1 Ku mbadukulu, Mpova yikibeela, Mpova yiba ha kimosi na Nzambi, mpe Mpova ni Nzambi. 2 Mpova yiba ha kimosi na Nzambi ku mbadukulu. 3 Bimvimba mu Mpova bihidimina. Kunaani kima kilembolo hidimina mu Yandi. 4 Mu yandi muba luzingu, mpe luzingu belolo luba kya ki bantu. 5 Kya kilezima mu kati di tombe, kansi tombe ki mutambula ko. 6 Nzambi wutambika bakala dimosi nkumbu andi Yoane. 7 Wuyiza bonso mbangi, mu teela kya kimbangi, mwanki bamvimba bakwikila mu kya mu kimbangi kyandi. 8 Yandi bende kaba kya ko, kansi wuyiza mu teela kya kimbangi. 9 Kya bekyokyo kiba nkatika kya kikedika, kiyiza mu nza mu kyenzola bantu bamvimba.

10 Mpova yiba mu nza mpe nza yihidimina mu yandi, kansi nza yimubakula ko. 11 Wuyiza kuu bantu bandi, kansi bantu bandi bamutambula ko. 12 Kansi ku bamvimba bamutambudi na bana kwikila mu yandi, wubaheeni lulendo lweba baala ba Nzambi. 13 Babutukidi mu nsatu zi nsuni ko hoti mu luzolo lu bakala na mukento ko, kansi mu luzolo lu Nzambi.

14 Mpova yiyiza ba muntu, yizinga ha kati dyeto, yiba yifuluka mu bumbote na mu kedika. Tuyena nkembo andi, nkembo yi Mwana wakwa wumosi kaka, yikatambudi ku Tata. 15 Yoane wumuteela kimbangi na wubokana ti: «Yandi nedi zonzila bu nedi ta ti: "Muntu wuna kwiza ku manima mani, wumvudidi mfunu, mu dyambu ti teekila meno naba, yandi buna wudi."» 16 Mu bunene bu bubote bwandi, yeto bamvimba tutambudi lusakumunu ha yulu lusakumunu. 17 Mu dyambu ti Nzambi wutuheeka Misiku mu Mose, kansi bubote na kedika biyizila mu Yesu-Klisto. 18 Kunaani muntu weka ne yena Nzambi. Kansi Mwana andi wakwa wumosi kaka, wudi Nzambi mpe wukwe zinganga na Tata andi, yandi wu tulonka bwedi Nzambi kadi.

19 Eki ni kimbangi kita Yoane, mu ntangu zinganga-Nzambi na balevita, yobobo batambika zimfumu zi Bayudayo zi mbanza Yelusalemi, mu kwe mufuula ti: «Ngeye, nani wudi e?» 20 Kabisa mu bahaana mvutu ko, kansi ha ntadisi yi bamvimba, wubateela ti: « Meno nidi Klisto ko.» 21 Ni bamufuula ti: «Kadi bwabu nani wudi e? Ngeye ni Eliya e?» Yoane wubavutudila ti: «kani, ka meno ko». Bamufuula dyaka ti: «Ngeye mumbikudi wudi e?» Wubavutudila ti: «kani, ka meno ko.» 22 Ba bwesa mufuula ti: «Nani wudi e? Tufweti haana mvutu ku yobobo ba tutambikidi. Nki wuna ta mu ngebende e?» 23 Yoane wubavutudila ti:

« Meno ni yondowo wuna lookana ku nsi yinkatu:

sungikeeno nzila yi Mfumu!» Bonso busamuna wo mumbikudi Yesaya.

24 Mu yobobo ba batambika ku Yoane, kuba na Bafalisi, 25 bamufuula dyaka ti: «Tala ti wudi Klisto ko, Eliya ko na mumbikudi ko, bwabu nki wuna botikila e?» 26 Yoane wubavutudila ti: «Meno nina lubotika mu mamba, kansi kuu na muntu ha kati dyeno, wu lulembolo zaba.» 27 Wuna kwiza ku manima mani, kansi niidi wulunga ko mu munyanguna misinga mi nsampatu zandi. 28 Mimvimba bemyomyo ku mbanza yi Betani myedi hyokila, ku simu di nzadi yi Yolodani, ha kibuka kyedi botikila Yoane.

