1 Yesu wubateela ti: «Kedika mu kedika nina luteela, yondowo lembolo kotila ha mwelo wu lupangu lu mameme, kansi makini ha kibuka kikaka, mwivi na kinkita kadi. 2 Kansi yondowo kotidi ha mwelo, mumvungi wu mameme kadi. 3 Munkengi kwe muzibudilanga mwelo na mameme makwe yuwanga ndinga andi. Mu mameme ma kavwidi, yandi kwe tumisinanga kadi dimeme mu nkumbu andi na kwe natanga mo ku mbazi. 4 Bu kameni duukisa mamvimba, wuna kwe yenzi ha mutwala awu, mboki mameme mana kwe mulandi ha manima, mu dyambu ti mazeebi ndinga andi. 5 Makwe landanga muntu wu malembolo zaba ko, kansi kuwoka makwe muwokanga, mu dyambu ti mazeebi ndinga andi ko.»

6 Yesu wubateela kingana bekyokyo, kansi bantu bedi muyuwa, babakula misamu mi kedi bateela ko.

7 Yesu wubateela dyaka ti: «Kedika mu kedika nina luteela, meno nidi mwelo wu lupangu lu mameme. 8 Bamvimba bebobo bantekidila, mivi midi na binkita binaani, kansi mameme ma bayuwila ko. 9 Meno nii mwelo. Muntu waahyokila mu nzila ani waavuuka. Waakota, waaduuka mpe waabaka bindya. 10 Mwivi wukwe kwizanga mu yiba, mu honda na mu mwangisa. Meno nayizidi mwanki babaka luzingu, na babaka lo luhyokidi kitezo. 11 Meno nii mumvungi wumbote. Mumvungi wumbote kwe hombisanga luzingu lwandi mu dyambu di mameme mandi. 12 Kansi muntu bewowo kwe salanga mu dyambu di mbongo, kaa mumvungi ko mpe kavwidi mameme ko. Kamana yena ngo yina kwiza, waasa myanga mo na waawoka kwandi. Ngo bu yaakota, yaabwila na yaamwangisa mo. 13 Budidi ti mu dyambu di mbongo kwandi kisadi bekyokyo ki kwe sadilanga, ka na kyadi ki mameme ko. 14 Meno nii mumvungi wumbote. Nzebi mameme mani na mameme manzebi, 15 bonso Tata bu kanzebi, meno mpe nzebi Tata. Mpe naahaana luzingu lwani mu dyambu di mameme maani. 16 Nii dyaka na mameme mahiika malembolo ba ku kati di lupangu belulu. Mawu mpe, mfweti ma twadisa na mayuwa ndinga ani, mukangu wumosi maaba mpe mumvungi wumosi. 17 Tata wuntiidi, mu dyambu ti meno nina haana luzingu lwani, mu bwesa baka lo dyaka. 18 Kunaani muntu lenda mbonga luzingu, kansi meno bende nkwe haananga lo. Nii na lulendo mu haana lo na mu bwesa lwe baka. Yo ni ntumunu yi mpana Tata ani.»

19 Mpova bezozo zinata dyaka nkabani ha kati di Bayudayo. 20 Babingi ha kati di bantu bebobo bata ti: «Mpeve yimbi yi nandi, kilahuki kidi. Kadi nki luna muyuwila e?» 21 Kansi bahiika bavutula ti: «Muntu wuu na mpeve yimbi kalendi zonzila bobo ko. Kadi mpeve yimbi yi lendi zibula meso ma zimpofo e?»

22 Mukembo wu mbyekolo yi nzo-Nzambi wuba ku Yelusalemi. Yiba nsungi yi kyozi kingolo. 23 Yesu wedi kwe zungani mu nzo-Nzambi, ku nsye musampa wu Solomo. 24 Bayudayo bamuzungidila na bamufuula ti: «Natee mu nkye ntangu waasa ti tuba mu maketiketi e? Tala ti ngeye ni Mesiya, tumbu tuteela wo.» 25 Yesu wubavutudila ti: «Wa naluteedidi, na luna kwikila ko. Bisalu bi nina sala mu nkumbu Tata ani, bina nteela kimbangi. 26 Kansi luna kwikila ko, mu dyambu ti luu mu kabu di mameme mani ko. 27 Mameme mani makwe yuwanga ndinga ani, ma nazebi mpe makwe ndandanga. 28 Nkwe haananga mo luzingu lu mimvu ka mimvu. Malendi hombila ko na kunaani muntu lendi nzika mo ha moko mani. 29 Tata ani wumpana mo vudi lulendo na bamvimba, mpe kunaani muntu lendi zika mo mu moko ma Tata ani. 30 Meno na Tata tudi muntu wumosi.»

31 Bayudayo babwesa tota matadi mu muwinda mo. 32 Kansi Yesu wubateela dyaka ti: «Naluhidikidi misamu mimingi mimbote mifumini ku Tata. Mu nkye musamu bwabu lutiidi mu mpondila mu matadi e?» 33 Bayudayo bamuvutudila ti: «Ka mu dyambu di musamu wumbote ko tuna sosa mu kuhonda mu matadi, kansi mu dyambu ti safudi Nzambi: ngeye muntu kwa wudi na wuna kisikisa ti Nzambi wudi.» 34 Yesu wuta dyaka ti: «Nganunu wudi wusonama mu Misiku myeno ko ti: "Ntedi ti, yeno zinzambi ludi" e? 35 Tuzebi ti balendi katula mo masonoko mu Masonama ko. Mpe, Musiku wuna tumisina zinzambi yobobo basamununu mambu ma Nzambi. 36 Meno mpe Nzambi wunsola na wuntambika mu nza. Bwedi lulenda teela ti meno nina safula Nzambi, mu dyambu ti nsingisi ti: "Meno Mwana Nzambi nidi" e? 37 Tala ti nsedi bisalu bi Tata ani ko, buna lunkwikilandi ko. 38 Kansi, tala ti nsedi byo, mpeleko lwaankwikila ko, kwikileeno kani mu bisalu bi nasidi mwanki luzaba na lubakula ti Tata wuu mu meno na meno nii mu Tata.» 39 Basosa dyaka mu mukanga, kansi bamubaka ko.

40 Yesu wuvutuka ku simu di kaka di nzadi yi Yolodani, ha kibuka kyedi botikilanga Yoane bantu. Ni kazakala hoho. 41 Bantu babingi bayiza kuu yandi na bata ti: «Yoane kahidika nakani kimangu kimosi kingitukulu ko. Kansi mimvimba mi kazonzila mu muntu bewowo mii mi kedika.» 42 Ha kibuka bekyokyo bantu babingi bakwikila Yesu.