1 Ku manima, Yesu wutomboka ku Yelusalemi ku mukembo wumosi wu Bayudayo. 2 Ku Yelusalemi, bela-bela na mwelo wu Mameme, kuba na kizinga ki mamba ki bakwe tumisinanga mu ndinga yi kihebeleo ti Betezata. Kuba na misampa mitanu miba na makunzi mamala. 3 Ku nsye misampa bemyomyo, mbevo zizingi ziba zilambalala: zimpofo, baa na byeta, baa na mbwolokoto. [Bedi kingilanga ti mamba maningana, 4 mu dyambu ti ntangu zihiika mbazi yimosi yi Mfumu yedi kulumukanga ha kizinga na yedi ningisanga mamba. Ku manima ma ningusunu yi mamba, mbevo yintete yedi kulumukanga mamba, yedi nyakanga mu kyonso kimbevo ki nandi.] 5 Bakala dimosi diba hoho, diba na kimbevo ki mbwolokoto tuuka mvula makumatatu na nana. 6 Yesu bu kamuyena wu lambalala na bu kazaba ti tuuka ntama kaa hoho, ni kamufuula ti: «Tiidi wunyaka e?» 7 Mbevo ni kamuvutudila ti: «Mfumu, nii na muntu waantuba mu kizinga ko mu ntangu yikwe ningananga mamba, bu nasosa mu kulumuka momo, muntu wukaka wuntekididi.» 8 Yesu wumuteela ti: «Telama, bonga nkwala aku na yenda dyati!» 9 Mpe bakala ditumbu nyaka. Wubonga nkwala andi na wutona mu kwe yendi.

Kilumbu bekyokyo ki saba kiba. 10 Mfumu zi Bayudayo ziteela muntu bewowo wu nyaka ti: «Bubedidi kilumbu ki saba kidi, wu na luve ko mu nata nkwala aku.» 11 Wubavutudila ti: «Yondowo wu nyakisi, yandi wu ntedidi ti: "Bonga nkwala aku na yenda dyati!"» 12 Bamufuula ti: «Nkye muntu wukuteedidi ti: "Bonga nkwala aku na yenda dyati!" E?» 13 Kansi muntu bewowo wu kanyakisa, kazaba ko nani wuba, mu dyambu ti Yesu wuzimbala ha kati di mpumbu yi bantu yi ba hoho.

14 Ku manima ma mwa ntangu, Yesu wumubwana mu kati di nzo-Nzambi na wumuteela ti: «Nyeki bwabu, kubwesandi sumuka ko mwanki dyambu dihyokidi kitezo dilembolo kutudila.» 15 Muntu bewowo wuyenda teela mfumu zi Bayudayo ti ni Yesu wu munyakisa. 16 Ni hahoho Bayudayo batona mu mukwamisa mu dyambu ti wunyakisa mu kilumbu ki saba. 17 Kansi Yesu wubavutudila ti: «Tata ani wuna sala natee ntangu beyiyi, meno mpe nina sala.» 18 Bayudayo bu bayuwa bobo, basosa bwedi bwe muhondisila mu dyambu ti kavumina musiku wu saba ko, mpe wuta ti Nzambi ni nkatika Tata dyandi, na wukifwanikisa ti kidede badi na Nzambi.

19 Yesu wubwesa bateela dyaka ti: «Kedika mu kedika nina luteela, Mwana kalendi hidika dyambu mu lutumu lu yandi bende ko, kansi di kayeni dina hidika Tata, dyadyodyo mpe kaahidika. Mu dyambu ti, mimvimba mikwe hidikanga Tata, myamyomyo mpe Mwana kakwe hidikanga.» 20 Mu dyambu ti Tata tiidi Mwana na kwe mulonkanga mimvimba mi kakwe hidikanga yandi bende. Mbo kamulonka bisalu bivudidi dyaka bunene, mwanki luyituku. 21 Bonso Tata kakwe fulukisanga bafwa na kwe bahaananga luzingu, bwabobo mpe Mwana kakwe haananga luzingu ku wonso muntu wu katiidi. 22 Mpe, Tata kafundisanga muntu ko, kansi wuheeni lulendo lumvimba lwe fundisila ku Mwana, 23 mwanki bamvimba bazitisa Mwana bonso bu bakwe zitisilanga Tata. Yondowo wa lembolo zitisa Mwana, kazitisi Tata di mufidisi ko.

