1 Ku manima, Yesu wutatamana nzyetolo andi mu kizunga ki Ngalili, kansi wubisa mu zyeta mu kizunga ki Yuda mu dyambu ti zimfumu zi Bayudayo zedi sosa mu muhondisa. 2 Mukembo wu nzo zi Mileba wu Bayudayo wuba bela-bela, 3 mpe zimpangi zi Yesu zimuteela ti: «Katuka haha na yenda ku kizunga ki Yuda, mwanki milongoki myaku miyena yawu mpe misamu mi wuna hidika.» 4 Kunani muntu kwe sadilanga mu mansweki tala ti tiidi mu zabakana ku bantu bamvimba. Bu wuna hidika misamu mi bobo, kizabikisa bwabu ku bantu. 5 Mpangi zandi mpe zedi mukwikila ko. 6 Yesu ni kabateela ti: «Ntangu ani yafweni ko. Kansi, ku yeno, kadi ntangu yimbote yikwe banga.» 7 Nza yilendi lubela ko, kansi meno yena mbela, mu dyambu ti nina ta kimbangi mu mavanga mandi mambi. 8 Yeno tombokeeno ku mukembo. Meno natomboka ani ko, mu dyambu ti ntangu ani yafweni ko. 9 Yesu bu kamana ta bobo, wusaala ku kizunga ki Ngalili.

10 Kansi zimpangi zandi bu ziyenda ku mukembo wu nzo zi Mileba, Yesu mpe ni kayenda mu mansweki, kansi kakiyenikisa ko. 11 Zimfumu zi Bayudayo zi musosa mu ntangu yi mukembo, ni bafuula ti: «Bwabu kwedi kadi e?» 12 Mu kati di mpumbu yi bantu, banyunguta mu nkumbu andi. Mwa ndambu yi bantu bata ti: «Muntu wumbote wudi.» Bakaka babisa ti: «Kaani, wuna zimbisa bantu.» 13 Kansi nakani muntu wuzonzila nkumbu andi ha meso ma bantu, mu dyambu ti bamvimba bedi yena bunkuta bu zimfumu zi Bayudayo.

14 Mukembo bu wuba kati-kati Yesu wutomboka ku nzo-Nzambi, na wutona mu longa. 15 Bayudayo bayituku na bedi kifuulanga ti: «Bwedi kazabidi Masonama, yandi wulembolo longoka e?»

16 Yesu wubavutudila ti: «Ndongosolo yi nina haana yi fumini ku meno bende ko, kansi ku Nzambi wu mfidisi. 17 Tala ti Muntu tiidi mu sadila luzolo lu Nzambi, waazaba tala ti ndongosolo ani ku Nzambi yikwe fumanga hoti mu lutumu lu meno bende nina zonzilanga. 18 Muntu wuna zonzila mu lutumu lu yandi bende, wuna sosa nkembo yi yandi bende. Kansi muntu wuna sosa nkembo yi yondowo wu mufidisi, kwe tanga kedika, mpe luvunu luu mu yandi. 19 Mose kaluhaana Misiku ko e? Kansi kani muntu wumosi mu yeno kwe sadilanga myo. Mu dyambu di nki luna sosila mu mpondisa e?» 20 Mpumbu yi bantu yimuvutudila ti: «Mpeve yimbi yi naku! Nani wuna sosa mu kuhondisa e?» 21 Yesu wubavutudila ti: «Mu dyambu dimosi kwandi di mpidikidi, lumeni yituku bamvimba. 22 Mose wulutuma mu zengoso baala bubakala. Ntumunu beyoyo yifuma ku yandi ko, kansi ku bankaka zeto zintete, kadi yeno lukwe zengosongo baala bubakala mu kilumbu ki saba. 23 Tala ti lufweti zengoso baala bubakala mu kilumbu ki saba, mwanki luvumina Misiku mi Mose, mu dyambu di nki luna mfwemina bu nanyakisi muntu mu kilumbu ki saba e? 24 Bikeeno mu fundisa bonso bu luna yenina mu meso meno, kansi fundisileeno mu ludedomo.»

25 Mwa ndambu yi bantu ba Yelusalemi bafulasana ti: «Muntu bewuwu ka yandi ko bana sosa mu hondisa e?» 26 Taleno kweno: wuna zonza ha meso ma bantu na bana muteela kani dyambu dimosi ko! Mintwadisi myeto nkatika mi bakudi ti yandi ni Klisto e? 27 Kansi Klisto bu kaakwiza, ku muntu ko waazaba kwedi kaafuma, kadi yunduwu tuzebi kwedi kafumini.

