1 Bafalisi bayuwa ti Yesu wuvudidila Yoane mu kitula bantu baba milongoki na mu botika. 2 (Mu toma tala, Yesu Yandi bende kabotika muntu ko. Kansi milongoki myandi myedi botikanga.) 3 Yesu bu kayuwa bobo, wusisa kizunga ki Yuda, ni kavutuka kwandi ku kizunga ki Ngalili.

4 Mu kwenda ku Ngalili, fweti hyokila mu kizunga ki Samaliya.

5 Yesu wutuula ha mbanza yimosi yi Samaliya yi nkumbu Sikali, bela-bela na mfuba yi Yakobi yi kahaana ku mwana andi Yosefi. 6 Hahoho haba bulu di mamba di Yakobi. Yesu wuba nahongolo mu dyambu di nzyetolo, ni kazakala ha ntendo bulu di mamba. Kampe yiba bela-bela na ntangu ha mbata.

7 Mukento wumosi mwisi-Samaliya wuyiza mu teka mamba. Yesu wumuteela ti: «Mpeka mwa mamba na nwa.» 8 (Milongoki myandi miyenda ku mbanza mu kwe sumba bye dya.) 9 Kansi mukento wu mwisi-Samaliya wuteela Yesu ti: «Ngeye Muyudayo wudi, bwedi wuna ndombila meno mamba me nwa, meno mwisi-Samaliya e?» (Mu dyambu ti Bayudayo bedi banga kintwadi na bisi-Samaliya ko.) 10 Yesu wumuvutudila ti: «Tala ti zebi munkayulu wu Nzambi, mpe nani wuna kulomba mamba me nwa, nga ngeye fwanakani mu mulomba mo. Yandi keti kuhaana mamba ma kwe haananga luzingu.» 11 Mukento wumuteela ti: «Mfumu, ngeye wuu na ka kisiku kimosi kye tekila mamba ko, mpe bulu disunda didi. Kwedi lenda bakila mamba bemomo ma kwe haananga luzingu e? 12 Nganunu ngeye hyokidi tata eto Yakobi, wu tuhaana bulu di mamba bedidi e? Yandi bende ma kanwa, na baala bandi na bibulu byandi» 13 Yesu wumuvutudila ti: «Wonso muntu nwini mamba bemama, waabwesa ba dyaka na mpwila yi mamba, 14 kansi wonso muntu waanwa mamba ma naamuhaana, kaabwesa ba na mpwila yi mamba ko. Mamba ma naamuhaana maakituka mu yandi nto yi luzingu lu mimvu ka mimvu.» 15 Mukento wumuteela ti: «Mfumu, mpeka mamba bemomo mwanki nalembolo bwesa ba na mpwila yi mamba mpe nabiika mu kwiza tekanga mamba ehaha.»

16 Yesu wumuteela ti: «Yenda wutumisa mulumi aku mboki vutuka ehaha.» 17 Mukento wumuvutudila ti: «Nii na mulumi ko.» Yesu ni kamuteela ti: «Wu kedika teedi ti: "Nii na mulumi ko", 18 mu dyambu ti weka neba na babakala batanu, mpe dyo di naaku bwabu, ka mulumi aku ko. Wu kedika teedi.» 19 Mukento ni kamuteela ti: «Mfumu, bwabu mbakudi ti mumbikudi wudi. 20 Zinkaka zeto ha yulu mulandu bewuwu bedi sambidilanga Nzambi, kansi yeno lukwe singisanga ti ku Yelusalemi kaka ku kibuka ki fwanakani mu sambila Nzambi.» 21 Yesu wumuteela ti: «Nge mukento, nkwikila, ntangu yina kwiza, ka ha yulu mulandu bewuwu ko, hoti ka ku Yelusalemi ko lwaabwesa sambidila Tata. 22 Yeno lukwe sambilanga Nzambi yi lulembolo zaba, kansi yeto tukwe sambilanga Nzambi yi tuzebi, mu dyambu ti mpulusu yina fuma ku Bayudayo. 23 Kansi ntangu yaafwana, bwabu yifweni, yi minsambidi mi kedika, myaasambila Tata mu Mpeve na mu kedika. Ni minsambidi mibobobo Tata kakwe sosanga. 24 Nzambi Mpeve kadi. Ni hahoho, bamvimba bana musambila, bafweti musambila mu Mpeve na mu kedika.» 25 Mukento wumuteela ti: «Nzebi ti Mesiya wu bakwe tumisinanga ti Klisto, waakwiza. Bu kaakwiza, mbo katuteela mimvimba.» 26 Yesu wumuteela ti: «Mesiya, ni meno nina kuzonzisa.»

