikisa, wulembolo sweka dyambu dimosi ko. 28 Kikebeeno kweno yeno bende na mukangu wuluhaana Mpeve Yilongo mu keba. Vungeeno bumbote Dibundu di Nzambi di kakuula mu menga mandi. 29 Nzebi ti ku manima mani, zingo zimbalu zaafyolomoka ha kati dyeno na zaavukisa mukangu ko. 30 Ha kati dyeno mpe haatotoka bihuni mu nata milongoki mu nzila zawu. 31 Ni hahoho, kayeeno meso na bambukeeno moyo ti, mu mvula zitatu zimvimba, mpimpa na mwini, manswela mu meso, nabebidi ko mu lulwengisa wumosi-wumosi mu yeno.

32 Bwabu, nina luyekola mu moko ma Nzambi na mu bumbote bu Mambu mandi maa na lulendo mu lutunga na mu haana fwa ku yobobo bamvimba ba kavwidi. 33 Nabedi na nsatu yi mbongo ko, yi wola ko, na yi binkutu bi muntu wumosi ko. 34 Yeno bende waluzebi ti mu ngolo zi moko mani na bee sadilanga mu yukutisa nsatu zaani na zi banaani. 35 Nalulonkisi mu mimvimba bwedi lufweti sadila mu sadisa bamputu, mpe mu bambuka moyo Mambu ma Mfumu Yesu, bu kata yandi bende ti: Kukaba kuhyokidi kyese na kutambula.»

36 Bu kamana zonza, wufukama na wusambila ha kimosi na yawu bamvimba. 37 Bamvimba badila na balelama mu nsingu yi Pawuli mu mufiba. 38 Kyadi kitumbu bahyokila kitezo bu kata ti baabwesa muyena ko. Mboki, bayenda mufila natee ha masuwa.