1 ጎዳይ፥ «ታ ሄንሶሆን ዲዛ ታ ዶርሳታ ይሲዛይታሲኔ ላሊዛ ሄንንቻታስ ኣዬ ኣና!» ጌስ። 2 ጎዳ ኢስራኤሌ ጾሳይ ባ ኣሳ ሄሚዛ ሄንንቻታስ፥ «ኢንቴ ታ ዶርሳታ ላሊዲ ዎራ ዬዲዳ ጊሻሲኔ ኢንቴ ኢስታ ሎኤ ጼሎንታ ኣጊዳ ጊሻስ ኢንቴ ኢታቴስ ቤሲዛ ቂጻቴ ታ ኢማና። 3 ሄሳፌ ጉዬ ታ ዉዴፔ ኣቲዳይታ ካሴ ታ ጎዳ ዬዲዳ ዴሬ ኡባፌ ታኒ ታርካ ሺሻዳ ካሴ ታ ሄሚዛሶሆ ዛራ ኤሃና፤ ኢስቲካ ሄሳን ዬሌቲዲ ጮራታና። 4 ታኒ ሎኤ ሄሚዛ ሄንንቻታ ኢስታስ ዴንና፤ ኢስቲ ናምኣን ባቤቴናኔ ዳጋሜቴና፤ ኢስታፌ ኢሳዴይካ ዬና» ጌስ።

