1 Yesu wuta ku milongoki myandi ti: «Mitima myeno mi vizukandi ko. Seeno kiminu mu Nzambi na seeno mpe kiminu mu meno. 2 Bibuka bibingi bii mu nzo yi Tata ani, nganunu naluteedidi ko ti nina kwenda mu lukubikila kibuka. 3 Bu naakwenda mu lukubikila kibuka, naavutuka, mpe naalubonga mu ba nani ha kimosi, mwanki ho ha nidi, yeno mpe luba hoho. 4 Luzebi ku nina kwenda, mpe nzila ya luzebi.»

5 Toma wumuteela ti: «Mfumu, tuzebi ku wuna kwenda ko. Bwedi twaazabila nzila e?» 6 Yesu wumuvutudila ti: «Meno nii nzila, kedika na luzingu. Kunani muntu lendi kwenda ku Tata tala ti kahyokidi ku meno ko. 7 Tala ti lunzebi, nganunu luzebi mpe Tata ani. Bwabu lumuzebi na lumuyeni.»

8 Filipi wumuteela ti: «Mfumu, tulonka Tata na bufweni mu yeto.» 9 Yesu wumuvutudila ti: «Tuka ntama nii kintwadi neeno, Filipi, wunzebi ko e? Yondowo nyeni, yeni Tata. Bwedi lendi teela ti: "Tulonka Tata e?" 10 Kwikidi ko ti meno nii mu Tata na Tata wuu mu meno e? Misamu mi nakwe luteelanga nkwe mye tanga mu lutumu lu meno bende ko. Ni Tata kwe zinganga mu meno, kwe salanga bisalu byandi. 11 Nkwikileeno bu nina luteela ti: meno nii mu Tata, mpe Tata wuu mu meno. Tala ti kaani, kwikileeno kwandi mu bisalu bebibi. 12 Kedika mu kedika nina luteela, yondowo kwikidi mu meno, waasala bisalu bi nina sala. Mbo kasala dyaka bisalu bihyokidi kitezo, mu dyambu ti ku Tata nina kwenda. 13 Mpe kyonso-kyonso kima ki lwaalomba mu nkumbu ani, kyaanahidika, mwanki Tata ka kemboso mu Mwana. 14 Tala ti lundombidi kima mu nkumbu ani, kyaanahidika.»

15 Tala ti luntiidi, Tumameeno mu Misiku myani. 16 Meno, naalomba ku Tata kaluhaana nsadisi yihiika yaaba neeno mimvu ka mimvu. 17 Mpeve yi kedika, yo nza kabisidi mu tambula, mu dyambu ti ka nayena yo ko na kazebi yo ko. Kansi yeno ya luzebi mu dyambu ti yikwe zinganga ha kati dyeno na yaaba mu yeno ntangu ka ntangu. 18 Naalusiisa bisaana ko, mbo navutuka ku yeno. 19 Ntangu yifyoti kwandi yi siidi, nza yaabwesa nyena ko. Kansi yeno lwaanyena mu dyambu ti nii wumoyo mpe yeno mpe lwaaba bamoyo. 20 Mu kilumbu bekyokyo, lwaabakula ti meno nii mu Tata ani, bonso yeno luu mu meno, mpe meno mu yeno.

21 «Yondowo tambudi Misiku myani na sadidi myo, ni yandowo kwe ntyanga. Tata ani watya yondowo kwe ntyanga, meno mpe naamutya, mpe naazabakana ku yandi.»

22 Yuda, ka Yuda Isikalyoti ko, wumufuula ti: «Mfumu, bwedi waazabikinina ku yeto, kansi ka ku nza ko e?» 23 Yesu wumuvutudila ti: «Tala ti muntu wuntiidi, waasadila mambu mani na Tata ani waamutya. Twaakwiza ku yandi, mpe twaazakala ku yandi. 24 Muntu wulembolo ntya, kalendi keba mambu mani ko. Mambu bemama ma luna yuwa, ka mafumini mu meno ko, kansi ku Tata wumfidisa. 25 Naluteedidi myo bu nakidi neeno kintwadi. 26 Kansi nsadisi, Mpeve Yilongo yaatambika Tata mu nkumbu ani, yaalulongisa mimvimba na yaalubambula moyo mu mimvimba mi naluteedidi.

27 Nina lusisila kiyenge, nina luhaana kiyenge kyani. Meno nina luhaana kyo ka bonso nza yikwe haaninanga kyo ko. Ka luvizukandi mitima myeno ko na kaluyenandi bunkuta ko. 28 Luyuwa bu naluteela ti: "Nina kwenda, kansi mbo navutuka ku yeno." Tala ti luntiidi, luketi ba bayangalala mu zaba ti ku Tata nina kwenda, mu dyambu ti Tata mpyokidi mfunu. 29 Naluzabikisi misamu bemimi tekila mituula, mwanki bu myatuula, lukwikila. 30 Naabwesa zonza dyaka bubwingi neeno ko, mu dyambu ti mfumu yi nza beyiyi yina kwiza. Kaa na lulendo mu meno ko. 31 Kansi nza yifweti zaba ti ntiidi Tata mpe nina sala bonso ntumunu yi kampana. Telameeno na tukatukeeno ehaha.