Paulus sien tweeda Breef aun de Korinta 6

4 oba en aules stal wie ons väa aus Gott siene Deena: en väl Jedult, en Triebsaul, en Nooten, en Enjsten, 5 en Schläaj, en Jefenkjnissen, en Opprua, en Oabeiten, en Woaken, en Fausten, 6 en Reinheit, en Erkjantnis, en Lankmoot, en Leeftolichkjeit, em Heiljen Jeist, en onjeheichelde Leew, 7 em Wuat von de Woarheit, en de Krauft von Gott, derch de Jewäaren von de Jerajchtichkjeit to de Rajchte un to de Linkje; 8 derch Iea un Oniea, derch schlajchte Noräd un goode Noräd; aus Vefiera, oba doch Woarhauftje; 9 aus Onbekaunde, oba doch Bekaunde; aus Stoawende, un kjikj, wie läwen; aus Jestrofte, un doch nich dootjemoakt; 10 aus de Truaje, oba emma froo; aus Oame, oba dee väle rikj moaken; aus dee nuscht haben, oba doch aules besetten.