Toree Yawudawa Su yi Showura de Su Kisa Yesu
Mat 26.1-5; Mk 14.1,2; Jn 11.45-53
1 De kwanki buki mbo si ni darigaza de sua sukwa yi buki yenteri, e yi kusa, 2 Se toree ni pirisi nja male ni doka Musa sua bila turiki de su ka Yesu, sede sua yi womba ni ntani.
Yawuda Yeda De butu Yesu A beyi
Mat 26.14-16; Mk 14.10,11
3 Se obiri yuru Yawuda, de sua sukwa yi nkye Isikariyoti, daa a siki gom sha bi. 4 Se Yawuda te anya tolense pirisi nja totore ni nsu kone laki Mirikisi su yi showura yiri de yaa butu Yesu a beyi su. 5 Se Su yi peri siki, nja su yeda de su beyi gyolo. 6 Se Yawuda yeda, e kwa bila turiki butu Yesu a beyi ba su anya de yowa ntani ma ba.
Yesu Si mbosi ni Nyeteri nja yayagizi e yi
Mat 26.17-25; Mk 14.12-21; Jn 13.21-30
7 De e keyi nana de sua buki ni buredi nsu yisti ba, ka yi de timshiya ni yenteri sua la beyi sedeka. 8 Yesu saka Biturusu nja Yaaya nkye, <<Te de ku yi shiri ni mbosi yenteri.>> 9 Angana na ka bila de mu shiriya yi?>> su minya. 10 Na keleba nkye, <<Nde ku yuru a geri, kwa gomu nseminji daa keyi tuni riki. Ku biya yi te gizi de yaa yuru a shi, 11 De ku gye nsu gizi, male minya: <Angana ma laki de Eni nja yayagizi na mua si mbosi ni nyenteri?> 12 Yaa nana ku laki bisi totolo, guru gyala. ku yi shiriya mbosi anya ni.>>
13 De su te su geni Mbo guru ma Yiride Yesu Pala gye su. Se su shiriya mbosi ni yenteri.
Jibi ni Obagizi
Mat 26.26-30; Mk 14.22-26; 1 Kor 11.23-25
14 De kwanki ka yi, Yesu nja yaya manki yi zunwa akigbolo. 15 Se Yesu gye su, << E ni ma memeri de ni si mbosi ni yenteri nja ku kapi de E ni sha Genbeki. 16 Eni ma gye ku, Eni ma kara si mbosi meteri nja ku jaja ba se su sika maana yi a solota ni Mirikisi.>>
17 A beyi de la koshiya riki ntasi inebi, e gbede Mirikisi nja e pala, <<Ku la de ku laba ba nkiya ku. 18 Du E ni ma gye ku E ni ma kara sha gagaba dege yaya ni ntasi mu ba se solota ni Mirikisi pelesa.>>
19 Se la buredi, e gbede Mirikisi e sua, se ba su, e pala nkye, <<Nsu mu ma nki na de ni ba ku, ku yi yomu de ku turunwa ni.>>
20 Ari yomu, a beyi si mbosi na la koshiya, nkye, <<koshiya mu ma ni sabuwa ni anikowori ni zini na, de yaa nya a woze sobon nku. 21 Sede nani nsu de yaa butu ni a beyi yaa si mbosi nja ni. 22 Yaa nsebeki yaa te yiride su rubuta pala e kiya yi, sede gbotuma ni su de butu yi a beyi. >> 23 Su para minya nkya su waa na yaa yi mbo mumungu mu yomu.
Musu A kiya Waa ma Tolense
24 Se musu dege saka ni yayagizi Yesu a kiya waa na ma tolense. 25 Yesu gye su, <<Seleki ni worede su shina Mirikisi ba sua nana yiko a kiya ntani su, worede sua nana yiko a kiya su sukwa kiya su nsu toree. 26 Sede oku kede ma a sisika ku yomu ba! sede, tolense a siki ku e shi ma kankye yaa dende, nsude ma kamkiya ku sede e shi ma kankye bunwa ku. 27 Du nsude ma tolense, nsude yaa zunwa kingbolo de si mbosi ko nsude ma yaa beyi mbosi la? nsude zunwa a kingbolo bo? sede Eni ma a sisika ku ma bawuta ku kankye daa nsude ma bunwa. 28 Oku na ku ma worede su sakisi nja ni a siki Genbeki na. 29 Yiride Adaa na ba ni yiko ni solota, yomu eni man ni ba ku. 30 sobon de ku si nja ku sha a kingbolo ni solota na nja zunwa a kingbolo ni solota, na ku yi shiriya ni zuriya gom sha bi ni Izireyila.
Biturusu Yi Musu Yesu
Mat 26.31-35; Mk 14.27-31; Jn 13.36-38
31 <<Yesu nkye, Sima, Sima, obiri yaa bila dama de gwada ku kankye nsu bikiya yaa laba alikama. 32 Sede E ni yi ku lepa, de beigaskye ku yaa puari ba. Nde ki sakisi ka ba yayuwa ke sori guyam.>>
33 Sede Biturusu keleba, << Obagizi ni ma ashiri de ni te nja ke a jaru nja ko ni muntu. >>
34 Yesu nkye Na gye ke, Biturusu, kapi zakala yi kara yawumu, ka yi musu shina ni sen wuku.
Ku gyala Nkiku Sobon Kwanki Wuya
35 Yesu minya yayagizi e yi, de Ni saka ku ba gyolo. Angala, ko takalami ku lesa mbodaa?
Su keleba nkye mbodaa ba.
