1 Ku manima, Yesu wuyenda ku kumu dihiika di dyanga di Ngalili di bakwe tumisinanga dyaka ti dyanga di Tibelyade. 2 Mpumbu yi yinene yi bantu yimulanda mu dyambu ti bayena bidimbu bingitukulu bikedi hidika bu kanyakisa zimbevo. 3 Yesu wutomboka ha yulu mulandu na wuzakala koko na milongoki myandi. 4 Mukembo wu Pake wu Bayudayo wuba bela-bela.

5 Yesu wusendola meso na wuyena mpumbu yiyinene yi bantu yedi kwiza ku yandi. Wufuula Filipi ti: «Kwedi tulendi sumbila mampa mwanki bantu bebaba badya e?» 6 Kedi zonzila bobo mu tala Filipi ka bwedi kaata, mpeleko wuzaba yandi bende nki kedi banza mu sa. 7 Filipi wumuvutudila ti: «Kaati mampa ma nkama zole zi mbongo zi bisengo twaasumba, maabalungila ko mpe kani muntu kaabaka mwa kibuku ko.» 8 Wumosi mu milongoki myandi, nkumbu andi Andele mpangi yi Simoni-Petelo, wumuteela ti: 9 «Mwana wu bakala wumosi wu haha wuu na mampa matanu ma *oloze na mbizi zole. Kansi nki bilenda sa mu mpumbu yi bantu yi bububu e?» 10 Yesu ni kata bwabu ti: «Bazakikeeno.» Ni bazakala, mwa bititi bibingi biba ha kibuka bekyokyo. Baba mafunda matanu ma babakala. 11 Yesu wubonga mampa, bu kavutula matondo ku Nzambi, ni kakabula mo ku yobobo baba hoho. Wusa bumosi mpe mu zimbizi, wubahaana zo bonso bubela nsatu yi muntu-muntu. 12 Bu bamana yukuta, Yesu wuteela milongoki myandi ti: «Toteeno bibuku bisadidi mwanki kani kimosi kifukilandi.» 13 Bamvimba bu bamana dya, batota byo na batebola mikuta kumi na myole mi bibuku bi sadila bimampa matanu ma oloze. 14 Bu bayena kidimbu (kimangu) kingitukulu ki sa Yesu, bantu bata ti: «Yandi nkatika ni mumbikudi wu fwanakani mu kwiza mu nza.» 15 Yesu bu kabakula ti bantu basaka kwiza mu bonga mu kingolo mwanki bamutuula ntinu, wutomboka dyaka yandi hiika ha yulu mulandu.

16 Nkokila bu yitula, milongoki mi Yesu mikulumuka ha kumu di dyanga. 17 Bakota mu mulungu wumosi na bayendisa ku Kapenawumi ku simu dikaka di dyanga. Mpimpa bu yitula na Yesu kaba ntete kintwadi nawu ko. 18 Kitembo kimosi kingolo kikukula mpe mamba ma dyanga manangumuka. 19 Bu bayenda mu mamba kitini makumatanu hoti makumasambanu mankama ma zimetele, bayena Yesu wuna finama ha mulungu, buna wuna kwe dyati ha mukanda mamba. Bayena bunkuta. 20 Kansi Yesu wubateela ti: «Luyenandi bunkuta ko, meno kwani!» 21 Baba na mayindu me mukotisa mu mulungu, kansi mulungu wutumbu tula ha kumu di bayendisa.

22 Kilumbu kilanda, mpumbu yi bantu yi saala ku simu dihiika di dyanga, yibakula ti mulungu wumosi kwandi wuba hoho mpe Yesu kamaka na milongoki myandi mu mulungu bewowo ko. Kansi yawu kaka bayenda. 23 Milungu mihiika mifuma ku mbanza yi Tibelyade, mitula bela-bela na kibuka ki badiila mampa ku manima ma mvutululu yi matondo ma Mfumu. 24 Mpumbu yi bantu bu yiyena ti Yesu na milongoki myandi baba hoho ko, bantu ni bakota yawu bende mu milungu na bayenda ku mbanza yi Kapenawumi mu kwe sosi Yesu.

