1 Yesu wuyenda ku mulandu wu miti mi Olive. 2 Mu minkyela mi bwisi, wuvutuka ku nzo-Nzambi na bantu bayiza ha ntadisi andi. Bu kazakala ni katona mu balonga. 3 Milongisi mi Misiku na Bafalisi bamutwadila mukento wumosi wu babatikisa buna wuna sadila kinsuza. Bamutuula ha kati-kati di bantu bamvimba 4 na bafuula Yesu ti: «Mulongisi, mukento bewuwu, bamubatikisi buna wuna sadila kinsuza. 5 Mu Misiku, Mose wuna tutuma mu honda mu matadi bakento bamutindu bewuwu. Bwabu ngeye, nki wunata e?»

6 Bamuvwika kyuhu bekyokyo, mu mutambila mutambu, mwanki ba baka kibila kye mufundila. Kansi, Yesu wuyinama na wutona mu sonika ha nsi mu mulembo. 7 Bu bedi tatamana mu muvwika byuhu, Yesu wusungika mutu na wuta ti: «Bika yondowo lembolo ba na disumu, kaba wuntete mu muwinda tadi.» 8 Ku manima, wubwesa yinama na wutona dyaka mu sonika ha nsi. 9 Bu bayuwa bobo, batona mu kwenda wumosi-wumosi, kutonina ku ba bihunda. Yesu wusaala yandi kaka na mukento bewowo wuba wutelama ha kati di lukongolo. 10 Bu kasungika mutu, Yesu wumufuula ti: «Mukento, bakufundidi kwedi badi e? Ku muntu ko wu kuheeni kitumbu e?» 11 Wuvutula ti: «Mfumu, ka muntu ko.» Yesu wumuteela ti: «Yenda kwaku, meno mpe nakuhaana kitumbu ko, kansi kubwesandi sumuka ko.»]

12 Yesu wubateela dyaka ti: «Meno nidi kya ku nza. Wonso muntu waandanda, kaadyata mu tombe ko, kansi waabaka kya ku luzingu.» 13 Bafalisi bamuteela ti: «Wuna ta kimbangi mu nge bende, buna kimbangi kyaku kii kikedika ko.» 14 Yesu wubavutudila ti: «Tala ti nteedi kimbangi mu me bende, kimbangi kyani kikedika kidi, mu dyambu ti nzebi kwedi mfumini na kwedi nina kwenda. Kansi yeno luzebi ko kwedi mfumini na kwedi nina kwenda. 15 Yeno mu kinsuni lukwe fundisilanga, meno na fundisanga muntu ko. 16 Tala ti meno mfundisi, lufundusu lwani lu kedika ludi, mu dyambu ti nii me kaka ko: Tata wu mfidisi wu nani kintwadi. 17 Mu Misiku myeno wuu wusonama ti kimbangi ki bantu bole, kikedika kidi. 18 Meno, nina ta kimbangi mu me bende, na Tata mpe wu mfidisi wuna nteela kimbangi.» 19 Bamufuula ti: «Tata aku kwedi kadi e?» Yesu wuvutula ti: «Yeno lunzebi ko na luzebi Tata ani ko. Tala ti lunzebi, nganunu luketi zaba mpe Tata ani.»

20 Yesu wuduukisa mpova bezozo buna wuna longa mu nzo-Nzambi, ha ntendo kima ki bakwe haaninanga minkayulu. Ku muntu wu mukanga mu dyambu ti ntangu andi yiba buna yafweni ko.

21 Yesu wubateela dyaka ti: «Naakwenda, mpe lwaansosa. Kansi yeno lwaafwa mu masumu meno. Lulendi kwenda kuma ku naakwenda ko.» 22 Bayudayo bakifuula yawu na yawu ti: «Kuhonda kakihonda e? Mu dyambu ti teedi ti: "lulendi kwiza ku nina kwenda ko"» 23 Yesu wubavutudila ti: «Yeno ha butoto lufuma, meno ku yulu nafuma. Yeno bisi-nza beyiyi ludi, meno nidi mwisi-nza beyiyi ko. 24 Ni hahoho nalutedidi ti yeno mu masumu meno lwaafwila. Tala ti lukwikidi ko ti meno ni "Nidi", mu masumu meno lwaafwila.» 25 Bamufuula ti: «Ngeye ni nani e?» Yesu wubavutudila ti: «Misamu myamyomyo nina luteelanga tuka ku mbadukulu. 26 Misamu mi lutadidi, mimingi mii nani mu luteela na mu lufundisa. Kansi yondowo wu mfidisi, kedika kakwe tanga, mpe meno mi nyudi ku yandi, ni myamyomyo nina zabikisa mu nza.»

27 Babakula ko ti ni Tata kedi bazonzila. 28 Buna Yesu wubateela ti: «Mu ntangu yi lwaazangula Mwana Muntu, mbo lubakula ti ni meno "Nidi", mpe naahidika ka musamu mu luzolo lu me bende ko. Kansi nina zonza kaka misamu mi ndonga Tata. 29 Yondowo wu mfidisi, wuu nani kintwadi, kambikanga me kaka ko, mu dyambu ti nkwe hidikanga kaka misamu mi katiidi.» 30 Bu kedi zonzilanga bobo, babingi bamukwikila.

