Marcos 11

Nkotolo yi Yesu ku Yelusalemi

1 Bu baba bela-bela na mbanza Yelusalemi ku ntendo yi mabwala ma Betefange na Betani, bela-bela na mulandu wu Olive, Yesu wutambika myole mu milongoki myandi. 2 Mpe wubateela ti: «Yendeeno ha bwala buu ku mutwala eno. Bu lwaatumbu kota ha bwala, lwaayena mwana mbuluku wuu wukangama, waka wameki muntu. Nyanguneeno wo, mpe twaleeno wo. 3 Tala ti muntu wulufuudidi: "Bila nki luna nyangunina wo e?" Muteeleeno ti: "Mfumu nsatu kaa na wo, mpe mbo kabwesa vutula wo kwandi mu muswalu ehaha."»

4 Milongoki miyenda na mibwana mwana mbuluku wuba wukangama ha mbazi ha ntendo mwelo, mu nzila. Ni banyanguna wo. 5 Mwa ndambu yi yobobo baba hoho babafuula ti: «Nki luna sa e? Bila nki luna nyangunina mwana mbuluku bewuwu e?» 6 Babavutudila bonso Yesu bu kabateela mu ta, mpe bababika benda.

7 Milongoki minata mwana mbuluku ku Yesu. Batentika binkutu ha yulu mwana mbuluku, mboki Yesu wuzakala ha yulu andi. 8 Bantu babingi bedi kwe yadi binkutu byawu mu nzila mpe bahiika mwa bintala bi miti bi bazenga mu zimfuba. 9 Yobobo bedi kwe tekidi ku mutwala na bedi kwe landi Yesu ku manima, bedi kwe tengi mu ngolo ti:

«Ozana!

Bika Nzambi kasakumuna muntu wuna kwiza mu nkumbu yi Mfumu!

10 Bika Nzambi kasakumuna kimfumu kina kwiza, kimfumu ki Davidi, tata eto! Ozana! Nkembo ku Nzambi mu mazulu mahyokidi kuzangama!» 11 Yesu wukota mu mbanza yi Yelusalemi na wuyenda ku nzo-Nzambi. Bu kamanisa mu tala ndambu ka ndambu, wuyenda ku bwala bu Betani na milongoki kumi na myole, buna ntangu yeka kukula.