Yesu Mwana dimeme di Nzambi
29 Kilumbu kilanda, Yoane wuyena Yesu wedi kwiza ku yandi, ni kata ti: «Taleno Mwana dimeme di Nzambi dikwe katulanga masumu ma nza. 30 Yandi nedi zonzila bu nedi ta ti: "Muntu wuna kwiza ku manima mani, wumvudidi mfunu, mu dyambu ti teekila naba, yandi buna wudi." 31 Meno nedi muzaba ko, kansi nayizidi mu botika mu mamba mwanki namuzabikisa ku kanda di Isaeli.»
32 Yoane wuta dyaka kimbangi eki: «Nayeni Mpeve yi Nzambi yina kulumuka tuuka ku yulu mu kifwani ki bembe na dizi tentama ha yulu andi. 33 Meno nedi muzaba ko, kansi Nzambi wumfidisa mu botika mu mamba, wunteela ti: "Yondowo wu waayena Mpeve yina kulumuka, mpe yina tentama ha yulu andi, yandi kwe botikanga mu Mpeve Yilongo." 34 Meno nayeni mu meso mani, mpe nina ta kimbangi ti, ni yandi Mwana Nzambi.»
Milongoki mintete mi Yesu
35 Kilumbu kilanda, Yoane wuba dyaka ha kibuka bekyokyo na myole mu milongoki myandi. 36 Bu kayena Yesu wedi hyoka, ni kata ti: «Taleno Mwana Dimeme di Nzambi!»