1 Yesu bu kamanisa mu sambila, wuyenda na milongoki myandi ku simu dihiika di nto yi Sedeloni. Mfuba yi miti yiba koko, mpe wukota mu mfuba beyoyo na milongoki myandi. 2 Yuda wedi muyekola wuzaba kibuka bekyokyo, mu dyambu ti Yesu na milongoki myandi baba na kifu kye kwe kutakananga koko. 3 Yuda wuyenda koko, mpe wunata kamba di zimbulu-mbulu na minkengi mi muhaana mfumu zi zinganga-Nzambi na Bafalisi. Yawu baba na binwanunu, na bisisi bi tiya, mpe na minda. 4 Yesu wuzaba misamu mimvimba myedi mutuudila, wufinama ku yawu na wubafuula ti: «Nani luna sosa e?» 5 Bavutula ti: «Yesu mwisi-Nazaleti.» Yesu wubateela ti: «Ni Meno.» Yuda wedi mu yekola, wuba ha kati dyawu. 6 Yesu bu katumbu bateela ti: «Ni Meno», bavutukisa ku manima na babwa ha nsi. 7 Yesu wubwesa bafuula ti: «Nani luna sosa e?» Bavutula dyaka ti: «Yesu mwisi-Nazaleti.» 8 Yesu wubwesa bavutudila ti: «Ni meno naluteedidi. Tala ti ni meno luna sosa buna bikeno yababa benda kwawu.»

9 Bwabobo misamu mi kata miyenda detila: «Meno nzimbisi kani wumosi mu yobobo bawumpaana ko.» 10 Simoni Petelo wuba na mbele yi mvita, wuduukisa yo mu lukutu, na wukata kisadi ki mfumu yi nganga-Nzambi, na wumuzenga kutu dimimbakala. Kisadi bekyokyo nkumbu andi Malikuse. 11 Kansi, Yesu wuteela Petelo ti: «Vutula mbele aku mu lukutu lwandi. Wuna banza ti mbo nabisa mu nwa mbungu yi yimpasi yimpeni Tata ani mu nwa e?»

12 Kabu di zimbulu-mbulu, ha kimosi na mfumu awu, na minkengi mi zimfumu zi Bayudayo, babwila Yesu na bamubindika misinga. 13 Bateka munata ku Ana buko bu Kayifa. Kayifa wuba mfumu yi zinganga-Nzambi mu mumvu bewowo. 14 Ni Kayifa wulwengisa mfumu zi Bayudayo bu kata ti: «Luna yena ko ti bulutidi bumbote muntu wumosi ka fwa mu dyambu di mukangu.»

15 Simoni Petelo na mulongoki wuhiika balanda Yesu. Mulongoki bewowo wuhiika, wuba wuzabakana ku mfumu zinganga-Nzambi, buna wukota ha kimosi na Yesu ha mbazi yi lupangu ku kati di nzo yi mfumu zinganga-Nzambi. 16 Kansi Petelo wusala ha mbazi bela-bela na mwelo. Mulongoki wuhiika, yondowo wuba wuzabakana ku mfumu zinganga-Nzambi, wuduuka ha mbazi na wuzonza na mukento wedi kebanga mwelo, mboki wukotisa Petelo. 17 Kisadi kyedi kebanga mwelo ki muteela ti: «Ngeye mpe wudi wumosi mu milongoki mi muntu bewuwu ko e?» Petelo wuvutula ti: «Kaani, nii mulongoki andi ko!»

18 Kyozi kikingi kiba, ni hahoho bisadi na minkengi bazungidila tiya tu makala tu banamika mu yetila. Petelo mpe wuba nawu kintwadi na wedi yetila nawu tiya.