5 ጎዳይ፥ «ታኒ ዳዊቴስ ጺሎ ዛሬ

ዴንና ዎዴይ ያና፤

ኢዚ ቱሙ ፒርዳኔ

ጺሎቴ ኦዛዴ፥

ኣ ኤራቴን ሃሪዛ ካዎ ጊዳና።

6 ኢዛ ካዎቴ ላይን

ዩሁዳይ ኣታና፤

ኢስራኤሌይካ ሳሮን ዳና፤

ኢዛ ሱን፥

‹ጎዳይ ኑስ ጺሎቴ› ጌቴታና።✝

7 ሄሳ ጊሻስ ኣሳይ

ሃይሳፌ ጉዬ ኢዛ፥

‹ኢስራኤሌ ኣሳ ጊብጼ ቢታፌ

ኬሲዲ ኤሂዳ ጎዳይ ቤኢን›

ጊ ጫቆንታ ዎዴይ ያና ጌስ ጎዳይ።

8 ጊዶ ኣቲን፥ ‹ኢስራኤሌ ዛሬታ

ፑዴሃ ባጋ ቢታፌኔ

ኢዚ ኢስታ ላሊዳ ሃራ ዴሬታፔ

ኬሲዳ ዴኦ ጎዳይ ቤኢን›

ጊ ጫቃና ዎዴይ ያና፤

ሄሳፌ ጉዬ ኢስቲ

ባንታ ዴሬን ዳና» ጌስ።

9 ናቤታ ጊሻስ ታ ዎዚናይ ሜቂዴስ፤

ታ ሜቄቲ ኡባይካ ኮኮሪዳ።

ጎዳ ጋሶኒኔ

ኢዛ ጌሻ ቃላ ጋሶን

ዎይኔ ኡሹ ኡዪዲ

ማቲዛ ኣሳ ማላ ጊዳዲስ።

10 ቢታያ ላይማን ጻላ ኩማዱስ፤

ቃንጌቲዳ ጊሻስ ዬካዉስ፤

ባዞን ዲዛ ሜሄ ሄንሶሆቲ ሜሊዳ፤

ናቤቲካ ጌላ ኦጌ ካሊዳ፤

ባስ ኢሜቲዳ ማታ

ዎጋይ ባይንዳ ጎኤቲዳ።

11 ጎዳይ፥ «ናቤቲ፥ ቄሴቲ

ጺሎቴ ኦጌራ ቤቴና፤

ታ ኬ ጋርሳንካ ኢስቲ

ኦዛ ኢታቴ ታ ቤኣዲስ።

12 ሄሳ ጊሻስ ኢስታ ኦጌይ ሃሊጻና፤

ኢስቲካ ማን ኩንዳና፤

ኢስቲ ጋንዲጋርዲ ኩንዳና፤

ኢስቲ ቃጻዬቲዛ ዎዴ

ታ ኢስታ ቦላ ፓላ ሚሽ ኤሃና።

13 ታኒ ሳማሪያን ዲዛ ናቤታ ቦላ

ኡፋይሶንታ ሚሽ ቤኣዲስ፤

ኢስቲ ባኣሌ ሱንን

ቲንቢቴ ዮቲዳ፤

ታ ዴራ ኢስራኤሌካ ባሌዳ።

14 ዬሩሳላሜን ዲዛ ናቤታ ቦላ

ዴጺዛ ኢታ ሚሽ ቤኣዲስ፤

ኢስቲ ላይማቴቴስ፤

ዎርዶቴን ዴኤቴስ፤

ኦኒካ ባ ኢታ ኦሶፔ

ሲሞንታ ማላ

ኢታታ ሚንቴስ፤

ታ ማታን ኢስቲ ኡባይካ

ሶዶሜ ማላ፥

ኢዚን ዲዛ ኣሳይካ

ጋሞራ ማላ» ጌስ።✝

15 ሄሳ ጊሻስ ኡባፌ ዎልቃማ ጎዳይ

ሃይታ ናቤታ ጊሻስ፥

«ዬሩሳላሜን ዲዛ ናቤታፔ

ቱና ሚሺ ኬዚዲ

ቢታ ኡባን ላሌቲዳ ጊሻስ

ታ ኢስታ ጫሞ ካ ሚዛና፤

ቃሴ ማርዜቲዳ

ሃ ኡሻና» ጌስ።

16 ኡባፌ ዎልቃማ ጎዳይ፥

«ሃይቲ ናቤቲ ቲንቢቴ

ኢንቴስ ዮቲዛይሳ ሲዮፒቴ፤

ኢስቲ ኢንቴና

ዎርዶ ሂዶታን ኩንቴስ፤

ኢስቲ ጎዳፔ ጊዶንታ

ባፔ ሜ ኤኪ ዮቴቴስ።

17 ታና ካዛይታ ኢስታስ፥

‹ጎዳይ ኢንቴስ

ሳሮ ጊዳና ጊዴስ› ጌቴስ፤

ባንታ ዎዚና ሙሜቴ

ካሊዛይታ ኡባ

ኢስታስ፥ ‹ኢታ ሚሺ

ኢንቴና ጋኬና› ጌቴስ።

18 ኢዛ ቃላ ሲያናሲኔ ኣዛዜታናስ

ጎዳይ ዴኢዛ ሺቆን ኢስታፌ

ኦኔ ኤቃናይ?

ኢዛ ቃላ ኤዝጊ ሲዪዳይ ኦኔ?

19 ጎዳ ሃንቆይ ጎቴ ጫርኮ ማላ ዴንዳና፤

ሚኖ ዳምባላይ

ኢታ ኣሳታ ሁኤ ሾጫና።

20 ኢዛ ዎዚና ቆፋ

ሙሌራ ፖሎንታ ዲሼ

ኢዛ ሃንቆይ ጮ ሃዳ ሲሜና፤

ጉዬፔ ዪዛ ላይታን ሃይሳ

ቆንጬን ኢንቴ ኤራና።

21 ሃይታ ሃ ናቤታ ታ ኪታቤኬ፤

ጊዶ ኣቲን ኢስቲ ባንታ ኪታ

ኤኪ ዎጼቴስ፤

ታ ኢስታስ ዮቶንታ

ቲንቢቴ ዮቴቴስ።

22 ኢስቲ ታ ዞሬን ኤቂዳኮ

ታ ቃላ ታ ዴራ ሲሳና፤

ኢታ ኦጌፔኔ ኢታ ኦሶፔ

ኢስታ ዛራና።

23 ታኒ ማታስ ጻላ ጾሴ?

ሃሆስካ ጾስ ጊዲኪና?

24 ታኒ ቤኦንታ ማላ ጌማሶን

ቆቴቲ ኣታና ኣሲ ዲዜ?

ሳሎኔ ሳኣ ኩሚዳይ

ታና ጊዲኪና!» ጌስ ጎዳይ።

25 ጎዳይ፥ «ታኒ ኣጉሜታዲስ፤ ታኒ ኣጉሜታዲስ» ጊሼ ታ ሱንን ዎርዶ ቲንቢቴ ሃሳይዛ ናቤታ ቃላ ሲያዲስ። 26 ሃ ዮኦይ ባንታ ዎዚና ባሌን ዎርዶ ቲንቢቴ ሃሳይዛ ናቤታ ዎዚናን ኣይዴ ጋካናስ ጋምኣኔ? 27 ኢስታ ኣዋቲ ባኣሌ ጌቴቲዛ ኤቃዛ ጋሶን ታ ሱን ዶጊዳ ማላ፥ ኢስቲ ኢሶይ ኢሳስ ዮቲዛ ኣጉሞን ታ ኣሳይ ታ ሱን ዶጋና ማላ ኦዳ ኢስታስ ሚሳቴስ። 28 ኣጉሜቲዛ ናቤይ ባ ኣጉማ ዮቶ፤ ታ ቃላይ ኢዛን ዲዛዴይ ጊዲኮ ሄ ቃላ ኣማኔቴን ዮቶ፤ ሃፓሲኔ ካ ኣይፌስ ኣይ ጋይቶቴ ዲዜ? 29 «ታ ቃላይ ታማ ማላኔ ሹች ቄሪዛ ናሪቃ ማላ ጊዴኔ?» ጌስ።

