1 ህንተኖ፥ ብንያመ አሳዉ፥ ህንተ ሸምፑዋ አሻናዉ ባቃትተ! የሩሳላመፐ ከይተ! ታቁሄ ካታማን ሞይዘ ፑንተ! ቤት-ሀካሬማን ማላ በስተ! ፑደሀ ባጋፈ ኢታባይነ ግታ ዮይ ያና ሀኔስ። 2 ታኒ ሎእያነ ኡፋይስያ ፅዮነ ካታማታ ይሳና። 3 ሄንንቾት ባንታ ዉድያ ኤክድ ያ ያና። እያ ዩሹዋን ባንታ ዱንካንያ ቶካና፤ እሶይ እሶይ ባ ዉድያ ሄማና። 4 "የሩሳላመ ኦላናዉ ጊገትተ! ደንድተ! እያ ሴታ ጋላስ ኦሎስ። ሽን አየ! ሳእ ቃሜስ፤ ኦማርሳ ኩያይ አዱቅ አዱቅ ቤስ። 5 ሄሳ ግሾ፥ ደንድተ! ቃማ ኦልድ እያ ሚፃ ላሎስ" ያግድ ማቀቶሶና።

6 ኡባፈ ዎልቃማ ጎዳይ ሀይሳዳ ያጌስ፦ "ምታ ቃንፅተ። የሩሳላመ ግምብያ ምየን ቢታ ዶርተ። ሄ ካታማን ናቆይ ኩምዳ ግሾ እ ሴረታናዉ በሴስ። 7 ሃ ኦል ሃ ፑልተይሳዳ እካ ባ ኢታተ ፑልቴስ። ማካልነ ዮይ እያ ግዶን ስኤቴስ፤ እያ ሀርገይነ ማዱንይ ታ ስንና። 8 ነኖ የሩሳላመ፥ ታ ሴራ ኤካ። አካይ፥ ጊኮ፥ ታ ኔፐ ሻከታናነ ነ ቢታ አስ ባይና ባይሳ ከሳና" ያጌስ።

9 "ዎይነ ፖሽልያዳ፥ እስራኤለ አሳ ግዶፈ አትዳይሳታ ሎይድ ፖሽልተ። ዎይነ ቆርያ አሳዳ፥ ህንተ ኩሽያ ዳሻታ ግዶ ዛሪድ የድተ" ያጌስ ኡባፈ ዎልቃማ ጎዳይ።

10 "ታ ኦደስ ኦዶ? ኦና ሴሮ? ኦን ስአኔ? ኤንቲ ስኦና መላ ኤንታ ሀይይ ቱልስ። ጎዳ ቃላይ ኤንታዉ ሚቻስ አትስ፤ ኤንቲ እያን ኡፋይቶኮና። 11 ጎዳ ሀንቆይ ታናን ኩምስ። ታ ሀ ሸንያ ተቃናዉ ዳንዳእከ። ኦገ ቦላ ደእያ ዮጋ ናይታ ቦላነ ሺቅዳ ናአተታ ቦላ ታ ሀንቁዋ ትጋ። ማችያ፥ አዝናይነ ጭምዳ አሳ ኡባይ አቶኮና። 12 ታኒ ሄ ቢታን ደኤይሳታ ቦላ ታ ኩሽያ የድያ ዎደ ኤንታ ኬይ፥ ኤንታ ጎሻይነ ኤንታ ማቸት ኡባይ ሀራታስ እመታና" ያጌስ።

13 "ጉፈ ግታ ጋካናዉ ኡባይ ባና ጎእያባ ኮዬስ። ናበትነ ካህነት ኡባይ ጭሞሶና። 14 ታ አሳ ማዱን ፓናባ ኦድ ጉ ለ ዎሶና። ሳሮይ ባይናሽን፥ ‘ሳሮ፤ ሳሮ!’ ያጎሶና። 15 ኤንቲ ሀ ሻትያ ኦሱዋ ኦድ ዬላትዶና? አካይ፥ ኤንቲ ኩመ ዬላትቦኮና፤ ኤንቲ ዬል አይበኮ ኤሮኮና። ሄሳ ግሾ፥ ኤንትካ ኩንድዳይሳታ ግዶን ኩንዳና። ታኒ ኤንታ ሴርያ ዎደ ኤንታ ካዉሻና" ያጌስ ጎዳይ።