36 Yesu gye ku, <<Sede kuzukam nde ki te ma gyolo, la e yi,nja Angala; nja nde ki ma obalaba ba, la riga se de ki see daa. 37 Du su rubuta takada ni Mirikisi nkye, su se ni a siki nsu lepi ><Eni ma gye ku guru mbode su rubuta e kiya na yaa sika.
38 yayagizi su pala, Obagizi, kone! mu ma obalaba bi. >>
<< Yesu keleba su, beta mu adenta yomu.
Yesu Yi lepa A kiya Ogbo Ni Zetu
Mat 26.36-46; Mk 14.32-42
39 Yesu bila anya ni na e te ogbo dunsi ni zetu, yiride e saba yi nja yayagizi yi biya yi te nja shi anya ni. 40 De a zo anya ni, Yesu gye su, <<ku yi lepa de Mirikisi a sua ku nto de kede ku puari a siki gwada. >> 41 Yesu butu anya su te a geba piri na dure a kisi na yi lepa, 42 <<Adaa, nde ki yeda, de ni sha koshiya mu, nupi na ba, sede na ke la e paru.>> 43 Meleku Mirikisi dege bisi zo anya yi de ja yi sori. 44 De Yesu ma siki Genbeki, e yi lepa soseyi, se awuriji yi nya kisi ma kankye zini.
45 De Yesu dege anya yi lepa kuma beyi ta anya yayagizi yi, e san su sua yi kwana, dun sua yi bekisiki. 46 Yesu minya su nkye, <<Mina saa kwa yi kwana?>> <<ku dege a bisi de ku yi lepa kede ku puari a siki gwada.>>
Su Kaa Yesu
Mat 26.47-56; Mk 14.43-50; Jn 18.3-11
47 De Yesu ma a siki beta ntani zo anya yi, se nseminji de sua sukwa yi Yawuda, daa a siki yayagizi e yi gom sha bi, biya ni su. E zo anya Yesu zo runguma yi, 48 sede Yesu minya Yawuda nkye, <<Yawuda, ni runguma na ka butu yaa nsebeki a beyi?>>
49 De yayagizi Yesu geni mbode yaa paru, su nkye, Obagizi, mu sala ni obalaba?>> 50 Se daa a siki yayagizi Yesu za kusa yanka daa a siki bunwa tolense ni pirisi. E yanka yi kuni dama. 51 Sede Yesu gye su, <<Ku bila kede ku yi yomu ba!>> Yesu kpa kuni yaa minzi ni e worikye yi 52 Yesu gye tolense ni pirisi, salaki nsu kone laki Mirikisi, nja toree geri worede su zo anya yi, <<Yesu gye su nkye, Ni ma nsu ki zi na, de ku kwa yi ntani zo anya ni obalaba nja gwala? 53 Kowon nana ni ma nja ku a siki laki Mirikisi. Ku ka ni ba. Sede da mu ma kwanki ku la, de sori dopuwa sua yi solota.>>
Biturusu yi Musu Shina Yesu
Mat 26.57,58,69-75; Mk 14.53,54,66-72; Jn 18.12-18,25-27
54 Na su ka Yesu, su te nshi a gizi ni tolense pirisi. Biturusu ta biya su nyisa. 55 Na su wula wuta a sisika papada gizi shiriya na e zunwa gabada, Biturusu zunwa nja su. 56 bunwa mase geni yi zunwa anya ni ni asikye wuta. Bunwa mase kone. Na pala nkye,<<nseminji mu ma nja Yesu du. >>
57 Biturusu e musu nkye. <<Mase, eni ma ni shina yi ba, e shi pala.
58 E beyi piri yomu nseminji daa geni yi, <<nkye eke ma ki ma daa nja shi du!>>
<< Biturusu keleba nkye, nseminji, Eni shina yi ba 59 A beyi keripi daa nseda kwa zo pala nkye, <<Nseminji mu ma nja Yesu la, sobon ema nsu galiliya la.>>
60 Biturusu keleba, << nseminji, Eni shina mbode ka pala ba!>>dandani de a tuku ma a kiya beta, zakala yi kara. 61 Na Obagizi juyi na kone Biturusu ndani tiriri, anya ni Biturusu turunwa ni beta de Obagizi e pala: << kapi zakala yi kara ka yi musu shina ni nsum wuku.>> 62 Biturusu butu te a woze na e yi kuka ni bekisiki soseyi
Su yi Yesu Siya Nja Dukwa
Mat 26.67,68; Mk 14.65
63 worede sua kpanku Yesu su yi siya nja dukwa yi. 64 Su ripe yi ndani nja su minya yi nkye, <<Yi aneshi waa dukwa ke!>> 65 Nja su kwa gye basi ni worosu mumungu.
Su Ka yi Yesu Zo A geba ni Toree
Mat 26.59-66; Mk 14.55-64; Jn 18.19-24
66 De anya ku yi nsasape salaki geri, guru nsu tolense pirisi nja male ni doka Musa, su gomu, nja na su keyi Yesu zo a geba su 67 <<Gye mu,>> su nkye nde eke na ki ma kiristi,>>
Yesu keleba, << Nde Eni gye ku, kwa taba beigaskye ni ba, 68 Nde Eni minya ku, kwa yi yaa keleba ni ba. 69 Sede dege kuzukam zo a geba kwa geni yaa nsebeki yaa zuzunwa anya dereja Mirikisi nsude pi sori.>>
70 Se guru asu su minya, <<Eke na ki ma yaa ni Mirikisi?>>
E keleba, <<ku pala nkye Eni ma.>> 71 Anya ni su gye kiya su, woni sheeda mu bila jaja? mu rigye zi dege bakiyi. >>