1 Kilumbu ki mukembo wu Pentekoti bu kifwana, minkwikidi mimvimba mi ba miyonzama ha kibuka kimosi. 2 Lusuku lufuma ku yulu bonso kitembo kingolo lutumbu kwiza fuluka mu nzo yimvimba yi baba bazakala. 3 Bayena bifwani bi ludimi bonso milaka mi tiya myedi kwe hambani na ku tentama ha yulu mutu wu kadi muntu mu yawu. 4 Bamvimba bafuluka mu Mpeve Yilongo, na batona mu zonza ndinga zihiika bonso Mpeve kedi twadisila kadi muntu mu zonza.

5 Ku Yelusalemi kuba na Bayudayo baba bakwikama mu Nzambi, bafuma mu nsi zimvimba zii nza. 6 Mu lusuku belolo luyuwakana, mpumbu yi bantu yiyiza yonzama. Bamvimba batoma yituku, mu dyambu ti kadi muntu wedi bayuwa mu ndinga andi. 7 Bantu bedi pamuka na bedi yituku bubwingi, mboki bata ti: «Bantu bebobo bana zonza, bamvimba badi bisi-Ngalili ko e? 8 Bwedi bulendi bela ti kadi muntu ha kati dyeto ka bayuwa mu ndinga andi yi bwala e? 9 Ha kati dyeto, kuu na bantu bafumini mu nsi zi Pate, Mede na Elami. Kuu na bahiika bafumini ku bizunga bi Mezopotami, Yuda na Kapadose, Ponti na Aziya, 10 ku Filizi na Pamfili, ku Ngipiti na bantu ba ku kizunga ki Sileni mu nsi yi Libi mpe yobobo bafumini ku mbanza yi Loma, 11 ku Kelete na ku Alabi. Kuu na Bayudayo na banzenza bakota mu dibundu di Bayudayo, mpe bamvimba tuna bayuwa bu bana zonza misamu mingitukulu mi Nzambi mu zindinga zeto.»

12 Bamvimba bayituku na madyela matumbu bahwa. Bedi fulasananga yawu na yawu ti: «Misamu bemimi nki mitiidi mu ta e?» 13 Kansi bahiika bedi seya minkwikidi ni bata ti: «Malamu mawu bakololo.»

14 Petelo ni katelama na zintumwa kumi na yimosi, wuzonza mu ndinga yingolo ti: «Yeno bantu ba kizunga ki Yuda na yeno bamvimba luu ha mbanza yi Yelusalemi, bakuleeno misamu bemimi mina hyoka na zibuleno makutu meno mu yuwa misamu mi myani.» 15 Bantu bebobo baa bakolo ko bonso bu luna banzila wo, mu dyambu ti kyakidi kwandi kilokola kivwa yi mene. 16 Kansi bwabu misamuna mumbikudi Yoeli myenzi detila:

17 Nzambi wuta ti: Mu bilumbu binsukunu,

mbo nadukula Mpeve ani ku bantu bamvimba,

baala beno ba babakala na babakento bana bikula,

zintwenya zeno zaayena mu mbweno,

mpe bihunda byeno baayena mu ndozi.

18 Ninga, mu bilumbu bebyobyo,

mbo nadukula Mpeve ani ku bisadi byani bi babakala na bi bakento,

mpe baabikula.

19 Mbo nalonka bimangu ku mazulu,

na bidimbu ha butoto:

menga, tiya na tuti di mwisi.

20 Ntangu yaakituka tombe

na ngonda yaakituka menga,

tekila kilumbu ki Mfumu kituula,

kilumbu kikinene na ki nkembo.

21 Buna wonso muntu waasambila mu nkumbu yi Mfumu, waabaka mpulusu.

22 Bisi-Isaeli, yuweeno misamu mi nina luteela: Yesu mwisi-Nazaleti wuba muntu Nzambi wukasadila mu lulonka lulendo mu bidimbu na bimangu bi kasa ha kati dyeno, bonso bu luzabidi wo. 23 Muntu bewowo, bamuyekola bonso bu ba nzengolo yi Nzambi na bu kakubikila wo tuka ntama. Mboki, yeno lumuhonda bu lumukomisa ha kulunsi mu moko ma minsumuki. 24 Kansi Nzambi wumufulukisa, mu mukuula mu mpasi zi lufwa, mu dyambu ti lufwa lulendi musimbidila ku nsye lulendo lwandi ko. 25 Davidi wakata mu dyambu dyandi ti:

Ntangu ka ntangu nedi yenanga Mfumu ha ntadisi ani,

mu dyambu ti wuu ha lweka lu kooko kwani ku lubakala,

mwanki na lembolo tekita.