30 ጎዳይ፥ «ሄሳ ጊሻስ ቃላ ኢሶይ ኢሳፌ ካይሲ ካይሲ ኤኪዲ ታፔ ኤኪዳ ማላ ዮቲዛ ናቤታራ ታ ኤቄታይስ። 31 ባንታ ዶና ጪንጫቴን፥ ‹ጎዳይ ሂዝጌስ› ጊዛ ናቤታራ ታ ኤቄታይስ» ጌስ። 32 ጎዳይ፥ «ታኒ ዎርዶ ኣጉሞ ካሊዲ ቲንቢቴ ዮቲዛ ናቤታራ ኤቄታይስ፤ ታ ኪቶንታ ዲሺን ዎይኮ ታ ሹሞንታ ዲሺን ጻላቴን ዎርዶ ዮኦ ዮቴቴስ፤ ታ ዴሬዛካ ባሌቴስ፤ ሃይሳ ሃ ዴሬዛ ኣይኮካ ጎኤቴና» ጌስ።

33 ጎዳይ ታስ፥ «ሃ ዴሬይ፥ ዎይኮ ናቤይ፥ ዎይኮ ቄሴይ፥ ‹ጎዳስ ቶሆ ጊዲዳይ ኣዜ?› ጊዲ ኦይቺኮ፥ ‹ጎዳስ ቶሆይ ኢንቴና፤ ሄሳ ጊሻስ ታኒ ኢንቴና ዎራ ኦላና› ጌስ ጋ ዮታ። 34 ናቤይ፥ ዎይኮ ቄሴይ፥ ዎይኮ ኣይ ኣሲካ፥ ‹ሃይሲ ጎዳ ቶሆ› ጊዲ ሃሳይኮ ታኒ ሄሳዴኔ ኢዛ ሶሆ ኣሳ ቃጻያና። 35 ኢሶይ ኢሶይ ባ ላጌ ዎይኮ ባ ዳቦ፥ ‹ጎዳይ ኣይ ዛሮ ኢሚዴ?› ዎይኮ፥ ‹ጎዳይ ዮቲዳይ ኣዜ?› ጊዲ ኦይቻናስ ቤሴስ። 36 ሃይሳፌ ጉዬን ጊዲኮ፥ ‹ጎዳ ቶሆ› ጊዲ ኢንቴ ሃሳያናስ ቤሴና። ጋሶይካ ኣስ ኡባስ ኢዚ ሃሳይዳ ቃላይ ኢዛስ ቶሆ ጊዲዛ ጊሻስ ዴኦ ጾሳ፥ ኡባፌ ዎልቃማ ጎዳ ኑ ጾሳ ቃላ ኢንቴ ቦኪሴታ። 37 ሄሳ ጊሻስ ናቤዛስ፥ ‹ጎዳይ ኢንቴስ ኣይ ዛሮ ኢሚዴ?› ዎይኮ፥ ‹ጎዳይ ዮቲዳይ ኣዜ?› ጋዳ ኦይቻናስ ቤሴስ። 38 ጊዶ ኣቲን ኢንቴ፥ ‹ሃይሲ ጎዳ ቶሆ› ጊኮ፥ ጎዳይ ታኒ ኢንቴና፥ ‹ሃይሲ ጎዳ ቶሆ› ጎፒቴ ጊንካ ኢንቴ፥ ‹ሃይሲ ጎዳ ቶሆ› ጊዴታ። 39 ሄሳ ጊሻስ ኢንቴና፥ ቃሴካ ኢንቴሲኔ ኢንቴ ኣዋታስ ታ ኢሚዳ ካታማይራ ጋዳ ዬጋ ኣጋና፤ ታ ሲንፌካ ዎራ ኦላና። 40 ሜርናስ ዶጌቶንታ ሜርና ዬላቴኔ ካዉሻቴ ታ ኢንቴ ቦላ ኤሃና» ጊዴስ።