29 Kilumbu kilanda, Yoane wuyena Yesu wedi kwiza ku yandi, ni kata ti: «Taleno Mwana dimeme di Nzambi dikwe katulanga masumu ma nza. 30 Yandi nedi zonzila bu nedi ta ti: "Muntu wuna kwiza ku manima mani, wumvudidi mfunu, mu dyambu ti teekila naba, yandi buna wudi." 31 Meno nedi muzaba ko, kansi nayizidi mu botika mu mamba mwanki namuzabikisa ku kanda di Isaeli.»

32 Yoane wuta dyaka kimbangi eki: «Nayeni Mpeve yi Nzambi yina kulumuka tuuka ku yulu mu kifwani ki bembe na dizi tentama ha yulu andi. 33 Meno nedi muzaba ko, kansi Nzambi wumfidisa mu botika mu mamba, wunteela ti: "Yondowo wu waayena Mpeve yina kulumuka, mpe yina tentama ha yulu andi, yandi kwe botikanga mu Mpeve Yilongo." 34 Meno nayeni mu meso mani, mpe nina ta kimbangi ti, ni yandi Mwana Nzambi.»

35 Kilumbu kilanda, Yoane wuba dyaka ha kibuka bekyokyo na myole mu milongoki myandi. 36 Bu kayena Yesu wedi hyoka, ni kata ti: «Taleno Mwana Dimeme di Nzambi!» 37 Milongoki mya mimyole bu miyuwa bobo, ni milanda Yesu. 38 Yesu bu kabaluka, wuyena ti bana kwiza mulandi, ni kabafuula ti: «Nki luna sosa e?» Bamuvutudila ti: «Labi, kwedi kwe zakidilanga e? Mbangudulu yi mpova yi Labi ni Mulongisi.» 39 Wubavutudila ti: «Yizeno na mbo luyena.» Bayenda ni bayena ha kakwe zakidilanga, mpe bahyokisa nandi ndambu yi kilumbu bekyokyo. Kampe yiba ngunga yi ya ku manima ma ntangu ha mbata.

40 Andele, mpangi yi Simoni-Petelo, wuba wumosi mu ya babole bayuwa misamu mizonza Yoane na balanda Yesu. 41 Muntu wuntete wu kayenda yenikina ni Simoni mpangi andi na wumuteela ti: «Tuyeni Mesiya». Mbangudulu yi "Mesiya" ni "Klisto". 42 Andele ni kamunata ku Yesu. Yesu bu kamusungimina na swii, ni kamuteela ti: «Ngeye ni Simoni, mwana wu Yoane. Bwabu mu nkumbu yi Sefase bakutumisinanga». Mbangudulu yi "Sefase" ni "Petelo".

43 Kilumbu kilanda, Yesu wubonga nzengolo mu kwenda ku kizunga ki Ngalili. Wubwana Filipi na wumuteela ti: «Ndanda!» 44 Filipi wuba mwisi-Betesayida, mbanza yi Andele na Petelo. 45 Mboki Filipi wuyenda yena Natanayeli na wumuteela ti: «Tuyeni muntu wuzonzila Mose mu buuku di Misiku mpe wuzonzila ba mimbikudi. Ni Yesu mwisi-Nazaleti, mwana wu Yosefi.» 46 Natanayeli wumufuula ti: «Ku Nazaleti mpe kulendi totoka dyambu dimbote e?» Filipi wumuvutudila ti: «Yiza na mbo wuyena.»

47 Yesu bu kayena Natanayeli wedi kwiza ku yandi, ni kamuteela ti: «Taleno, ewu nkatika mwisi-Isaeli kwe lembolo hunanga.» 48 Natanayeli wumufuula ti: «Kwedi nzabidi e?» Yesu wumuvutudila ti: «Teekila Filipi kakutumisa, nakuyeningi bu bedingi ha nsye muti wu fike.» 49 Natanayeli ni kamuteela ti: «Mulongisi, ngeye Mwana Nzambi wudi, ngeye Ntinu yi Isaeli wudi!» 50 Yesu wumuvutudila ti: «Bu nakuteedidi ti nakuyeningi bu bedingi ha nsye muti wu fike, hahoho kwikidi e? Mbo wuyena misamu mihyokidi kitezo na emi.» 51 Yesu wubwesa ta ti: «Kedika mu kedika nina luteela, mbo luyena yulu dizibuka na mbazi zi Nzambi zina tomboka na zina kulumuka ha yulu Mwana Muntu.»