26 Ni hahoho, mutima ani wuu wutoma yangalala

mpe nina yimbila mu kyese,

nitu ani mpe yaavunda mu kivuvu,

27 mu dyambu ti wulendi nsisa ku nsi yi bafwa ko.

Waabika ko ti nitu yi kisadi kyaku kilongo yibodila mu ndyamu ko.

28 Ngeye ndonkidi nzila zikwe haananga luzingu,

ngeye waamfulusa mu kyese ha meso maku.

29 Mpangi zani, mbeki luve mu luteela mu kedika kimvimba myo mitadidi mbuta Davidi: yandi wufwa, bamuzika mpe natee mu kilumbu bekiki, ndyamu andi ya kii kwa neto kuku. 30 Mumbikudi kaba, na wuzaba ti Nzambi wumusila nsilulu mu ndefi ti wumosi mu nkuna andi waamuhingana ha kyandu kyandi ki kintinu. 31 Davidi wukiyenina mfulukulu mu bafwa yi Klisto. Ni hahoho kazonzila ti:

Nzambi kaamusisa mu nsi yi bafwa ko,

Mpe kaatala ko ti nitu andi yibola mu kati di ndyamu.

32 Ni Yesu bewowo, Nzambi wukafulukisa mu bafwa nina zonzila, mpe yeto bamvimba zimbangi tudi. 33 Nzambi wumuzangula mu kooko kwandi ku lubakala, mpe wutambula Mpeve yi Longo yi musila Tata nsilulu. Mboki, yandi mwangisi yo bonso bu luna yena mpe bu luna yuwa. 34 Mpeleko Davidi kayenda ku mazulu ko, kansi yandi wuta ti:

Mfumu Nzambi wuta ku Mfumu ani ti:

«Yiza zakala ha lweka lu lubakala lwani,

35 natee bu nasa ti mitantu myaku

miba bitentokolo bi bitambi byaku.»

36 «Ni hahoho, bika ti kanda dimvimba di Isaeli dibakula kikedika kimvimba ti Yesu yondowo wulukoma ha kulunsi, Nzambi Yandi kazangudi na weka Mfumu na Mesiya.»

37 Bu bamana yuwa misamu bemyomyo, mitima myawu mi lwala, ni bafuula Petelo na ntumwa zikaka ti: «Mpangi zeto, nki tu fweni sa e?» 38 Petelo wubavutudila ti: «Viluleeno madyela: kadi muntu katambula mbotokolo mu nkumbu yi Yesu-Klisto mu dyambu di ndemvokolo yi masumu mandi, na mbo lutambula munkayulu wu Mpeve Yilongo. 39 Mu dyambu ti nsilulu ku yeno na ku baala beno Nzambi kasila yo, ku bamvimba bebobo baa kukula, na ku bamvimba bebobo baatumisa Mfumu Nzambi eto.»

40 Mu mpova dyaka zizingi, Petelo wubateela kimbangi na wubakindisa. Wuta ti: «Tineeno kweno mbandu beyiyi yivilangana.» 41 Yobobo batambula mambu ma Petelo babotoko. Mpe kilumbu bekyokyo, mafunda matatu ma bantu mabwesama mu kabu di minkwikidi.

42 Batatamana mu yuwa ndongosolo yi zintumwa, mu kintwadi ki zimpangi, mu mbukununu yi dimpa*, na mu lusambulu. 43 Bamvimba bayiza ba na bunkuta mu dyambu di bidimbu na bimangu bibingi byedi hilama mu nzila yi zintumwa. 44 Bamvimba bakwikila, bayiza ba muntu wumosi na babunda ha kimosi bimvimba bi ba nawu. 45 Bedi yadikanga mpangu zawu na bimvwama byawu, na bedi kabulanga mpe mbongo zibedi bakanga mu kintwadi bonso bubela nsatu zi muntu-muntu. 46 Kadi kilumbu batatamana mu vukana mu nzo-Nzambi. Mu kintwadi, bedi kabulanga ha kimosi dimpa mu zinzo, mpe mu kyese na mu mutima wukuluka bedi dilanga bindya byawu. 47 Bedi kembilanga Nzambi, mpe bantu bamvimba bedi batyanga. Kadi kilumbu, Mfumu wedi bwesanga mu kabu dyawu yobobo bedi bakanga mpulusu.