Marcos 5

Yessuussi Fuggichcha Hafuuruwwa Manjichokenaa’ni Fulche

1 Insa’nenna Geliilaxxa abbaayya foonfe Gergeesenoon hiyyemaake bogibaa dange. 2 Yessuussinna hobolotenaa’ni dirreeshshanni; fuggichchi hafuurinni abideme’eeki manjichchi hirreesi giddii’ni fule isibaa dage. 3 Kunni manjichchi hirreesi giddo hedha’nemmakenna; fedheeki midde isoo haachchabiki usurra dande’aaki ayyinna hedhemmabaani. 4 Isinna heddo yanna lekkatike sibljinninna haachchabiki usuremaammani; yaane kinni angatika haachchaba tansha’ninna lekkatika sibljo enqa’ni huna’nemmani. Tennexxee isoo huuni manjinna uurrisa dande’aaki fedhemmabaan. 5 Heddo yanna hashshanna barra hirreessi giddonna koobuwwate’ni marema’ni raara’nemmani; biso ifikanna kinjki wowwoxxa’nemmani.

6 Kunni manjichchi Yessuusii’i bayyanni uudee wodda isibaa gongeexxi guluffate’e isoo sagade. 7 Lummise raara’ni, «Ati lummedheeke Mageniinke Belto Yessuusii! Ati ane’n maa affette? Magenke summini ate kadhataneni; magaaneteni ane’e abara uudissoxxe!» hiyye. 8 Manjichchikinna tenneenna hiyyeechchi Yessuussi, «Ati fuggichchi hafuuri konne manjichchonaa’ni fuli!» hiyyeemmaxxeeten. 9 Ookkonechchi uduma Yessuussi, «Summi atiki ayyete?» hiyyeexxi isoo qore.

Isinna hiisseexxi, «No’o heddoke kandeennaxxee summi anki Leegooniten*5:9 Leegoon Leegoon hiyyo jaane kuma lekkati lolaammaka loliinka mannanna mitte dhibbanna lame tomme fadhaduwwa abidaake loliinke mannike summan.» hiyyeexxi hiisse. 10 Isinna ookkone boganaa’ni shorrabaashsha Yessuussi’i jabeesse kadhate.

11 Qarqarake’ni hedheeke tullichcha’ni heddi booyyetiki bobba’i ookko’o dheedaamman. 12 Tennexxee fuggichchi hafuuruwwi Yessuussii, «No’o Booyyuwwate’ni e’yinonnaa eetii no’a uwwi» hine iso’o kadhante. 13 Yessuussinna insa’ne’a eetii uwwe. Fuggichchi hafuuruwwinna fuleexxi booyyuwwate’ni e’ye. Lame kuma geltaaxxi booyyuwwa irigakenaa’ni butti’a ibbeexxi abbaayyati giddo lixxe.

14 Booyyetixxi allalsano kexxe bajje; insa’nenna odotanna qachchake’ninna hadi giddo geessinse; ardikinna tennee yaane uudo’a hedhe hedhemmabaa’ni dage.