1 Yesu bu kamanisa mu zonza bobo, wusendola meso ku yulu na wuta ti: «Tata, kilokola kifweni. Kembisa Mwana aku mwanki Mwana mpe kakukembisa. 2 Wumuheeni lulendo mu bantu bamvimba, mwanki kahaana luzingu lu mimvu ka mimvu ku yobobo bamvimba ba wumuhaana. 3 Luzingu lu mimvu ka mimvu ludi ti yawu ba kuzaba ti ngeye ni Nzambi yimosi kaka yi kedika, mpe mu zaba Yesu-Klisto, yondowo wu wutambikidi. 4 Nakukembisi ha luse lu butoto, manisi kisalu ki wumpaana mu sala. 5 Bwabu, Tata nkembisa nge bende mu nkembo yi banani ha ntadisi aku tekila nza yi hilama. 6 Nazabikisi nkumbu aku ku bantu ba wumpaana, bawusoola mu nza. Baaba bantu baku, mpe ngeye wubampaana na batumamani mu mambu maku. 7 Bazebi bwabu ti bimvimba biwumpaana, ku ngeye bifuma, 8 mu dyambu ti nabaheeni mambu ma wumpaana. Ni batambudi mo, bwabu nkatika bazebi ti ku ngeye nafuma, mpe bakwikidi ti ngeye wumfidisi.

9 Mu dyambu dyawu nina sambidila. Nina sambidila bantu ba nza ko, kansi yobobo bawumpeeni, mu dyambu ti bantu baaku badi. 10 Bima bimvimba bii bi byaku, bi byani bidi, mpe bimvimba bii bi byani, bi byaku bidi, mpe nina kemboso mu yawu. 11 Meno nsidi dyaka mu nza ko, Meno nina kwiza ku ngeye. Kansi yawu bana saala mu nza, Tata di Longo, bakeba mu nkumbu aku, nkumbu beyoyo yi wumpaana mwanki baba muntu wumosi bonso butudi naku. 12 Bu naba ha kimosi nawu, nedi bakebilanga mu nkumbu aku, yo yi wumpaana. Nabakebidi, mpe kani wumosi mu yawu kazimbadi ko, tala ti ka yondowo ko wufweti zimbala mwanki Masonama malunga. 13 Bwabu nina kwiza ku ngeye, mpe nina zonzila bobo bu nakidi mu nza, mwanki kyese kyani kiba mu yawu na kiba kilunga. 14 Nabaheeni Mambu maku, kansi nza yibabedidi, mu dyambu ti badi bantu ba nza ko bonso meno nidi muntu wu nza ko. 15 Nina kulomba ko ti wubakatula mu nza, kansi wubatanina ku Munga Mbi. 16 Baa bantu ba nza ko bonso meno mpe nii muntu wu nza ko. 17 Babyeka mu kedika. Mambu maku maa kedika. 18 Bonso bu wumfidisi mu nza, meno mpe nabafidisi mu nza, 19 Nakiyekodi mvimba ku ngeye mu dyambu dyawu, mwanki yawu mpe baba babyeko mu kedika.

20 Nina sambila mu dyambu dyawu kaka ko, kansi mu dyambu di yobobo mpe baakwikila mu meno, mu mambu mawu. 21 Nina sambila mwanki bamvimba baba wumosi, bonso ngeye Tata wuu mu meno, mpe meno mu ngeye. Bika yawu mpe baba wumosi mu yeto, mwanki nza yikwikila ti ngeye wumfidisi. 22 Nabaheeni nkembo yi wumpaana mwanki baba muntu wumosi bonso butudi muntu wumosi ngeye na meno, 23 meno mu yawu, ngeye mu meno, mwanki baba nkatika muntu wumosi, mpe nza yibakula ti ngeye wumfidisi, na wubatiidi bonso buntiidi.

24 Tata, ntiidi ti ho ha nidi, bantu ba wumpaana baba kintwadi nani, mwanki bayena nkembo ani, nkembo yi wumpaana mu luzolo lwaku mu meno tekila nza yihilama. 25 Tata nkwa lunungu, nza yikuzaba ko, kansi meno nakuzaba, mpe yababa babakudi ti ngeye wumfidisi. 26 Nabazabikisi nkumbu aku, mpe naatatamana mu bazabikisa yo, mwanki luzolo lwaku mu meno, luba mu yawu, bonso meno mu yawu.»