1 Bilumbu bisambanu tekila mukembo wu Pake wutula, Yesu wuyenda ku bwala bu Betani kwedi zakidilanga Lazalo, yondowo wukafulukisa mu bafwa. 2 Balambila Yesu bindya koko. Malata wedi bakabidila bindya, mpe Lazalo wuba ha kati di yobobo baaba bazakala ha meza na Yesu. 3 Maliya wubonga ndambu litele yi mananasi ma nale* mantalu yiyingi, malembolo vwatana na kima kihiika. Wubulumuna mo ha bitambi bi Yesu, mpe wukusuna bitambi bebyobyo mu milengi myandi. Nzo yimvimba yifuluka mu mfuku yi mananasi. 4 Yuda Isikalyoti, wumosi mu milongoki mi Yesu, yondowo waamuyekola, wuta ti: 5 «Bila nki tulembolo yadikila kwandi mananasi bemama mu nkamatatu zi mbongo zi bisengo, mwanki bahaana zo ku bamputu e?» 6 Wuzonzila bobo ka mu dyambu di kyadi ki bamputu kiba nandi ko, kansi mu dyambu ti mwivi wuba. Yandi wedi kebanga nkutu yi mbongo, ni kedi yibanga mbongo zi bedi tulanga momo. 7 Kansi Yesu wuta ti: «Lumukwamisandi ko! Kasididi bobo mu dyambu di kilumbu kinzikulu ani. 8 Bamputu baaba neeno ntangu zimvimba, kansi meno naaba neeno ntangu zimvimba ko.»

9 Mpumbu yiyinene yi Bayudayo yizaba ti Yesu wu ku Betani. Ni yiyenda koko, ka mu dyambu di Yesu kaka ko, kansi mu yena mpe Lazalo, yondowo Yesu wukafulukisa mu bafwa. 10 Zimfumu zinganga-Nzambi ni zibonga mukanu we hondisa mpe Lazalo, 11 mu dyambu ti Bayudayo babingi bakatuka mu kimvuka kyawu mu dyambu dyandi, mpe bakwikila Yesu.

12 Kilumbu kilanda, mpumbu yiyinene yi bantu yiyiza ku mukembo wu Pake, yiyuwa ti Yesu wuna kwiza ku mbanza Yelusalemi. 13 Bantu bamvimba babonga mandala mu moko na bayenda mubwana. Bedi kwe tengi mu ngolo ti:

«Ozana!

Bika Nzambi kasakumuna muntu wuna kwiza mu nkumbu yi Mfumu!

Bika Nzambi kasakumuna Ntinu yi Isaeli!»

14 Yesu wuyena mwana wu mbuluku, ni kazakala ha yulu andi, bonso budi busonama ti:

15 «Kuyenandi bunkuta ko, ndumba yi Syoni,

Tala, Ntinu aku wuna kwiza,

Wuu wuzakala ha yulu mwana wu mbuluku yi nkento*.»

16 Milongoki myandi mi tumbu bakula misamu bemyomyo ko. Kansi Yesu bu kazangulu mu nkembo, ni babambuka moyo ti mii misonama mu dyambu dyandi, mpe misamu mimvimba mihilama bonso bu bazonzila myo mu yandi.

17 Bamvimba baba na Yesu mu ntangu yi katumisa Lazalo ku mbazi yi ndyamu, mu mufulukisa mu bafwa, bamuteela kimbangi. 18 Ni hahoho, mpumbu yi bantu yiyizila mu bwana Yesu: yiyuwa ti kimangu kingitukulu kasiidi. 19 Bafalisi ni bateelasana yawu na yawu ti: «Taleno! Lwaalenda ko. bamvimba yandi bana kwe landi.»

20 Kuba na mwa ndambu yi Bangeleke mu bantu ba tomboka ku Yelusalemi, mu kwe sambila Nzambi mu ntangu yi mukembo. 21 Bayenda tala Filipi, mwisi-Betesayida mu kizunga ki Ngalili, bamuteela ti: «Mfumu, tutiidi mu yena Yesu.» 22 Filipi wuyenda teela wo ku Andele, mboki ya babole bayenda ta wo ku Yesu. 23 Yesu wubavutudila ti: «Ntangu yifweni yiba kembisa Mwana Muntu.» 24 Kedika mu kedika naluteedidi, tala ti nswanga yi bele yibwidi ha butoto ko na yifwidi ko, yaaba yawu hika. Kansi, tala ti yifwidi, yabuta mbutu zizingi. 25 Yondowo tiidi luzingu lwandi, lwaakahombisa. Kansi yondowo waabela luzingu lwandi lu ha nza beyiyi, lwaakalunda mu dyambu di moyo wu mimvu ka mimvu. 26 Tala ti muntu tiidi mu nsadila, kandanda. Mpe hohoho ha naaba, hahoho mpe kisadi kyani kaaba. Tala ti muntu tiidi mu nsadila, ni Tata ani waamukembisa.

