16 Akwɛyi mii nda Adami Ukpo kwoya, akwɛyi ee shi yi U mbwama uwufo uwu bɔkɔ ee yi mbala yi iyɔkpɔɔ. 17 U mbwama ele gba akwu Kwundu u zɔ enzu ongbulolo le. Enzu umba kwudu kwɔlɛ o na wu mo, kwuwongu umba o zɔngɔma wu ma mo ba o yitu wu mo. Lunyi ba lu yi wu kwuwongu e yi mbala yi ba e yi mɛmi yi. 18 Imi mi ŋi lu yi afyima mate ɛmɛ umbese tayi mo; mii gbama mi nyɔ munyi yi. 19 Kwuye bwɛɛ te, enzu umba kwudu kwɔlɛ oo ma mi fo, lunyi ba lu ma mi, kwuwongu Imi mi ye la reyi awu, lunyi tete luu ye la reyi. 20 Gba kwɔfyi kwɔngu kwu bo, lu zɔngɔma te Imi mi yi mu Ada, lunyi lu yi ma mi, Imi ba mi yi ma yi. 21 Onzu uwu bɔkɔ a na iso mi ba a mbwalu yi, onzu awu gba a gyi mi le. Onzu uwu bɔkɔ a gyi mi, Ada mi a gyi wu; Imi tete mi gyi wu akwɛyi mii shi te e yi mi.>>

22 Akwɛyi Ozhudasi (akwu Ozhudasi Isikariyɔ awu mo) e yo Ɔzhizɔsi tee, <<Ɔkwu, ŋɔ yi egbo iyi ŋɔ zɔ ɛŋɔ ma la nzu, kimbe ki shi ba ŋɔ zɔ ɛŋɔ ma la enzu umba kwudu kwɔlɛ mo?>>

23 Ɔzhizɔsi a gba wu opwu tee, <<Gba onzu a gyi mi, onzu awu a mbwalu ɛzɔ mi. Ada mi a gyi wu, kinzu ki nyɔ munyi wu akwɛyi kii ŋɔ mbala wu. 24 Onzu uwu ba a gyi mi mo, a mbwalu ɛzɔ mi mo. Iso iyi mi so yi ele akwu iyami mo, i ngyi mba Ada mi uwu bɔkɔ a lɔ mi awu.

25 Imi mi so yi ɛlɛ lɛɛbi kwuwongu mi degbo mbala yi bɛnɛ ke. 26 Ada ba a lɔ U mbwama, Kwundu Ɔkɛrikɛri, mu ɛnyi mi aa ka yi, ka la zɔ yi apula lɛɛbi iyi i fa te la lu yitu yi, akwɛyi e lolo yi apula lɛɛbi iyi bɔkɔ mi zɔ yi.