27 Mu kilokola bekyokyo, milongoki myandi mituula. Miyituku bu bayena Yesu wedi zonza na mukento. Kansi ka mulongoki wumosi kamufuula ko ti «Nki wuna mufuula e?» Hoti «Nkye musamu wuna zonza nandi e?» 28 Mukento wusala sisa sanga di mamba, wuvutuka ku mbanza na wuyadila bantu mpolo ti: 29 «Yizeno lutala bakala di ntedidi mimvimba mi nasiidi. Kampe yandi wuu Mesiya e?» 30 Bantu ni batotoka mu mbanza na bayiza ku Yesu.

31 Mu kilokola bekyokyo, milongoki myedi kwamisa Yesu ti: «Dya, Mulongisi!» 32 Kansi wubateela ti: «Meno, nii na bindya bi lulembolo zaba.» 33 Milongoki myedi teelasana yawu na yawu ti: «Nganunu muntu wumutwadidi bindya e?» 34 Yesu wubateela ti: «Bindya byani, ni mu sadila luzolo lu yondowo wu mfidisi na mu lungisa kisalu ki kantuma mu sala.» 35 Kadi lukwe tanga ko ti: «Ngonda ziya kwandi zisiidi, buna ntangu yi nyonzokolo yifweni e?» Kansi nalutedidi ti: sendoleeno meso na taleno zimfuba, mbutu bwabu ziyedidi na zifweni mu yonzika. 36 Kiyonziki ki mbutu tambudi bwabu mufutu andi, mboki wuna yonzika mbutu zi luzingu lu mimvu ka mimvu, mwanki kikuni na kiyonziki bayangalala ha kimosi. 37 Kingana bekiki kikedika kidi: «Wumosi wuna kuna, na wuhiika wuna yonzika.» 38 Meno, nalutambikidi mu kwe yonzika bi lulembolo yenina mpasi mu sala. Bahiika basedi, kansi yeno lubeki ndandu yi kisalu kyawu.

39 Mu dyambu di kimbangi ki mukento bu kata ti: «Ntedidi mimvimba mi nasiidi», bisi-Samaliya babingi ba mbanza beyoyo bakwikila Yesu. 40 Ni hahoho, bisi-Samaliya bu batula ha ntadisi andi bamubombidila kazakala nawu. Ni kazakala nawu bilumbu byole hoho. 41 Babingi dyaka bakwikila Yesu mu dyambu di misamu mi kedi ta yandi bende, 42 mpe ni bedi ta ku mukento ti: «Tukwikidi mu dyambu di mi teedi kaka ko, kansi yeto bende tumuyudi, mpe tuzebi ti kedika, yandi ni Muvuukisi wu nza.»

43 Ku manima ma bilumbu byole, Yesu wukatuka hoho na wuyenda ku kizunga ki Ngalili. 44 Yandi bende wuta ti: «Mumbikudi kazitusungu mu nsi andi ko.» 45 Bu katula ku kizunga ki Ngalili, bisi-Ngalili bamutambula bumbote. Mu dyambu ti bayena mimvimba mi hidika Yesu ku Yelusalemi ku mukembo wu Pake. Yawu mpe ko baba.

46 Yesu wuvutuka ku mbanza yi Kaana ku kizunga ki Ngalili ku kakitudila mamba vinu.

Ku mbanza Kapenawumi kuba na kisadi kimosi ki ntinu, mwana andi wuba na kimbevo. 47 Bu kayuwa ti Yesu katukidi ku Yuda tudidi ku kizunga ki Ngalili, wuyenda mu yena na wumubombidila kenda kanyakisa mwana andi wu bakala wu ba bela-bela mu fwa. 48 Yesu wumuteela ti: «Tala ti luyeni bidimbu na bimangu bingitukulu ko, lulendi kwikila ko e?» 49 Kisadi ki ntinu wumuvutudila ti: «Mfumu, yiza munswalu teekila mwana ani kafwa.» 50 Yesu wumuteela ti: «Vutuka ku nzo aku, mwana aku wumoyo kadi!» Bakala bedyodyo dikwikila myo mi muteela Yesu, ni kavutuka. 51 Bu kedi vutuka, bisadi byandi biyiza mubwana na bimuteela ti: «Mwana aku wumoyo kadi!» 52 Wubafuula mu nkye ntangu kanyakini, bamuvutudila ti: «Mazono mu kilokola kintete ku manima ma ntangu ha mbata, yuku-yuku di mudyemi.» 53 Tata ni kabakula ti Yesu ni mu kilokola bekyokyo kamuteela ti: «Mwana aku wumoyo kadi.» Buna yandi na kanda dyandi bakwikila Yesu. 54 Kyo ni kidimbu kinzole kingitukulu ki sa Yesu ku kizunga ki Ngalili bu kafuma ku kizunga ki Yuda.