1 Ku manima, Pawuli wusisa mbanza yi Ateni, na wuyenda ku mbanza yi Kolinto. 2 Wubwana koko Muyudayo wumosi nkumbu andi Akilase, mwisi-kizunga ki Ponte, kantama yiyingi ko kafumini ku nsi yi Itali ha kimosi na mukento andi, nkumbu andi Pilisile. Mu dyambu ti ntinu Kolode wutuma ku Bayudayo bamvimba bakatuka ha mbanza yi Loma. Pawuli ni kayenda ba kintwadi nawu, 3 mu dyambu ti kisalu kimosi balongoka, kye hidikanga zinzo zi bikapu. Wuzakala na wusala ha kimosi nawu.

4 Kadi saba, Pawuli wedi zonzanga mu nzo yi lusambulu yi Bayudayo, na wedi sosanga mu leba Bayudayo na Bangeleke.

5 Silase na Timote bafuma ku nsi yi Masedwani bu batuula, Pawuli yandi ni ka kiyekola mvimba mu samuna mambu ma Nzambi. Wedi tanga kimbangi ha ntadisi yi Bayudayo ti Yesu, Mesiya kadi. 6 Kansi Bayudayo bu bedi mubangisanga na kutukanga, wukubula fundu-fundu di binkutu byandi na wubateela ti: «Bika menga meno mabwa ha yulu mutu eno! Meno wuvedila nidi. Tuka kilumbu bekiki, ku balembolo ba Bayudayo naakwenda.» 7 Bu kakatuka hoho, wuyenda ku nzo yi bakala dimosi nkumbu andi Titiyusi Yusutuse, kwe toma sambilanga Nzambi, mpe nzo andi yiba bela-bela na nzo yi lusambulu yi Bayudayo. 8 Kilisipusi, mfumu yi nzo yi lusambulu yi Bayudayo, wukwikila mu Mfumu na kanda dyandi dimvimba. Bantu ba mbanza yi Kolinto babingi bedi yuwa Pawuli, bakwikila, mpe na babotoko.

9 Mu mpimpa, Mfumu wuta ku Pawuli mu mbweno ti: «Kuyenandi bunkuta ko, kansi zonza, kukangandi munwa ko, 10 mu dyambu ti nii kintwadi naaku mpe kunaani muntu waakusimba mu kuyenisa mpasi. Kadi, mukangu wuwingi wuu naani mu kati di mbanza beyiyi.» 11 Pawuli wuzakala koko mvula yimvimba na ngonda sambanu, mu longanga ha kati dyawu mambu ma Nzambi.

12 Mu ntangu Ngalyoni yikaba munyadi mu kizunga ki Akayi, Bayudayo bayuwasana mu nangumukina Pawuli. Bamunata ku nzo yi lufundusu, 13 ni bata ti: «Bakala bedidi dina sindisila bantu mu sambila Nzambi mu nzila yilembolo fwanakana na Misiku.» 14 Pawuli bu kasaka zonza, Ngalyoni wuvutula ku Bayudayo ti: «Yeno Bayudayo, tala ti musamu wumbi hoti we kutengodila menga, nganunu nketi luyuwa bonso bufwanakani. 15 Kansi bu wudi kwandi ti musamu wu mayuma matadidi zimpova, zinkumbu na Misiku myeno, myo milutedi. Mbisidi kwani mu ba mumfundisi mu misamu mibobobo.» 16 Ni kabaduukisa mu nzo yi lufundusu. 17 Ni hahoho bamvimba babwidila Sositeni, mfumu yi nzo yi lusambulu yi Bayudayo. Bamututa nkuba ha mutwala wu nzo yi lufundusu. Kansi Ngalyoni wuyena myo misamu mi mpamba.

18 Pawuli wuzingila dyaka mwa bilumbu bibingi mu mbanza yi Kolinto. Mboki, wusisa zimpangi, wukota masuwa na wuyenda ku kizunga ki Siliya ha kimosi na Pilisile na Akilase. Bamuhempa kungulu ha Senkeli mu dyambu ti nsilulu kasa. 19 Bu batuula mu mbanza yi Efeso, Pawuli ha kasala sisa Pilisile na Akilase. Wuyenda kota mu nzo yi lusambulu yi Bayudayo na wumokana na Bayudayo. 20 Bamulomba kazakala bilumbu bibingi, kansi wubisa. 21 Wubasiisa na wuta ti: «Mbo navutuka ku yeno tala ti Nzambi tiidi.» Wukota masuwa ha mbanza yi Efeso mu kwenda. 22 Bu kakulumuka ha mbanza yi Sezale, ni katomboka ku mbanza yi Yelusalemi mu kwe haana dibundu mbote. Mboki, wuyenda ku mbanza yi Antiose. 23 Wuhyokisa mwa bilumbu hoho, mboki ni kayenda. Wuzyeta mu bizunga bi Ngalatiya na Filizi, mu kwe syamisi milongoki mimvimba.

24 Muyudayo wumosi mwisi-mbanza yi Alezandi, nkumbu andi Apolose wuyiza tuula ku mbanza yi Efeso. Wuba naludede lwe zonzila mpe wutoma longoka bumbote Masonama. 25 Wulongoka nzila yi Mfumu, mpe wuba na vema didingi, wedi samunanga na wedi longisanga misamu mitadidi Yesu mu kikedika kimvimba. Kansi mbotokolo yi Yoane kwandi kazaba. 26 Wutona mu zonza mu kivuvu kimvimba mu nzo yi lusambulu yi Bayudayo. Bu bamana muyuwa, Pilisile na Akilase bamunata ha nsoso mu mubangudila mu kikedika kimvimba nzila yi Nzambi. 27 Mpe Apolose bu katya mu kwenda ku kizunga ki Akayi, zimpangi zi mu syamisa na zisonikina milongoki mukanda mwanki bamutambula bumbote. Bu katuula, mu mulemvo wu Nzambi, wuyenika muntu wumfunu ku yobobo bakwikila. 28 Mu dyambu ti, wedi bangisanga mu ngolo Bayudayo ha meso ma bantu, mpe wedi balonka mu Masonama ti Yesu Mesiya kadi.