25 Bu bamuyena ku simu dihiika di dyanga, ni bamufuula ti: «Mulongisi, nkye ntangu tudidingi ekuku e?» 26 Yesu wubavutudila ti: «Kedika mu kedika nina luteela, ka mu dyambu di bimangu bingitukulu bi nasidi luna kwe nsosidi, kansi mu dyambu di mampa ma ludidi na ma luyukuti. 27 Lusalandi mu dyambu di bindya bikwe fukilanga (bolanga) ko, kansi saleno mu dyambu di bindya bikwe zingilanga mimvu ka mimvu, Mwana Muntu waaluhaana byo, mu dyambu ti Tata Nzambi, wutuula mu yandi kidimbu kyandi.» 28 Bamufuula bwabu ti: «Nki tufweti sa mu sala bisalu bi Nzambi e?» 29 Yesu wubavutudila ti: «Kisalu ki Nzambi ni mu kwikila yondowo wu kafidisi.» 30 Bamufuula dyaka ti: «Nkye kidimbu kingitukulu lenda tulonka mwanki tukukwikila e? Na nki waasa e? 31 Bankaka zeto badya bindya biba kwe tumisinanga ti mane ku nsi yinkatu badya, bonso budi busonama ti: "Wubahaana mu dya dimpa di fuma ku yulu."» 32 Yesu wubavutudila ti: «Kedika mu kedika nina luteela, ka Mose ko wuluhaana dimpa di fuma ku yulu, kansi ni Tata ani kwe wuna luhaana dimpa dikedika di fumini ku yulu. 33 Mu dyambu ti dimpa di Nzambi, ni dyadyodyo di fumini ku yulu na dikwe haananga luzingu ku nza.» 34 Bamuteela bwabu ti: «Mfumu, tuhaananga ntangu zimvimba dimpa bedyodyo.» 35 Yesu wubateela ti: «Meno nii dimpa di moyo, wonso muntu waakwiza kuu meno, kabwesa yena nsatu ko, mboki yondowo waankwikila, kabwesa baka mpwila yi mamba ko.

36 Kansi wa nalutedidi ti: lunyeni, kansi luna kwikila ko. 37 Yobobo bamvimba bampeeni Tata, baakwiza ku meno, mpe naabisa yondowo waakwiza ku meno ko, 38 kadi nafumini ku yulu mu kwiza sadila luzolo lwani ko, kansi lu yondowo wu mfidisi. 39 Luzolo lu yondowo wu mfidisi ludi ti: Nazimbisandi ka wumosi mu yobobo bakampeeni ko, kansi mu kilumbu kinsukunu, na bafulukisa mu bafwa. 40 Ninga, luzolo lu Tata ani ludi ti wonso muntu yeni Mwana na kwikidi mu yandi, ka tambula luzingu lu mimvu ka mimvu, mpe meno mbo namufulukisa mu bafwa kilumbu ki nsukunu.»

41 Bayudayo batona mu nyungutila Yesu mu dyambu wuta ti: «Nii dimpa di fumini ku yulu.» 42 Bata ti: «Ka ni yandi ko Yesu mwana wu Yosefi e? Nganunu tuzebi tata na ngudi andi ko e? Bwedi kalendi teedila bwabu ti: "ku yulu na fumini e?"» 43 Yesu wubavutudila ti: «Bikeno mu nyunguta yeno na yeno. 44 Kunani muntu lenda kwiza ku meno tala ti Tata wumfidisi kamutwadisi ko, mpe meno mbo namufulukisa mu bafwa kilumbu kinsukunu. 45 Wusonama mu mabuku ma mimbikudi ti: "Bamvimba baatambula ndongosolo ku Nzambi." Wonso muntu yudi miteedi Tata na tambudi ndongosolo andi, wuna kwiza ku meno.» 46 Kunani muntu wuyena Tata, tala ti kayondo ko wu fumini ku Nzambi, yandi wuyena Tata. 47 Kedika mu kedika nina luteela, wonso muntu kwikidi, beki luzingu lu mimvu ka mimvu. 48 Meno nidi dimpa di moyo. 49 Bankaka zeno badya bindya bi bakwe tumisinanga ti mane ku nsi yinkatu, kansi bafwa. 50 Kansi, bonso budi dimpa di fumini ku yulu, wonso waadya dyo, kaafwa ko. 51 «Ni Meno nidi dimpa di moyo di fumini ku yulu. Wonso muntu waadya dimpa bedyodyo waazinga ntangu zimvimba. Dimpa bedyodyo di naahaana ni nitu ani, mwanki nza yi baka luzingu.»

