1 Mu zinkuluntu zi Bayudayo mu kabu di Bafalisi kuba na bakala dimosi, nkumbu andi Nikodemo. 2 Wuyiza tala Yesu mu mpimpa na wumuteela ti: «Mulongisi, tuzebi ti Mulongisi wutambikidi Nzambi wudi, mu dyambu ti kunaani muntu lendi sa bidimbu bingitukulu bi wuna sa tala ti Nzambi kadi mu yandi ko.» 3 Yesu wumuvutudila ti: «Kedika mu kedika nakuteedidi, tala ti muntu kabutukidi mbutuka yimoona ko, kalendi yena Kimfumu ki Nzambi ko.»

4 Nikodemo wumufuula ti: «Bwedi muntu kalendi butukila dyaka tala ti weka kinunu e? Lenda kota dyaka mu moyo wu ngudi andi, mu butuka nkumbu yi nzole e?» 5 Yesu wumuvutudila ti: «Kedika mu kedika nakuteedidi, tala ti muntu kabutukidi mu mamba na mu Mpeve ko, kalendi yena Kimfumu ki Nzambi ko. 6 Wonso wubutukidi mu nsuni, nsuni kadi na wubutukidi mu Mpeve, mpeve kadi. 7 Kuyitukwandi ko bu nakuteedidi ti: "Lufweti butuka mbutuka yimoona." 8 Mupepe wukwe huhanga konso ku wutidi, wuna yuwa lusuku, kansi zebi ko kwedi wufumini na kwedi wuna tadisa. Ni bwabobo mpe bukwe banga wonso muntu butukidi mu Mpeve.»

9 Nikodemo wubwesa mufuula ti: «Bwedi bulendi hidimina e?» 10 Yesu wumuvutudila ti: «Ngeye mulongisi wudi mu Isaeli, zebi misamu bemimi ko e? 11 Kedika mu kedika nina kuteela wo, tuna zonzila mi tuzebi, mpe tuna ta kimbangi mu mi tuyeni, kansi yeno luna tambula kimbangi kyeto ko. 12 Tala ti luna kwikila ko bu nina luzonzila misamu mi ha luse lu butoto, bwabu bwedi lwaakwikila bu naaluzonzila misamu mi ku yulu e? 13 Kunaani muntu wutomboka ku yulu tala ti ka Mwana Muntu kaka ko wukulumukini tuka ku yulu.

14 Bonso buzangudila Mose nyoka ha yulu muti ku nsi yinkatu, bwabobo mpe Mwana Muntu kafweti zangulu, 15 mwanki wonso muntu waamukwikila, waabaka luzingu lu mimvu ka mimvu. 16 Kadi bonso bwabu Nzambi wutoma zola nza, ni kahaana mwana andi wakwa wumosi kaka, mwanki wonso wuna musila kiminu, kaabungu ko, kansi waabaka luzingu lu mimvu ka mimvu. 17 Mu dyambu ti, Nzambi katambika mwana andi mu nza mu fundisa nza ko, kansi mwanki nza yivuuka mu yandi. 18 Wonso waamukwikila kaafundusu ko, kansi yondowo waalembolo mukwikila meni kimfudisa, mu dyambu ti kakwikidi mu nkumbu yi Mwana wakwa wumosi kaka wu Nzambi ko. 19 Mfundusu ebu yidi: kya kizidi mu nza, kansi bantu basodidi kwawu tombe na babisidi kya, mu dyambu ti nsalulu zawu zimbi zidi. 20 Wonso muntu kwe sadilanga mambi, katiidi kya ko, mpe fweti tina kya, mwanki nsalulu zandi zimbi zilembolo zabakana kuu bantu. 21 Kansi yondowo kwe sadilanga kedika, kwe kwizanga ku kya mwanki mavanga mandi mayenika ti maa madedama na luzolo lu Nzambi.»

22 Ku manima, Yesu na milongoki myandi bayenda ku kizunga ki Yuda. Wuzakala nawu koko mwa bilumbu na wedi botikanga bantu. 23 Yoane mpe wedi botika bantu ku mbanza yi Ayinoni, bela-bela na mbanza yi Salimi, mu dyambu ti mamba mamingi maba koko. Bantu bedi kwendanga ku Yoane mu botoko. 24 Mu ntangu beyoyo buna batudidi Yoane mu boloko ko.

25 Muyudayo wumosi wedi sa mpaka na milongoki mi Yoane mu dyambu di tadidi mvedosolo. 26 Milongoki miyenda ku Yoane na mimuteela ti: «Mulongisi, yondowo wuba naaku ku simu di nzadi yi Yolodani, wu wuteela kimbangi, yandi mpe wuna botika bantu na bamvimba bana kwenda ku yandi.» 27 Yoane wubavutudila ti: «Muntu kalendi tambula kima ko tala ti Nzambi kamuheeni kyo ko.» 28 Yeno bende mbangi zani ludi bu nata ti: «Meno nii Klisto ko, kansi meno ni yondowo wubatambikidi ku mutwala andi.» 29 Toko di kwedidi yandi vwidi ndumba yi bakwedidi. Kansi nkayi yi toko bedyodyo, bela-bela kakwe banga nandi na kwe muyuwanga, mpe ndinga andi yikwe toma muyangidikanga. Kyese bekyokyo kyani kidi, mpe kilunga bwabu kidi. 30 Bika yandi kazangama, na meno nakuluka.

31 «Yondowo fumini ku yulu, hyokidi bamvimba mfunu. Kansi yondowo fumini ha nza, muntu wu nza kadi, nzonzolo andi yi kinza yidi. Yondowo fumini ku yulu, hyokidi bamvimba mfunu, 32 wuna ta kimbangi mu mikayeni na mikayudi, kansi kuu na muntu wuna tambula kimbangi kyandi ko. 33 Yondowo tambudi kimbangi kyandi, singisi ti Nzambi kedika kakwe tanga. 34 Yondowo Nzambi wukatambikidi, kwe samunanga mambu ma Nzambi, mu dyambu ti Nzambi wumuheeni Mpeve yi hyokidi kitezo. 35 Tata tiidi Mwana na tuudidi bimvimba mu moko ma Mwana. 36 Wonso kwikidi mu Mwana, tambudi luzingu lu mimvu ka mimvu. Wonso bisidi mu kwikila mu Mwana kaabaka lo ko, kansi nganzi zi Nzambi zaazingila mu yandi.»