27 «Bwabu mutima ani wuvizukidi. Bwedi nata e? Tata, nkuula kwani mu kilokola bekiki e? Kansi mu dyambu di kilokola bekiki nayizidi. 28 Tata, kembisa nkumbu aku!»

Buna ndinga yiyuwakana ku yulu ti: «Yakembisi, mpe yanakembisa dyaka.» 29 Mpumbu yi bantu yiba hoho na yiyuwa ndinga beyoyo yita ti: «Kidumu kibedi.» Bahiika bata ti: «Mbazi yimuzonzidi.» 30 Yesu wuvutula ti: «Ka mu dyambu dyani ko ndinga beyiyi yiyuwakani, kansi mu dyambu dyeno. 31 Bwabu ntangu ye fundisa nza beyiyi yifweni. Bwabu ntangu ye kuma ku mbazi mfumu yikwe yalanga nza beyiyi yifweni. 32 Meno mpe, mu ntangu yi baanzangula ha butoto, naabenda bantu bamvimba ku meno.» 33 Mu nzonzolo beyoyo, Yesu wulonka mu nkye mfwilu kaafwila. 34 Mpumbu yi bantu yi muvutudila ti: «Tulongoka mu Misiku ti Klisto waazinga mimvu ka mimvu. Kansi, bwedi lenda teela ti Mwana Muntu fweti zangulu e? Mwana Muntu bewowo ninani e?» 35 Yesu wubavutudila ti: « Lwakidi na kya mu mwa ntangu yifyoti. Dyateeno bu lwakidi na kya, mwanki tombe kilembolo lubatikisa. Mu dyambu ti muntu wuna dyata ku nsye tombe kalendi zaba ko kwedi kana kwendisa. 36 Bu lwakidi na kya , kwikileeno mu kya, mwanki luba baala ba kya.»

Yesu bu kamana zonza bobo, wuyenda na wuswama kitatu nawu.

37 Mpeleko wuhidika bimangu bibingi ha ntadisi awu, kansi bamukwikila ko, 38 mwanki mizonza mumbikudi Yesaya myenda detila, bu kata ti:

« Mfumu, nani kwikidi

mu ndongolo eto e?

Mpe kunaani Mfumu

kalonkidi lulendo lwandi e?»

39 Mu dyambu ti bantu bakwikila ko, buna Yesaya wuta dyaka ebu:

40 «Nzambi wubakitula zimpofo,

na wusa ti mitima myawu miba bonso matadi,

mwanki balembolo yena mu meso mawu,

na balembolo bakula mu mitima myawu,

mpe bana vilula madyela mawu ko, mwanki nabanyakisa.»

41 Yesaya wuta bobo, mu dyambu ti wuyena nkembo yi Yesu na wedi muzonzila.

42 Babingi mpe ha kati di zimfumu zi Bayudayo bakwikila Yesu. Kansi mu dyambu di Bafalisi, bakiyenikisa ko, mwanki balembolo bakuma mu nzo yi lusambulu yi Bayudayo. 43 Yawu bedi tyanga bubwingi masiika ma bantu, kansi ka ma Nzambi ko.

44 Yesu wuzonza mu ngolo ti: «Yondowo wuna kwikila mu meno, ka mu meno kaka ko kana kwikila, kansi mu yondowo wumfidisi. 45 Yondowo wuna nyena meno, yeni yondowo wumfidisi. 46 Meno nayizidi mu nza bonso kya, mwanki wonso muntu wuna nkwikila, kalendi ba ku nsye tombe ko. 47 Tala ti muntu yudi mambu mani na kasadidi mo ko, kameno ko na mu fundisa, mu dyambu ti nayizidi mu fundisa nza ko, kansi mu vuukisa yo. 48 Yondowo walembolo ntambula na walembolo kwikila mu mambu mani, beki mumfundisi andi: ni mambu ma nalongidi ma mufundisa mu kilumbu kinsukunu. 49 Ka mu lutumu lu me bende ko nazonzidi, kansi Tata wumfidisi, wumpeeni yandi bende mambu ma mfweti ta na ma mfweti longa. 50 Mpe nzebi ti ntumunu andi yikwe haananga luzingu lu mimvu ka mimvu. Ni hahoho, mi nina samuna, nina samuna myo bonso bunteedidi myo Tata.»