28 Yesu bu kedi longanga mu nzo-Nzambi, wubokana ti: «Meno lunzebi e? Mpe luzebi kwedi mfumini e? Mpeleko nayizidi mu luzolo lu meno bende ko, kansi yondowo wu mfidisi kedika kadi. Yandi, lumuzebi ko. 29 Meno, namuzebi, mu dyambu ti ku yandi mfumini mpe yandi wu mfidisi.»

30 Basosa mu mukanga, kansi kunaani muntu wumusimba, mu dyambu ti kilokola kyandi kiba buna kyafweni ko. 31 Babingi mu kati di mpumbu yi bantu bamukwikila, na bata ti: «Kilumbu kyaakwiza Klisto, nganunu mbo kasa bimangu bingitukulu bihyokidi na byo bilembolo hidika muntu bewuwu e?»

32 Bafalisi bayuwa manyungunyungu mu kati di mpumbu yi bantu mu dyambu di Yesu. Ni hahoho, zimfumu zinganga-Nzambi na Bafalisi batambika minkengi mi nzo-Nzambi mu kwe mukanga. 33 Yesu wuta ti: «Nakidi dyaka neeno mwa ntangu yifyoti, ku manima mbo nenda ku yondowo wu mfidisi. 34 Yeno lwaansosa na yeno lwaanyena ko, mu dyambu ti lulendi kwiza ku nidi ko.» 35 Mfumu zi Bayudayo bakifuula yawu na yawu ti: «Kwedi kaakwenda mwanki yeto tulembolo muyena e? Ku Bayudayo kaakwenda bameni mwangana mu nsi yi Bangeleke mpe mu haana ndongosolo andi ku Bangeleke e? 36 Nkye mbangululu yi misamu mi kateedi ti: "Yeno lwaansosa na yeno lwaanyena ko, mu dyambu ti lulendi tuula ho ha naaba ko e?"»

37 Mu kilumbu ki manunu ki mukembo, kilumbu ki vudidi mfunu, Yesu mantelama, wubokana ti: «Tala ti muntu wuu na mpwila, kiza ku meno na kanwa. 38 Yondowo kwikidi mu meno bonso bu ta masonama, "nzadi zi mamba zi kwe haananga luzingu zaakumba mu yandi."» 39 Yesu wuzonzila bobo mu dyambu di Mpeve yi Nzambi yaatambula yobobo baakwikila mu yandi. Mu ntangu beyoyo buna ka tambikidi Mpeve ko mu dyambu ti buna Yesu ka kemboso ko.

40 Ku manima me yuwa misamu bemyomyo, mwa ndambu yi bantu mu kati di mpumbu bata ti: «Bakala bedidi nkatika ni yandi Mumbikudi!» 41 Bakaka bata ti: «Yandi ni Klisto!» Kansi bakaka bata dyaka ti: «Kadi Klisto ku Ngalili kaafumina e? 42 Masonama mana ta ko ti: Klisto waafuma mu nkuna yi Davidi ku Betelemi, bwala bu Davidi e?» 43 Nkabani yikotila ha mpumbu yi bantu mu dyambu di Yesu. 44 Mwa ndambu yi bantu ha kati dyawu batya bamukanga, kansi ku muntu ko wu musimba.

45 Minkengi mi nzo-Nzambi bu mivutuka ku zimfumu zinganga-Nzambi na Bafalisi, ba bafuula ti: «Nki lulembolo mutwadila e?» 46 Minkengi mi nzo-Nzambi mivutula ti: «Kunani muntu wuzonzila bonso buna zonzila muntu bewowo!» 47 Bafalisi ba bafuula ti: «Yeno mpe luhunukini kweno e? 48 Nganunu wumosi mu zimfumu hoti mu Bafalisi wu mukwikidi e? 49 Mpumbu yi bantu beyiyi yi lembolo zaba Misiku mi Mose, yiloko yidi.»

50 Kansi Nikodemo, wumosi mu Bafalisi wuyenda yenikina Yesu bilumbu bihyoka, wuta ti: 51 «Misiku myeto mina tudika mu fundisa muntu tala ti lumuyudi ntete ko mu zaba nki kasiidi.» 52 Bamuvutudila ti: «Ngeye mpe mwisi-Ngalili wudi e?» Tanga bumbote Masonama mbo wubakula ti kuu mumbikudi kani wumosi ko wufuma ku Ngalili. 53 [Ku manima, kadi muntu wuyenda ku nzo andi.