52 Bayudayo ni batona mu sa mpaka yawu na yawu na bata ti: «Bwedi yandi kalendi tuhaanina nitu andi mu dya e?» 53 Yesu wubateela ti: «Kedika mu kedika nina luteela, tala ti ludidi nitu yi Mwana Muntu ko nalunwini menga mandi ko, lwaaba na luzingu lu kedika ko. 54 Wonso muntu waadya nitu ani na waanwa menga mani, waatambula luzingu lu mimvu ka mimvu, mpe meno naamufulukisa mu bafwa kilumbu kinsukunu. 55 Mu dyambu ti nitu ani nkatika bindya bi kedika bidi mpe menga mani nkatika malamu ma kedika madi. 56 Wonso muntu waadya nitu ani mpe waanwa menga mani waaba nani kintwadi mu meno, na meno naaba nandi kintwadi. 57 Tata wu mfidisi wumoyo kadi mpe meno nkwe zinganga mu yandi, bwabobo mpe wonso waandya waazinga mu meno. 58 Di ni dimpa di fumini ku yulu. Diswasana na didya bankaka zeno, kansi yawu bafwa. Kansi wonso muntu waadya dimpa bedidi, waazinga ntangu zimvimba.» 59 Yesu mu ta misamu bemyomyo bu kedi longa mu nzo yi lusambulu yi Bayudayo ku mbanza Kapenawumi.

60 Bu bamana mu yuwa, milongoki myandi mimingi mi zonza ti: «Mambu mandi ngolo madi! Nani lenda tambula mo e?»

61 Yesu wuzaba ti milongoki myandi myedi nyungutilanga misamu bemyomyo, ni hahoho kabafuudila ti: «Bwedi, mpasi mina luyenisi e? 62 Bwedi lwaata tala ti luyeni Mwana Muntu wuna kwenda ku kedi teka zakidilanga e? 63 Ni Mpeve yi Nzambi yikwe haananga luzingu. Muntu kalendi sa kima ko. Mambu ma na luteedidi, madi Mpeve na luzingu. 64 Kansi mwa ndambu bantu ha kati dyeno bana lembolo kwikila.» Yesu wuzaba tuka ku ntonono banani bana lembolo kwikila mpe yondowo waamuyekola. 65 Wubwesa ta ti: «Ni hahoho nalutedidi ti: Kunaani muntu lenda kwiza ku meno tala ti Tata ani kamuheeni luve belolo ko.»

66 Tuka ntangu beyoyo, milongoki myandi mimingi misala musisa na mibika mu kwe yendi nandi. 67 Buna Yesu wufuula milongoki myandi kumi na myole ti: «Hambo bwabu yeno, lutidi mu kwenda ko e?» 68 Simoni Petelo wumuvutudila ti: «Mfumu, ku naani twaakwenda e? Ngeye wuu na mambu makwe haananga luzingu lu mimvu ka mimvu. 69 Yeto tu kwikidi na tuzebi ti ngeye Walongo wu Nzambi wudi.» 70 Yesu wubavutudila ti: «Yeno kumi na bole ka meno nalusodidi e? Mpeleko ha kati dyeno wumosi wu nkadyampemba.» 71 Yuda, mwana wu Simoni Isikalyoti, kedi zonzila bobo, mu dyambu ti yandi waamuyekola, mpeleko wumosi mu milongoki kumi na myole kadi.