31 Yesu wuta ku Bayudayo ba mukwikila ti: «Tala ti luu bakwikama mu mambu mani, nkatika milongoki myani ludi, 32 lwaazaba kedika, mpe kedika kyaaluhaana kimpwanza.» 33 Bamuvutudila ti: «Yeto mu nkuna yi Abalahami tudi na twabedi mindongo mi muntu ko. Bila nki lendi tuteela ti: "mbo lubaka kimpwanza e?"» 34 Yesu wubavutudila ti: «Kedika mu kedika naluteedidi, wonso sumukini, weka mundongo wu disumu. 35 Mundongo kalendi sikila mvimba mu kanda di kadi ko, kansi mwana kwe sikilanga mvimba mu kanda . 36 Tala ti Mwana wuluheeni kimpwanza, kedika mbo luba mu kimpwanza. 37 Nzebi ti mu nkuna yi Abalahami ludi. kansi luna sosa mu mpondoso mu dyambu ti lutambudi mambu mani ko. 38 Meno nina luzonzila misamu mi nayeni ku Tata ani, yeno mpe, sadileeno misamu mi lulongokidi ku tata eno.»

39 Bamuvutudila ti: «Tata eto ni Abalahami.» Yesu wubateela ti: «Tala ti baala ba Abalahami ludi, nganunu luketi sadila bonso Abalahami. 40 Mpeleko naluteedidi kedika ki nalongokidi ku Nzambi, kansi, yeno luna sosa kaka mu mpondisa. Abalahami kasadila nsalulu beyoyo ko. 41 Yeno, luna sadila bonso tata eno.» Bamuvutudila ti: «Yeto tuu baala ba makangu ko. Tata dimosi kwandi di neto, ni Nzambi.» 42 Yesu wuta dyaka ti: «Tala ti Nzambi nkatika Tata eno kadi, nganunu lukwe ntyanga, mu dyambu ti ku Nzambi nafumini mpe mu nkumbu andi nii haha. Nayizidi mu luve lu me bende ko, kansi yandi wu mfidisi. 43 Bila nki luna lembolo bakudila mi nina luteela e? Mu dyambu ti lukwe lembananga mu yuwa mambu mani. 44 Yeno Tata eno ni nkadyampemba, mpe lukwe ntyanga mu sadila luzolo lu tata eno. Tuka mu mbadukulu, mumpondi wunaani wudi. Kakwe tanga kedika ko mu dyambu ti kaa muntu wu kedika ko. Bu kakwe tanga luvunu, luvunu lufwanakani na nkadulu andi, mu dyambu ti kihuni kidi na tata di luvunu kadi. 45 Kansi meno nina ta kedika, kansi luna nkwikila ko. 46 Nani mu yeno lenda lonka ti disumu nsidi e? Tala ti kedika nina ta, bila nki yeno luna lembolo nkwikidila e? 47 Wonso wuu mu Nzambi, kwe yuwanga mambu ma Nzambi. Tala ti, yeno lukwe yuwanga mo ko, mu dyambu ti luu mu Nzambi ko.»

48 Bayudayo bavutudila Yesu ti: «Kedika kyeto mu ta ti mu Samaliya wudi na mpeve yimbi yi naaku e?» 49 Yesu wubavutudila ti: «Meno nii na mpeve yimbi ko. Tata ani nina zitisa, kansi yeno luna bisa mu nzitisa. 50 Meno nina sosa masiika mani ko. Kuu na muntu wumosi wuna nsosila mo nakwe fundisanga. 51 Kedika mu kedika nina luteela, ti muntu kebidi mambu mani, kaafwa ko.»

52 Bayudayo bamuteela ti: «Bwabu tubakudi ti nkatika mpeve yimbi yi naku! Abalahami wufwa, bamimbikudi mpe bafwa, kansi ngeye wunata ti: "Tala ti muntu kebidi mambu mani, kaafwa ko." 53 Nganunu ngeye hyokidi na tata eto Abalahami e? Yandi wufwa na mimbikudi mpe mifwa. Ngeye nani wuna kibongila e?» 54 Yesu wuvutula ti: «Tala ti nina kisiika me bende, masiika mani maaba ma mpamba. Tata ani wuna nsiika wu lukwe tumisinanga ti: "Nzambi eto", 55 yeno lumuzebi ko, kansi meno namuzebi. Tala ti naluteedidi ti namuzebi ko, naaba muntu wu luvunu bonso yeno. Kansi meno namuzebi mpe nkwe kebanga mambu mandi. 56 Tata eno Abalahami, wuyangalala bubwingi bu kayindula mu yena kilumbu kyani. Wuyena kyo mpe wuyangalala.» 57 Bayudayo bamuteela ti: «Ngeye walungisi mvula makumatanu ko na wuna ta ti Abalahami yandi wuyena!» 58 Yesu wubavutudila ti: «Kedika mu kedika nina luteela ti: tekila Abalahami kabutuka, meno "nidi".» 59 Ni batota matadi mu muwinda mo. Kansi Yesu wuswama na wuduuka mu nzo-Nzambi.