1 እዮስያሳ ናአይ፥ ይሁዳ ካዎይ እዮአቄም ካዎትዳ ኦይዳን ላይን፥ ባብሎነ ካዎይ ናቡካዳናፆር ካዎትዳ ኮይሮ ላይን፥ ይሁዳ አሳባይ ኤርምያሳኮ ይዳ ቃላይ ሀይሳ። 2 ናበይ ኤርምያስ ይሁዳ ኡባስነ የሩሳላመን ደእያ ኡባስ ሀይሳዳ ያግስ፦ 3 አሞፀ ናአይ፥ ይሁዳ ካዎይ፥ እዮስያስ ካዎትዳ ታማነ ሄን ላይፈ ዶምድ፥ ሀች ጋካናዉ፥ ላታማነ ሄ ላይ ጎዳ ቃላይ ታኮ ይስ። ታ ህንተዉ ዛራ ዛራ ኦዳስ፤ ሽን ህንተ ስኦና እፅደታ።

4 ጎዳይ ባ አይለታ፥ ናበታ ኡባ ዛር ዛር ህንተኮ ኪትስ፤ ሽን ህንተ ስኦና እፅደታ። 5 ኤንቲ፥ "ህንተ ኡባይ ህንተ ኢታ ኦግያፐነ ህንተ ኢታ ኦሱዋፐ ስምተ። ጎዳይ ህንተዉነ ህንተ ማይዛታስ መርናዉ እምዳ ቢታን ህንተ ዳና። 6 ሀራ ፆሳታ ጎይናናዉነ ኤንታዉ ኦናዉ ካሎፍተ። ቃስ ህንተ፥ ህንተ ኩሸን ኦዳ ኤቃታን ጎዳ ሀንቁዋ ደንፍተ። ሄስ ሀንኮ ጎዳይ ህንተና ቆሄና" ያግዶሶና።

7 "ህንተ ታ ኦድዳይሳ ስኦና እፅድ፥ ህንተ ኩሸይ ኦዳባን ታና ይሎይደታ። ህንተ፥ ህንተና ቆህያባ ኦደታ" ያጌስ ጎዳይ።

8 "ሄሳ ግሾ፥ ኡባፈ ዎልቃማ ጎዳይ ሀይሳዳ ያጌስ፦ ህንተ ታ ቃላስ ኪተቶና እፅዳ ግሾ፥ 9 ፑደሀ ባጋ አሳ ኡባነ ታ አይልያ ባብሎነ ካዋ ናቡካዳናፆራ ፄጋና። ኤንታ ሀ ቢታ ቦላ፥ ሀ ቢታን ደእያ አሳ ቦላነ ሄራን ደእያ ካዎተታ ኡባ ቦላ ኤሀና። ታ ሀ ቢታ ኩመ ይሳና፤ ቃስ በእዳ ኡባይ ሻትያባነ ቀልቅስያባ ኦና" ያጌስ ጎዳይ። 10 ኤንታ ግዶፈ እልልስነ ኡፋይሳ ቃላ፥ ያጋኖ ግርስ፥ ዎፃ ግርስነ ፆምፐ ፖኦ ይሳና። 11 ሀ ቢታይ ኩመ ላለትዳነ ባይሳ ቢታ ግዳና፤ ካዎተት ባብሎነ ካዋስ ላፑን ታሙ ላይ ሃረታና።

12 "ላፑን ታሙ ላይይ ፖለትዳፐ ጉየ፥ ታኒ ባብሎነ ካዋነ እያ አሳ ኤንታ ናጋራ ግሾ ሴራና፤ ኤንታ ቢታ መርናዉ ባይሳ ኦና። 13 ታ ሀ ቢታ ቦላ ኦድዳ ኡባ፥ ኤርምያስ ካዎተታ ኡባ ቦላ ኦድዳ ትንብትያነ ሀ ማፃፋን ፃፈትዳ ኡባ ሀ ቢታ ቦላ ኤሀና። 14 ዳሮ ካዎተትነ ግታ ካዎት ባብሎነ አሳ ሃራና። ታ ኤንታዉ፥ ኤንታ ሀኑዋዳነ ኤንታ ኩሸ ኦሱዋዳ ዛራና" ያጌስ ጎዳይ።

15 "ታ ሀንቁዋን ኩምዳ ዎይነ ዋንጫ ታ ኩሸፐ ኤካ። ኤፋዳ ታ ነና ኪትያ ካዎተታ ኡባ ኡሻ። 16 ኤንቲ ኡይድ፥ ታኒ ኤንታ ግዶ የድያ ማሻ ጋሶን ጋንድጋራናነ ጎያና" ያጌስ ጎዳይ እስራኤለ ፆሳይ።

