1 «Mpangi zani na matata mani, yuweeno bwabu misamu mii nani mu luteela mu nwanina nitu ani.» 2 Bu bayuwa ti Pawuli wuna bazonzila mu ndinga yi kihebeleo, ni batoma ba dyaka na swii. Pawuli wuta bwabu ti : 3 «Meno Muyudayo nidi, nabutuka ku mbanza yi Talisi, mu kizunga ki Silisi. Kansi, bankudisa mu mbanza beyiyi yi Yelusalemi, mpe Ngamalyeli wuba mulongi ani mu toma zaba Misiku mi zinkaka zeto. Naba na vema kukwingi mu sadila Nzambi, bonso buludi bubedidi yeno bamvimba. 4 Meno natoma fyetikisa natee mu sosa mu honda bantu bakwe landanga nzila yi Mfumu. Nakangisa bakento na babakala mpe nabatuba mu boloko. 5 Mfumu nganga-Nzambi na kimvuka ki bakuluntu badi zimbangi. Mu dyambu ti yawu bampana mikanda mitadidi zimpangi zeto zii ku mbanza yi Damasi, ku nayenda mu kwe kanga minkwikidi, na mu banata ku Yelusalemi bakangama mu misinga, mwanki batambula nsembolo.»

6 «Bu naba mu nzila, bela-bela na mbanza yi Damasi, kampe yiba ntangu ha mbata, nayitukulu kwani ni kya kikingi kifuma ku yulu, kitumbu nzungidila mu kyezezi kyandi. 7 Nabwa ha nsi mpe nayuwa ndinga yedi nteela ti : "Sawuli, Sawuli, bila nki wuna mfyetikisila e?" 8 Namufuula ti: "Mfumu, ngeye ni nani e? Wumvutudila ti: Meno ni Yesu mwisi Nazaleti, yondowo wu wuna fyetikisa." 9 Yobobo bazyeta ha kimosi nani, bayena kya, kansi bayuwa ndinga yi yondowo wedi nzonzila ko. 10 Nina fuula ti: "Mfumu, nki nafweti sa e?" Mfumu wunteela ti: "Telama, yenda ku mbanza yi Damasi, koko baakuteela nki fweti sa". 11 Nedi bwesa yena ko, mu dyambu kya bekyokyo kinkitula mpofo. Ni hahoho, bantu bayenda nani, bansimba mu kooko mu nata ku mbanza yi Damasi.»

12 «Muntu wumosi wuba koko, nkumbu andi Ananiase, wuba bakala dyedi vuminanga Nzambi na dikwikama mu Misiku. Mpe Bayudayo bamvimba ba mbanza yi Damase, bedi muteelanga kimbangi kimbote, 13 bu kayiza ha naba, wunteela ti: "Sawuli, mpangi ani, bika meso maku mabwesa yena!" Hansi na nsi, meso mani mazibuka mpe namuyena. 14 Wubwesa muteela dyaka ti: "Nzambi yi zinkaka zeto wukusoodidi mu zaba luzolo lwandi, mu yena muntu wulunungu, mpe mu yuwa ndinga andi. 15 Mu dyambu ti, waaba mbangi andi ha ntadisi yi bantu bamvimba mu myo mi waayena na mi waayuwa. 16 Bwabu, nki wuna kingila e? Telama, yiza wubotoko mpe tambula ndemvokolo yi masumu maku mu sambila mu nkumbu andi."»

17 «Bu navutuka ku mbanza yi Yelusalemi, mu ntangu yi nedi sambila mu nzo-Nzambi, ni nakota mu mpeve. 18 Nayena Mfumu wedi nteela ti: "Duuka mu muswalu mu mbanza yi Yelusalemi, mu dyambu ti bantu baatambula kimbangi ki wuna nteela ko." 19 Ni navutula ti: "Mfumu, batomini zaba ti nedi kotanga mu kadi nzo yi lusambulu yi Bayudayo mu tuula mu boloko na mu zubusu bikoti yobobo bakwe kukwikilanga." 20 Mpe mu ntangu yi bedi tengola menga ma Tyeni, mbangi aku, meno mpe ho naba. Nasingisa yobobo bedi muhonda mpe meno nedi keba binkutu byawu. 21 Mfumu ni kanteela bwabu ti: "Yenda, mu dyambu ti kukula nina kutambika, ku balembolo ba Bayudayo."»

22 Mpumbu yi bantu yiyuwa Pawuli natee ku nsukunu yi kinzonzi kyandi. Kansi, bamvimba batona mu bulana ti: «Zimbisa muntu bewuwu ha luse lu butoto! Ka mfunu mu zinga ko!» 23 Bu bedi bulana, bakatula binkutu byawu ni bedi kwe tubi fundu-fundu mu yulu. 24 Mfumu yi zimbulu-mbulu wutuma bakotisa Pawuli mu kivwandulu ki zimbulu-mbulu na zimuzuba bikoti mwanki kazonza, mpe zizaba mu dyambu di nki bantu bana kwe mukumbidi. 25 Kansi, mu ntangu yi bedi mukanga misinga mu muzuba bikoti, Pawuli wuta ku mfumu yi zimbulu-mbulu nkama yi ba hoho ti: «Nga wuna luve mu zuba mwisi-Loma bikoti wulembolo fundusu e?» 26 Bu kayuwa bobo, mfumu yi zimbulu-mbulu nkama wuyenda teela mfumu yi zimbulu-mbulu ti: «Nki keti sa e? Mu dyambu ti muntu bewuwu mwisi-Loma wudi.» 27 Mfumu yi zimbulu-mbulu wuyenda ha ntadisi yi Pawuli na wumufuula ti: «Nteela, ngeye nkatika mwisi-Loma wudi e?» Ni katambula ti: «Ninga». 28 Mfumu yi zimbulu-mbulu wuta dyaka ti: «Meno mbongo zizingi nafuta mu ba mwisi-Loma.» Kansi Pawuli wuta ti: «Meno nidi mwisi-Loma wu mbutuka.» 29 Yobobo baketa muzuba bikoti mwanki kazonza batumbu mutatukila, na mfumu yi zimbulu-mbulu wuyena bunkuta bu kabakula ti Pawuli mwisi-Loma kaba na bu katuma bamukanga misinga.

30 Kilumbu kilanda, mfumu yi zimbulu-mbulu wusosa mu zaba kikedika ki kibila kyedi mufundila Bayudayo. Wulomba bamunyanguna mpe wutuma ku mfumu zi zinganga-Nzambi na ku kimvuka ki bakuluntu ba Bayudayo bayonzama. Mboki, wulomba banata Pawuli. Ni kamutuula ha kati dyawu.