24 Kedika mu kedika nina luteela, wonso muntu wuna yuwa mambu mani na kwikidi yondowo wu ntambikidi, beki luzingu lu mimvu ka mimvu. Yandi kaabedoso ko, kansi katukidi ku lufwa na weka ku luzingu. 25 Kedika mu kedika nina luteela, kilokola kyefwana, bwabu kifweni, bafwa ki bayuwa ndinga yi Mwana Nzambi, mboki yobobo baayuwa yo baazinga. 26 Mu dyambu ti Tata bu kaa na luzingu mu yandi bende, bwabobo mpe kahaanina ku Mwana kaba na luzingu mu yandi bende. 27 Wumuheeni lulendo lwe fundisa mu dyambu ti yandi wudi Mwana Muntu. 28 Luyitukwandi mu mimi ko, mu dyambu ti ntangu yina fwana ya yuha yobobo badi mu zindyamu, mu yuwa ndinga andi, 29 mpe baatotuka mu zindyamu. Yobobo basadidi mambote bafulukulu mu tambula luzingu. Kansi yobobo basadidi mambi baafuluka mu tambula mfundusu.

30 Meno nalendi hidika dyambu mu lutumu lu meno bende ko. Meno nkwe fundisanga bonso bunteedidi Tata, mpe mfundusu ani yimbote yidi, mu dyambu ti nalendi sadila luzolo lwani ko, kansi lu yondowo wu mfidisi.

31 «Tala ti nteedi kimbangi mu meno bende, kimbangi kyani kilendi ba kikedika ko. 32 Kansi muntu wuhiika wuna nteela kimbangi, mpe nzebi ti kimbangi kyandi mu meno kikedika kidi. 33 Yeno lutambika bantu ku Yoane, yandi wuteela kedika kimbangi. 34 Meno nii na nsatu ko ti muntu kanteela kimbangi, kansi nzonzidi bobo, mwanki yeno lubaka mpulusu. 35 Yoane wuba bonso mwinda wu banamikini na wuna kyenzola, yeno mpe lutambula mu yangalala mu kya kwandi, mu mwa ntangu. 36 Meno nii na kimbangi kihyokidi bunene na ki Yoane: bisalu bi nina sala, byo bimpana Tata mu lungisa, bina nteela kimbangi na bina lonka ti Tata wu mfidisi. 37 Mpe Tata wu mfidisi, wunteedidi yandi bende kimbangi. Kansi yeno lwayudi ndinga andi ko na lwayeni kini kyandi ko. 38 Mpe lukwe kebanba mambu mandi ko, mu dyambu ti luna kwikila mu yondowo wu kafidisi ko. 39 Lukwe fyongoninanga Masonama mu dyambu ti mu mabanza meno, mwamomo lwaabakila luzingu lu mimvu ka mimvu. Nkyongono ni mamomo ma kwe nteelanga kimbangi. 40 Kansi lutiidi mu kwiza ku meno ko mu lubaka luzingu lu mimvu ka mimvu.

41 Nalombidi ko ti bantu bansiika. 42 Kansi naluzebi, luu na luzolo lu Nzambi mu yeno ko. 43 Nayizidi mu nkumbu yi Tata ani, na lubisidi mu ntambula. Kansi ti muntu wuhiika wizidi mu nkumbu yi yandi bende, yandi lwaatambula. 44 Yeno lutiidi mu heekasananga masiika yeno na yeno, kansi lusosangeno ko masiika ma kwe fumanga ku Nzambi yii kwa yimosi, bwedi lulendi kwikila e?

45 Lubanzandi ko ti meno naalufuunda ku Nzambi. Mumfundi eno ni Mose wu lusididi kivuvu. 46 Mu dyambu ti, tala ti lukwikila Mose, nganunu lunkwikidi meno mpe, mu dyambu ti meno kazonzila mu masonama mandi. 47 Kansi ti luna kwikila mu ma kasonika ko, bwedi lulendi kwikila mu mi nina zonza e?»