1 Tekila mukembo wu Pake wutuula, Yesu wuzaba ti ntangu andi yifweni ye sisa nza beyiyi mu kwenda ku Tata. Wutya bantu bandi baba mu nza, wubatya natee ku nsukunu. 2 Yesu na milongoki myandi bu bedi dyanga, nkadyampemba wutula mayindu me yekola Yesu mu mutima wu Yuda Isikalyoti, mwana wu Simoni. 3 Yesu wuzaba ti Tata wutula bimvimba mu moko mandi, ti ku Nzambi kafuma, mpe ti ku Nzambi kaavutuka. 4 Bu bedi dyanga, Yesu wutelama, wukatula kinkutu kyandi kiba ha yulu, wubonga mulele na wukanga wo mu luketo andi. 5 Ku manima, wubulumuna mamba mu ndonga yiyinene, wutona mu sukula malu ma milongoki myandi, na mu kusuna mo mu mulele wukakanga mu luketo. 6 Bu katuula ha Simoni Petelo, yandi wumuteela ti: «Mfumu, ngeye wunsukula meno malu e?» 7 Yesu wumuvutudila ti: «Wuna bakula ko mi nina hidika mu kilokola bekiki, kansi mbo wubakula ku mutwala.» 8 Petelo wumuteela ti: «Kaani, waansukula malu ko.» Yesu wuvutula ti: «Tala ti na kusukudi mo ko, waabwesa ba naani kintwadi ko.» 9 Simoni Petelo wumuteela ti: «Mfumu, buna ka malu kaka ko, kansi na moko na mutu.» 10 Yesu wubwesa ta dyaka ti: «Wonso muntu yobidi, kana nsatu ye bwesa yobila ko, tala ti ni mu sukula kaka malu ko, mu dyambu ti nitu andi yimvimba yi vedila yidi. Yeno bavedila ludi, kansi ka yeno bamvimba ko.» 11 Yesu wuzaba nani waamuyekola. Ni hahoho kateela ti: «Bamvimba ludyeno bavedila ko.»

12 Bu kamana basukula malu, Yesu wulwata dyaka kinkutu kyandi, wuvutuka ha meza na wubateela ti: «Luna bakula misamu mi naluhidikidi e? 13 Luna ntumisina ti "Mulongisi" na "Mfumu", kedika luna ta, mu dyambu ti Mulongisi na Mfumu nidi. 14 Tala ti meno nii Mulongisi na Mfumu nalusukudi bwabu malu, yeno mpe lufweti sukulanga malu yeno na yeno. 15 Kadi kyo ni kifwani ki naluheeni, mwanki lusadila bonso bu sidi ku yeno. 16 Kedika mu kedika naluteedidi, mundongo kahyokidi mfumu andi mfunu ko, mpe ntumwa kahyokidi muntu wumutambikidi mfunu ko. 17 Bu luzebi bwabu misamu bemyomyo, mu kyese lwaaba tala ti mya lwaasadila.

18 Nina zonzila mu yeno bamvimba ko, nzebi yobobo bana sodidi. Kansi masonama mafweti kwenda detila: "Yondowo wuna dya naani dimpa, wumbangumukini." 19 Naluteedidi myo bwabu tekila milutudila, mwanki bu myaalutudila, lukwikila ti "meno, nidi". 20 Kedika mu kedika naluteedidi, yondowo waatambula muntu wo wu nafidisa, meno katambula. Yondowo waantambula, tambudi yondowo wumfidisi.»

21 Yesu bu kamanisa mu zonza, mutima andi wuvizuka na wuta ti: «Kedika mu kedika naluteedidi, wumosi mu yeno waanyekola.» 22 Milongoki mitalasana yawu na yawu na bazaba ko nani kedi zonzila. 23 Wumosi mu milongoki, yondowo Yesu wukedi tyanga, wuba wuzakala ha meza ha ntendo andi. 24 Simoni Petelo wumulabikisa mwanki kafuula Yesu nani kana zonzila. 25 Mulongoki wubembama ha ntulu yi Yesu na wumufuula ti: Mfumu, nani wo e? 26 Yesu wuvutula ti: «Ni yondowo wu naahaana kibuku ki dimpa ki naavwanga mu ndonga.» Mboki, Yesu wuvwanga kyo na wuhaana kyo ku Yuda, mwana wu Simoni, mwisi-Isikalyoti. 27 Yuda bu katumbu bonga kibuku ki dimpa, Satana wukota mu yandi. Yesu wumuteela ti: «Myo mitiidi mu hidika, hidika myo munswalu!» 28 Ka muntu wumosi mu yobobo baba ha meza wubakula nki ka mu zonzila bobo. 29 Yuda bu kaba kikebi ki mbongo, milongoki mihiika myedi banza ti Yesu wumutuma kenda ka sumba bye hyokisila mukembo hoti wumuteela kenda kahaana bima ku bamputu. 30 Yuda bu kabonga kibuku ki dimpa, wutumbu duuka ku mbazi. Mpimpa yiba.

31 Yuda bu kaduuka ku mbazi, Yesu wuta ti: «Bwabu nkembo yi Mwana Muntu yi yenikini, mpe nkembo yi Nzambi yi yenikini mu yandi.» 32 [ Tala ti Nzambi kemboso mu yandi,] Nzambi mpe mbo kamukembisa mu yandi, waamukembisa mu nswalu. 33 Baala bani, mwa ntangu yifyoti kwandi nakidi dyaka neeno. Mbo lunsosa, kansi bonso bu nateedi wo ku Bayudayo, mpe wa nina luteela bwabu yeno mpe: lulendi kwiza ku nina kwenda ko.

34 «Musiku wumoona naluheeni: Zolasaneeno yeno na yeno bonso bu naluzodidi, yeno mpe zolasaneeno yeno na yeno. 35 Tala ti luna luzolo yeno na yeno, bantu mbo bazaba ti milongoki myani ludi.»

36 Simoni Petelo wumuteela ti: «Mfumu, kwedi wuna kwenda e?» Yesu wumuvutudila ti: «Ku nina kwenda, kulendi ndanda ko bwabu. Kansi ntangu zina kwiza, waandanda.» 37 Petelo wumuteela ti: «Mfumu, mu dyambu di nki ndendi kulanda mu kilokola bekiki ko e? Wukubama nidi mu haana luzingu lwani mu dyambu dyaku.» 38 Yesu wumuvutudila ti: «Wukubama wudi mu haana luzingu lwaku mu dyambu dyani e? Kedika mu kedika nakuteedidi: tekila nsusu yikuba, waambisa nkumbu zitatu.»