16 ጎዳይ ሀይሳዳ ያጌስ፦ "ኦግያን ኤቅድ ፄልተ፤ በን ኦገይ ደእያ በሳ ኦይችተ። ሎኦ ኦገይ አዉን ደእያኮ ኦይችድ እያን ሄመትተ፤ ህንተ ሸምፖ ደማና። ሽን ህንተ፥ ኑኒ ሄ ኦግያን ሄመቶኮ!" ያግደታ። 17 ታኒ ናገይሳታ ህንተ ቦላ ሹማዳ፥ "ሞይዘ ግርሳ ስእተ" ያጋስ። ሽን ህንተ፥ "ኑ ስኦኮ" ያግደታ።

18 "ሄሳ ግሾ፥ ካዎተቶ፥ ስእተ! ታኒ ታ አሳ ቦላ ኦናባ አኬክተ። 19 ሳአን ደእያ አሳዉ፥ ሀይሳ ስእተ! ኤንቲ ታ ቃላ ስኦና እፅዳ ግሾነ ታ ህግያ ካዳ ግሾ ታ ኤንታ ቦላ ዮ ኤሀና። 20 ሳባ ቢታፈ እፃነ ዎይኮ ሃሆ ቢታፈ ይዳ ሳዎይነ ቅማመይ ታዉ አይሴ? ህንተ ፁሳ ያርሾይካ ኤከተና። ህንተ ያርሾይ ታና ኡፋይሰና" ያጌስ።

21 ሄሳ ግሾ፥ ጎዳይ፥ "ታኒ ሀ አሳ ስንን በ ዎና፤ አዋትነ ናይት ኤንታን በታና፤ ሾሮትነ ላገት ያና" ያጌስ።

22 ጎዳይ፥ "ፑደሀ ባጋ ቢታፈ ኦላንቾት ዮሶና፤ እስ ግታ ካዎተይ ሳኣ ጋፃፐ ደንድስ። 23 ኤንቲ ዶንገነ ቶራ ዳንጭዶሶና፤ ኤንቲ ቃይ ባይና ዎዛና ምኖታነ ማሮተ ኤሮናይሳታ። ኤንቲ ፓራን ጋላብያ ዎደ አባዳ ጉሞሶና። ህንተኖ፥ ፅዮነ ካታማ አሳዉ፥ ኤንቲ ህንተና ኦላናዉ ሳልፕዶሶና" ያጌስ።

24 ኑኒ ሄ ኦዳ ስእን፥ ኑ ኩሸይ አርጋጭስ፤ ማጫስ እቀ ኦይከይሳዳ ኑና መቶይነ ኡንእ ኦይክስ። 25 ሞርከይ ማሻ ኦይክዳ ግሾነ ያን ሀን ዳጋም ደእያ ግሾ ሶፐ ከዮፕተ፤ ኦገ ቦላካ በንቶፍተ። 26 ይሰይስ ቆፖና ኑ ቦላ ያና ግሾ፥ ካዮ ማኦ ማእድ፥ ብዶ ቦላ ጎንዶረትድ፥ አስ ባ እስ ናአስ ዬክያ መላ ታ አሳስ ዬክተ።

27 ጎዳይ ኤርምያሳኮ፥ "ኔኒ ኤንታ ኦግያ ፆሞሳና መላነ ፓጫና መላ ብራታ ፓጭያ አሳዳ ታ ነና ኦስ። 28 ኤንቲ ኡባይ ዝግራናዉ ዩዮሶና፤ ኦድን ስኦና ማካላንቾታ። ኤንቲ ናሰ ብራታዳነ ብራታዳ ምኖ፤ ኤንቲ ኡባይ ናጋራ ኦሶና። 29 ብራታ ቦላ ደእያ ሽአ ፁግድ ጌሻናዉ ግልፐይ ፑኔስ። ሽን ጌሻናዉ ዋይዳ ዋየይ ጮ ግድስ፤ ታ አሳ ግዶን ደእያ ኢታት ክችቦኮና። 30 ጎዳይ ኤንታ የግድ አግዳ ግሾ፥ ኤንቲ የገትዳ ብራ ጌተታና" ያጌስ።