1 Yesu bu kedi hyoka mu nzila, wuyena bakala dimosi diba mpofo tuka mbutukulu andi. 2 Milongoki myandi mi mufuula ti: «Mulongisi, nani wusumuka, yandi hoti bibuti byandi, mwanki kabutuka mpofo e?» 3 Yesu wuvutula ti: «Ka yandi ko hoti bibuti byandi ko basumuka. Mwanki mavanga ma Nzambi mayenika mu yandi. 4 Bwisi bu bwakidi bukya, tufweti sala bisalu bi yondowo wu mfidisi, mpimpa yeka bela-bela, ka muntu kalendi bwesa sala ko. 5 Bu nakidi mu nza, meno nidi kya ku nza.» 6 Bu kamanisa mu zonza, wulobola mante ha nsi na wuhidika nteke mu mante mandi, ni kakukusa yo mu meso ma mpofo, 7 ni kamuteela ti: «Yenda wuyobila ku kizinga ki Silowa», mbangudulu ti "Ntumwa"Muntu wu batambikidi. Mpofo wuyenda, ni kayobila na mu nzila bu kedi kwe vutuki, meso mandi ni mayena.

8 Bantu bedi banga nandi bela-bela na bantu bedi muyenanga mu ntangu yi kedi sanga mundombila bata ti: «Ka yandi ko wedi banga wuzakala na wedi sanga mundombila e?» 9 Kuba na bantu bedi tanga ti: «Yandi.» Bakaka ti: «Kaani, ka yandi ko, kansi fwanakani nandi.» Yandi bende wedi ta ti: «Nkatika ni meno.» 10 Bamufuula ti: «Bwedi bwabu meso maku mazibukidi e?» 11 Wubavutudila ti: «Muntu wu nkumbu Yesu hidikidi mwa nteke, nkusidi yo mu meso mani na ntedidi ti: "Yenda yobila ku Silowa." Nenzi, nyobidi mboki meso mani mayeni.» 12 Bamufuula ti: «Kwedi kadi Muntu bewowo e?» Wuvutula ti: «Nzebi ko.»

13 Banata ku Bafalisi muntu wuba mpofo. 14 Kiba kilumbu ki saba Yesu kamukusa nteke na kamuzibula meso. 15 Bafalisi yawu mpe bamufuula mu zaba bwedi kanyakina. Wubavutudila ti: «Nteke kankusidi mu meso, bu nyobidingi, bwabu meso mani mayeni.» 16 Mwa kabu di Bafalisi bata ti: «Muntu bewuwu kafumini ku Nzambi ko, mu dyambu ti kana vumina saba ko.» Bakaka bavutula ti: «Bwedi munsumuki kalendi lonkila bimangu bi bobobo e?» Nkabani ni yi kota ha kati dyawu. 17 Bafalisi bamufuula dyaka ti: «Mbo ngeye, nki wuna ta mu yondowo wukuzibudi meso e?» Wuvutula ti: «Mumbikudi kadi.»

18 Kansi mfumu zi Bayudayo bakwikila ko ti mpofo kaba na bwabu yeni. Ni hahoho batumisina bibuti byandi, 19 ni bedi bavwikanga byuhu ti: «Nkatika mwana eno wudi e? Lusingisi wo ti mpofo kabutuka e? Nki bisidi ti bwabu kayena e?» 20 Bibuti bavutula ti: «Tuzebi ti mwana eto wudi na wubutuka mpofo. 21 Kansi bwedi bwabu meso mamuzibukidi, wowowo tuzebi wo ko! Mpe tuzebi ko nani wumuzibudi meso! Muvwikeeno byuhu, yandi bende wukula kadi mu luvutudila mvutu.» 22 Bibuti byandi bazonzila bobo mu dyambu ti baba na bunkuta bu zimfumu zi Bayudayo. Yawu bayuwasana mu kuma mu nzo yi lusambulu yi Bayudayo wonso muntu waasingisa ti Yesu, ni Klisto kadi. 23 Ni hahoho bibuti bata ti: «Wukula kadi, muvwikeeno byuhu yandi bende!»

24 Bafalisi batumisa dyaka yondowo wuba mpofo na bamuteela ti: «Kembisa Nzambi mu ta kikedika. Tuzebi ti Muntu bewowo munsumuki wudi.» 25 Wuvutula ti: «Nzebi ani ko tala ti munsumuki kadi. Kansi dyambu dimosi kaka nzebi: Mpofo mbedi, bwabu nina yena.» 26 Bamuvwika byuhu ti: «Nki kakusiidi e? Bwedi kakuzibudidi meso e?» 27 Wubavutudila ti: «Wa natekidi luteela, kansi lunyuwidi ko. Bwabu nki luna sosila mu yuwa wo dyaka e? Yeno mpe lutiidi luba milongoki myandi e?» 28 Bamutuka na bata ti: «Ngeye wudi mulongoki andi. Yeto milongoki mi Mose tudi. 29 Yeto tuzebi ti Nzambi wuzonza ku Mose, kansi yondowo tuzebi ko kwedi kafumini.» 30 Mpofo wubavutudila ti: «Dyambu dingitukulu nina yena: luzebi ko kwedi kafumini, mpeleko zibudi meso mani! 31 Tuzebi ti Nzambi kayuwilanga minsumuki ko, kansi kwe yuwilanga wonso muntu kwe mu zitisanga na kwe sadilanga luzolo lwandi. 32 Tuka mu tuka, twayudi ko ti muntu zibudi meso ma muntu wu butukidi mpofo. 33 Tala ti yandi kafuma ku Nzambi ko, nga kalendi hidika mibubu ko.» 34 Bamuvutudila ti: «Ngeye wudi munsumuki tuka mbutukulu aku, kansi ngeye tiidi mu tuhaana ndongosolo e?» Ni bamukuma ku mbazi.

35 Yesu bu kayuwa ti bamukumini ku mbazi, wuyenda mutala na wumufula ti: «Ngeye kwikidi mu Mwana Muntu e?» 36 Wuvutula ti: «Mfumu, kadi nani wo, mwanki na mukwikila e?» 37 Yesu wumuteela ti: «Wuna muyena, yondowo wu nazonza naku, ni yando.» 38 Buna wuta ti: «Nkwikidi Mfumu.» Ni kafukama ha ntadisi andi luse ha nsi. 39 Mboki Yesu wuta ti: «Nayizidi mu nza beyiyi mwanki mfundusu yi ba: mwanki zimpofo ziyena mpe yobobo bakwe yenanga, bakituka zimpofo.» 40 Mwa ndambu yi Bafalisi baba nandi, bayuwa misamu bemyomyo, bamufuula ti: «Yeto mpe bwabu zimpofo tweka e?» 41 Yesu wubavutudila ti: «Tala ti zimpofo ludi, nganunu ludyeno na masumu ko. Kansi luteedi ti: "Tuna yena", bwabu masumu makwa neeno.»