19 Mfumu yi zinganga-Nzambi wuvwika Yesu byuhu mu myo mitadidi milongoki myandi na ndongosolo andi. 20 Yesu wumuvutudila ti: «Meno ha meso ma bantu bamvimba nabe zonzila. Meno nabe longa mu nzo zi lusambulu zi Bayudayo na mu nzo-Nzambi mu kwe kutakananga Bayudayo bamvimba, nateedi kani dyambu mu mansweki ko. 21 Nki wuna mvwikila kyuhu e? Mina zonzidi, fuula ku yobobo babe nyuwa. Yawu bazebi mi nateedi.» 22 Mu mpova bezozo, wumosi mu minkengi wuba hoho, wukaata Yesu mbata, na wuta ti: «Ngeye bobobo wuna haanina mvutu ku mfumu yi zinganga-Nzambi e?» 23 Yesu wumuvutudila ti: «Tala ti bumbi nazonzidi, nteela dyambu dimbi di nateedi. Tala ti bumbote nazonzidi, bila nki wunkaatidi mbata e?» 24 Buna Ana wumutambika wubinduku mu misinga ku Kayifa mfumu yi zinganga-Nzambi.

25 Simoni Petelo wuba hoho na wedi yetila tiya. Bamuteela ti: «Ngeye mpe wuu wumosi mu milongoki myandi ko e?» Petelo wubisa na wuta ti: «Kaani, kameno ko!» 26 Wumosi mu bisadi bi mfumu yi zinganga-Nzambi, wu ba kanda dimosi na yondowo Petelo wu kazenga kutu, wumuteela ti: «Ka ngeye ko nayeningi ku mfuba nandi e?» 27 Kansi Petelo wubisa kwandi dyaka. Mu kilokola bekyokyo kwandi, nsusu yikuba.

28 Mene na mene, baduuka ku nzo yi Kayifa, na banata Yesu ku nzo yi kisalu yi munyadi, mwisi-Loma. Bayudayo bakota mu kati ko, mwanki balembolo sumuka, mpe badya bindya bi Pake. 29 Pilatu wuduuka mu babwana na wubateela ti: «Nkye musamu luna fundila muntu bewuwu e?» 30 Bamuvutudila ti: «Tala ti muntu bewuwu kakwe hidikanga misamu mimbi ko, nganunu twizidi muyekola mu moko maku ko.» 31 Buna Pilatu wubavutudila ti: «Mubongeeno yeno bende na mufundiseeno bonso buu Misiku myeno.» Mfumu zi Bayudayo bamuteela ti: «Yeto tuu na luve mu zengila muntu lufwa ko.»

32 Bwabobo misamu mi ta Yesu miyenda detila bu kazabikisa nkye mfwilu kaafwila. 33 Pilatu wukota dyaka mu kati di nzo andi yi kisalu. Wutumisa Yesu na wumufuula ti: «Ngeye ni ntinu yi Bayudayo e?» 34 Yesu wumuvutudila ti: «Bwedi, ku nsye mutima aku wufumini hoti bantu bahiika ba kuteedidi wo mu nitu ani e?» 35 Pilatu wumuvutudila ti: «Kadi meno Muyudayo nidi e? Bisi nsi aku na mfumu zi zinganga-Nzambi bakuyekodi ku meno. Nkye musamu sidi e?» 36 Yesu wuvutula ti: «Kintinu kyani kidi ki nza beyiyi ko. Tala ti kintinu kyani ki nza beyiyi kidi, bisadi byani biketi nwanina mwanki nalembolo yekolo mu moko ma zimfumu zi Bayudayo. Kansi kintinu kyani kii ki nza beyiyi ko.» 37 Pilatu wumuteela bwabu ti: «Ngeye ntinu wudi e?» Yesu wumuvutudila ti: «Ngeye wuna ta wo ti meno ntinu nidi. Meno nabutuka, mpe nayiza mu nza mu teela kedika kimbangi. Wonso muntu wuu mu kedika, kwe yuwanga ndinga ani.» 38 Pilatu wumufuula ti: «Kedika ni nki e?»

Pilatu bu kamana ta bobo, wuduuka dyaka ku mbazi kuba Bayudayo na wubateela ti: «Meno mbeki kibila kye muzengila lufwa ko. 39 Kansi bonso budi kifu kyeno, konso mukembo wu Pake, nkwe luyambudilanga nkole yimosi. Bwabu lutiidi na luyambudila ntinu yi Bayudayo e?» 40 Buna balookana ti: «Kaani, ka yandi ko, kansi Balabase.» Nkyongono Balabase kinkita kwandi kiba.