17 ታኒ ጎዳ ኩሸፐ ዋንጫ ኤካዳ፥ እ ታና ኪትዳ ካዎተታ ኡባ ኡሻስ። 18 ሀች ሀንዳይሳዳ ኤንታ ኡባ ዮነ ዳጋማ፥ ጫሸነ ባደ ኦና መላ የሩሳላመነ ይሁዳ ካታማታ፥ እያ ካዎታነ እያ ሞርናታ ኡባ ኡሻስ። 19 ግብፀ ካዋ፥ እያ አይለታ፥ እያ ሞርናታ፥ እያ ቢታ አሳ ኡባነ 20 ያን ደእያ አላጋ አሳ ኡባ ኡሻስ። ኦፃ ካዎታ ኡባ ኡሻስ። ፍልስፄመን ደእያ አስቃሎና፥ ጋዛ፥ ኤቅሮናነ አሽዶዳፐ አትዳ ካዎታ ኡባ ኡሻስ። 21 ኤዶመ፥ ሞአበነ አሞነ ኡሻስ። 22 ፅሮሳ ካዎታ ኡባ፥ ስዶና ካዎታ ኡባነ መደትራነ አባፈ ሄፍንን፥ ሃሆን ደእያ ካዎታ ኡሻስ። 23 ደዳና፥ ተማና፥ ቡዛነ ባንታ ሁጵያ ጋፃ ሜድያ አሳ ኡባ ኡሻስ። 24 አራበ ካዎታ ኡባነ መላ ቢታን ደእያ ዋላካ አሳ ካዎታ ኡባ ኡሻስ። 25 ዝምራ፥ ኤላማነ ሜዶና ካዎታ ኡባ ኡሻስ። 26 ፑደሀ ቢታ ካዎታ ኡባ፥ ሃሆንነ ማታን ደእያ ካዎታ ኡባ ካላዳ ካላዳ ሳኣ ቦላ ደእያ ካዎተታ ኡባ ኡሻስ። ኤንታፈ ጉየ ባብሎነ ካዎይ ኡያና።

27 ጎዳይ ታኮ፥ "ሄሳ ግሾ፥ ‘ኡባፈ ዎልቃማ ጎዳይ፥ እስራኤለ ፆሳይ ህንተኮ ሀይሳዳ ያጌስ’ ያጋ። ‘ኡይተነ ማትተ፤ ጮይተነ ኩንድተ። ታኒ ህንተ ግዶ የድያ ማሻ ጋሶን ዛሪድ ደንዶፍተ’ ያግስ። 28 ሽን ኤንቲ ነ ኩሸፐ ዋንጫ ኤኮናነ ኡዮና እፅኮ፥ ኤንታኮ ሀይሳዳ ያጋ። ‘ኡባፈ ዎልቃማ ጎዳይ ህንተኮ ሀይሳዳ ያጌስ፦ ህንተ ኡያናዉ በሴስ። 29 ታ ሱንን ፄገትዳ ካታማ ቦላ ኢታባ ኦናዉ ዶማይስ። ያትን ህንተ ሴረቶና አታናዉ ዳንዳኤቲ? ታ ሳአን ደእያ ኡባ ቦላ ማሻ ፄግዳ ግሾ ህንተ ሴረቶና አተከታ’ " ያጌስ ኡባፈ ዎልቃማ ጎዳይ።

30 "ሄሳ ግሾ፥ ኤርምያሳ፥ ሀ ቃላ ኡባይ ኤንታ ቦላ ፖለታናይሳ ኤንታዉ ኦዳ። ጎዳይ ቃን ጉማና፤ ጎዳይ ባ ጌሻ በሳፈ ባ ጉን ስሳና። እ ባ ቢታ ቦላ ፃጋና፤ ዎይነ ጉምኤይሳት ዋሰይሳዳ ሳአን ደእያ ኡባ ቦላ ዋሳና። 31 ጎዳስ ካዎተታራ ሞቶይ ደእያ ግሾ እያ ዋሶይ ሳአ ጋፃ ጋክድ ስኤቴስ። ጎዳይ አሳ ኡባራ ፕርደታና፤ እ ኢታታ ማሻስ አድ እማና" ያጌስ ጎዳይ።

32 "ኢታባይ ካዎተፈ ካዎተ ላለትስ፤ ሳኣ ጋፃፐ ጎተይ ደንድስ" ያጌስ ኡባፈ ዎልቃማ ጎዳይ።

33 ሄ ዎደ ጎዳይ ዎዳይሳታ አሀይ፥ ቢታ ቦላ ሀ ጋፃፐ ያ ጋፃ ጋካናዉ ላለታና። ኤንታዉ ዬከተና፥ ኤንታ አሀይ ሺቀና ዎይኮ ሞገተና፤ ኤንቲ ቢታን ፕቶ መላ ግዳና።

34 ህንተኖ፥ ሄንንቾቶ፥ ዬክተነ ዋስተ። ህንተኖ፥ ዉድያ ካለይሳቶ፥ ብዶን ጎንዶረትተ። ህንተ ሹከትያ ዎደይ ጋክስ፤ ህንተ ኩንዳናነ ሎኦ ኡርቃ ሚሻዳ መቀረታና። 35 ሄንንቾት ባቃትድ አትያ በሲ ባዋ፤ ዉድያ ካለይሳት ከስ ኤክያ በሲ ባዋ። 36 ጎዳይ ኤንታ ሄን ጋድያ ይስያ ግሾ፥ ሄንንቾት ዋስያ ዋሱዋነ ዉድያ ካለይሳት ዬክያ ዬሁዋ ስእተ። 37 ጎዳ ሱልያ ሸንያ ጋሶን ሳሮ ቢታይ ባይሳታና። 38 ጋሞይ ባ ደእያ ዎራፐ ከየይሳዳ ጎዳይ ባ ደእያ በሳፈ ከያና። ኤንታ ቢታይ ኡንኤይሳታ ማሻንነ ጎዳ ሱልያ ሀንቁዋን ባይሳ ግዳና።